ନୂଆଦିଲ୍ଳୀ ୧୦/୦୬: ଟି-ଟ୍ୱେଣ୍ଟି ବିଶ୍ୱକପ୍ର ସବୁଠୁ ବଡ଼ ମ୍ୟାଚ୍ । ବର୍ଷା ମ୍ୟାଚ୍ରେ ବାଧକ ସାଜିଥିଲା । ପାଗ ଭଲ ହେବା ପରେ ଟସ୍ ପଡ଼ିଥିଲା । ରୋହିତ ଶର୍ମା ଓ ବାବର ଆଜାମ ଟସ୍ ପକାଇବା ନେଇ କ୍ରିଜ ପାଖରେ ଛିଡ଼ା ହୋଇଥାନ୍ତି । ରୋହିତ କଏନ ପକାଇବେ । କିନ୍ତୁ କଏନ କାହିଁ? କିଛି ସମୟ ଖୋଜା ଖୋଜି ପରେ ପରେ ଶେଷରେ ରୋହିତ ନିଜ ପକେଟରୁ କଏନ ବାହାର କରିଥିଲେ । ପରସ୍ପରକୁ ଅନାଇ ସମସ୍ତେ ହସି ଥିଲେ । ରୋହିତ ସେମିତି ବଡ଼ ଇନିଂସ ଖେଳି ପାରିନଥିଲେ । ସେ ମାତ୍ର ୧୩ ରନ୍ କରି ପାଭିଲିୟନ ଫେରିଥିଲେ।
ନାସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ୩୦ ହଜାରରୁ ଊଦ୍ଧ୍ୱର୍ ଦର୍ଶକଙ୍କ କୋଳାହଳରେ ଫାଟି ପଡ଼ୁଥିଲା ନ୍ୟୁୟର୍କ ସହର । ଖେଳ ଯେତେବେଳେ ନିର୍ଣ୍ଣାୟକ ମୋଡ଼ ନେଲା, ପାକିସ୍ତାନୀ ଦର୍ଶକ ନିରବ ହୋଇଯାଇଥିଲେ । ତ୍ରିରଙ୍ଗା ଫର ଫର ହୋଇ ଉଡ଼ୁଥିଲା, ଭାରତ..ଭାରତ.. ଧ୍ୱନିରେ ଷ୍ଟାଡିୟମର ଆକାଶ ଫାଟି ପଡ଼ୁଥିଲା । ଶେଷରେ ଭାରତ ଅକଳ୍ପନୀୟ ବିଜୟ ହାସଲ କଲା । ପାକିସ୍ତାନ ୬ ରନ୍ରେ ପରାଜିତ ହୋଇ ଚଳିତ ଟି-ଟ୍ୱେଣ୍ଟି ବିଶ୍ୱକପ୍ରେ କ୍ରମାନ୍ୱୟରେ ଦ୍ୱିତୀୟ ପରାଜୟର ସାମ୍ନା କଲା ।
ପ୍ରଥମ ମ୍ୟାଚ୍ରେ ଦୁର୍ବଳ ଆମେରିକା ଠାରୁ ସୁପର ଓଭରରେ ପରାସ୍ତ ହୋଇଥିଲା ପାକିସ୍ତାନ । କିନ୍ତୁ ଭାରତ ଠାରୁ ଆଜିର ମ୍ୟାଚ୍ ଜିତିଥିଲେ ହୁଏତ ପାକ୍ ପ୍ରଶଂସକ ଦଳକୁ ମାଫ୍ କରିଦେଇଥାନ୍ତେ । ସୁନ୍ଦର ବୋଲିଂ କରିଥିଲେ, କିନ୍ତୁ ବ୍ୟାଟର ଭାରତୀୟ ବୋଲରଙ୍କ ଯାଦୁକରୀ ଫାସରେ ଛନ୍ଦି ହୋଇଗଲେ ।
ଯଶପ୍ରୀତ ବୁମରା ଯେଉଁଭଳି ଅଗ୍ନିବର୍ଷୀ ବୋଲିଂ କଲେ, ତାହାକୁ ସାମ୍ନା କରିବା ପାକ୍ ବ୍ୟାଟରଙ୍କ ପକ୍ଷେ ଅସମ୍ଭବ ଥିଲା । ସୀମିତି (୧୨୦) ବିଜୟ ଲକ୍ଷ୍ୟକୁ ଶେଷରେ ଦଳ ପିଛା କରି ୭/୧୧୩ ରନ୍ରେ ଅଟକି ଗଲା । ହାର୍ଦ୍ଦିକ ପାଣ୍ଡ୍ୟା ଏବଂ ଅର୍ଶଦୀପ ସିଂ ଯେଉଁଭଳି ବୋଲିଂ କଲେ ପାକିସ୍ତାନୀ ପ୍ରଶଂସକ ପୂରା ବାକ୍ ଶୂନ୍ୟ ହୋଇଯାଇଥିଲେ ।
ଶେଷରେ ପାକିସ୍ତାନ ପରାସ୍ତ ହେଲା । ଟି-ଟ୍ୱେଣ୍ଟି ବିଶ୍ୱକପ୍ରେ ଭାରତର ଏହା ପାକିସ୍ତାନ ବିପକ୍ଷରେ ସପ୍ତମ ବିଜୟ ଥିଲା । ୨୦୦୭ (୨ ଥର), ୨୦୧୨, ୨୦୧୪, ୨୦୧୬ , ୨୦୨୨ ଏବଂ ୨୦୨୪ରେ ଭାରତ ବିଜୟୀ ହୋଇଛି । କେବଳ ୨୦୨୧ ସଂସ୍କରଣରେ ପାକିସ୍ତାନ ବିଜୟୀ ହୋଇଥିଲା । ବୁମରା ୧୪ ରନ୍ ଦେଇ ୩ଟି, ହାର୍ଦ୍ଦିକ ୨୪ ରନ୍ ଦେଇ ୨ଟି ଏବଂ ଅର୍ଶଦୀପ ୩୧ ରନ୍ ଦେଇ ଏକ ୱିକେଟ୍ ହାସଲ କରିଥିଲେ । ଅକ୍ଷର ପଟେଲ ମଧ୍ୟ ଗୋଟିଏ ୱିକେଟ୍ ପାଇଥିଲେ । ଏହି ମ୍ୟାଚ୍ରେ ଭାରତ ପ୍ରଥମେ ବ୍ୟାଟିଂ କରି ୧୯ ଓଭରରେ ସମସ୍ତ ୱିକେଟ୍ ହରାଇ ୧୧୯ ରନ୍ କରିଥିଲା । ରିଷଭ ପନ୍ତଙ୍କ ୪୨ ରନ୍ର ଯୋଗଦାନ ଦଳ ପାଇଁ ବେଶ ଗୁରୁତ୍ୱପୂର୍ଣ୍ଣ ରହିଥିଲା ।
ପରାଜୟ ପରେ ପାକିସ୍ତାନ ପରବର୍ତ୍ତୀ ରାଉଣ୍ଡକୁ ଉନ୍ନୀତ ହେବା ନେଇ ଆଶଙ୍କା ଦେଖା ଦେଇଛି । ଆମେରିକା ଯଦି ଆଉ ଗୋଟିଏ ମ୍ୟାଚ୍ ଜିତିବାରେ ସଫଳ ହେଉଛି, ତେବେ ପାକିସ୍ତାନ ବିଦାୟ ନେବା ନିଶ୍ଚିତ ।