ମୁମ୍ବାଇ,୨୬/୦୯: ଆଗାମୀ ଆଇପିଏଲ ପୂର୍ବରୁ ମେଗା ନିଲାମ ଅନୁଷ୍ଠିତ ହେବ । ପ୍ରତ୍ୟେକ ଫ୍ରାଞ୍ଚାଇଜ୍ଙ୍କୁ ସର୍ବନିମ୍ନ ଖେଳାଳି ରଖି ବାକି ଖେଳାଳିଙ୍କୁ ବିଦାୟ ଦେବାକୁ ପଡ଼ିବ ।୧୦ ଆଇପିଏଲ୍ ଫ୍ରାଞ୍ଚାଇଜ୍ଙ୍କ ସହ ମାରାଥନ ବୈଠକ ପରେ ବିସିସିଆଇ ଖେଳାଳି ପ୍ରତିଧାରଣ ନିୟମ ଘୋଷଣା କରିବାକୁ ଯାଉଛି । ଏଥର ଫ୍ରାଞ୍ଚାଇଜମାନଙ୍କୁ ୫ଜଣ ଖେଳାଳି ରଖିବା ପାଇଁ ଅନୁମତି ମିଳିବା ଆଶା କରାଯାଉଛି ।
୨୦୨୨ ମେଗା ନିଲାମ ବେଳେ ୪ଜଣ ଖେଳାଳିଙ୍କୁ ରଖିବା ପାଇଁ ଅନମୁତି ମିଳିଥିଲା । ଏଥର ଫ୍ରାଞ୍ଚାଇଜ୍ମାନଙ୍କ ଦାବିକୁ ନଜରରେ ରଖି ବିସିସିଆଇ ପ୍ରତିଧାରଣ ସଂଖ୍ୟା ବୃଦ୍ଧି କରିବାକୁ ନିଷ୍ପତ୍ତି ନେଇଛି । ମାତ୍ର ଏହା ବଦଳରେ ରାଇଟ୍ ଟୁ ମ୍ୟାଚ୍(ଆରଟିଏମ) କାର୍ଡ ନିୟମକୁ ପ୍ରତ୍ୟାହାର କରିବାକୁ ଯୋଜନା କରୁଛି ।
୨୦୨୨ ମେଗା ନିଲାମ ବେଳେ ଆରଟିଏମ୍ କାର୍ଡ ଯୋଗେ ନିଜ ପୂର୍ବ ଖେଳାଳିଙ୍କୁ ଫେରାଇ ନେବା ପାଇଁ ଫ୍ରାଞ୍ଚାଇଜ୍ଙ୍କ ନିକଟରେ ସୁଯୋଗ ରହିଥିଲା । ଆରଟିଏମ କାର୍ଡ ନିୟମକୁ ନେଇ ଫ୍ରାଞ୍ଚାଇଜ୍ମାନେ ଅସନ୍ତୋଷ ଜାହିର କରିଛନ୍ତି । ମାତ୍ର ଖେଳାଳି ପ୍ରତିଧାରଣ ସଂଖ୍ୟା ବୃଦ୍ଧି କରିବାକୁ ପ୍ରତ୍ୟେକ ଫ୍ରାଞ୍ଚାଇଜ୍ ଦାବି କରିଛନ୍ତି ।
ବିସିସିଆଇ ପକ୍ଷରୁ ଖୁବ୍ ଶୀଘ୍ର ଖେଳାଳି ପ୍ରତିଧାରଣ ସଂଖ୍ୟା ଘୋଷଣା କରାଯିବ ଓ ପ୍ରତ୍ୟେକ ଖେଳାଳିଙ୍କ ମୂଲ୍ୟ ନିର୍ଣ୍ଣୟ ହେବ । ସେହିପରେ କେତେ ଭାରତୀୟ ଖେଳାଳି ଓ କେତେ ବିଦେଶୀ ଖେଳାଳି ପ୍ରତିଧାରଣ କରାଯିବ, ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ । ସୂଚନାଯୋଗ୍ୟ, ୨୦୨୨ ମେଗା ନିଲାମ ସମୟରେ ୪ଖେଳାଳି ପ୍ରତିଧାରଣ ନିୟମ ଲାଗୁ କରାଯାଇଥିଲା ଓ ଏଥିରେ ଅତି ବେଶୀରେ ୩ ଭାରତୀୟ ଖେଳାଳି ଓ ୨ ବିଦେଶୀ ଖେଳାଳି ରଖିବାର ନିୟମ ରହିଥିଲା।
