ବର୍ଲିର୍ନ,୨୦/୦୬: ଚଳିତ ୟୁରୋ ଚାମ୍ପିଅନସିପ୍ରେ ଆସନ୍ତା କାଲି ଏକ ଗୁରୁତ୍ୱପୂର୍ଣ୍ଣ ମୁକାବିଲା ରହିଛି । ୟୁରୋପ୍ର ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ସ୍ପେନ୍ ଓ ଇଟାଲୀ ପରସ୍ପରକୁ ଭେଟିବେ । ଇଟାଲୀ ଡିଫେଣ୍ଡିଂ ଚାମ୍ପିଅନ୍ । ସ୍ପେନ୍ ଶୃଙ୍ଖଳିତ ଖେଳକୁ ନେଇ ପରିଚିତ । ଫଳରେ ଆସନ୍ତା କାଲି ଦର୍ଶକ ଏକ ସଂଘର୍ଷପୂର୍ଣ୍ଣ ମ୍ୟାଚ୍ର ମଜା ନେବେ ।
ୟୁରୋ ଓ ବିଶ୍ୱକପ୍କୁ ମିଶାଇଲେ ଉଭୟ ଦଳ ପରସ୍ପରକୁ ୧୦ଥର ଭେଟି ସାରିଛନ୍ତି । ଅନ୍ୟ କୌଣସି ଦଳ ପରସ୍ପରକୁ ଏତେଥର ଭେଟି ନାହାନ୍ତି । କେବଳ ୟୁରୋରେ ଉଭୟ ୮ଥର ସାମ୍ନା ସାମ୍ନା ହୋଇ ସାରିଛନ୍ତି । ୨୦୦୮ ୟୁରୋରୁ ଉଭୟ ଦଳ ନିୟମିତ ଭାବେ ପରସ୍ପରକୁ ଭେଟୁଛନ୍ତି ।
ପୂର୍ବ ରେକର୍ଡକୁ ଦେଖିଲେ ଆସନ୍ତା କାଲି ଇଟାଲୀର ପଲା ଭାରି ରହିବ । ମାତ୍ର ସ୍ପେନ୍ ମଧ୍ୟ ପୂର୍ବ ପରାଜୟର ପ୍ରତିଶୋଧ ନେବାକୁ ପ୍ରସ୍ତୁତ । ଉଭୟ ଦଳ ମଧ୍ୟରେ ଖେଳାଯାଇଥିବା ୧୧ଟି ମ୍ୟାଚ୍ରୁ ସ୍ପେନ ମାତ୍ର ଗୋଟିଏ ମ୍ୟାଚ୍ ଜିତିଛି । ଇଟାଲୀ ୪ଟି ମ୍ୟାଚ୍ ଜିତିଥିବାବେଳେ ଅନ୍ୟ ୫ଟି ମ୍ୟାଚ୍ ଡ୍ର’ ରହିଛି । ୨୦୧୨ ୟୁରେ ଫାଇନାଲ୍ରେ ସ୍ପେନ୍ ୪-୦ ପେନାଲ୍ଟି(ଟାଇବ୍ରେକର) ଗୋଲ୍ରେ ଇଟାଲୀକୁ ହରାଇ ଚାମ୍ପିଅନ୍ ହୋଇଥିଲା ।
ସ୍ପେନ ଗତ ୨ଟି ନେସନ୍ସ ଲିଗ୍ରେ ଇଟାଲୀକୁ ପରାସ୍ତ କରିଥିଲା । ଆସନ୍ତା କାଲି ଏହି ବିଜୟଧାରାକୁ ଅବ୍ୟାହତ ରଖିବାକୁ ସ୍ପେନ ପ୍ରୟାସ କରିବ । ଆଲବାନିଆ ବିପକ୍ଷରେ ବିଜୟ ପରେ ଇଟାଲୀର ମନୋବଳ ଦୃଢ ରହିଛି । ଆସନ୍ତା କାଲି ନିକୋଲୋ ବାରେଲାଙ୍କ ଉପରେ ନଜର ରହିବ । ସେ ଇଟାଲୀର ଶେଷ ୫ଟି ଗୋଲରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛନ୍ତି । ୨ଟି ଗୋଲ୍ କରିଛନ୍ତି ଓ ୩ଟି ଗୋଲ୍ରେ ସହାୟତା କରିଛନ୍ତି ।
ସ୍ପେନ୍ ପକ୍ଷରୁ ଯୁବ ଷ୍ଟ୍ରାଇକର ଲାମିନ ୟମାଲଙ୍କ ଖେଳ ଦେଖିବା ପାଇଁ ଦର୍ଶକ ଉତ୍ସୁକତାର ସହ ଅପେକ୍ଷା କରିଛନ୍ତି । କ୍ରୋଏସିଆ ବିପକ୍ଷ ମ୍ୟାଚ୍ରେ ସେ ପ୍ଲେୟାର ଅଫ ଦ ମ୍ୟାଚ ବିବେଚିତ ହୋଇଥିଲେ ।
