ନୂଆଦିଲ୍ଲୀ,୨୭/୦୯: ଡିଫେଣ୍ଡିଂ ଚାମ୍ପିଅନ୍ କୋଲକାତା ନାଇଟ୍ ରାଇଡର୍ସ (କେକେଆର୍) ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ୨୦୨୫ ପାଇଁ ଏହାର ନୂତନ ମେଣ୍ଟର ଘୋଷଣା କରିଛି। ଆପଣଙ୍କୁ କହିରଖୁଛୁ ଯେ ଗୌତମ ଗମ୍ଭୀର ଭାରତୀୟ କ୍ରିକେଟ୍ ଦଳର କୋଚ୍ ହେବା ପରେ କେକେଆର ମେଣ୍ଟର ପଦ ଖାଲି ପଡ଼ିଛି। ବର୍ତ୍ତମାନ ପରବର୍ତ୍ତୀ ଆଇପିଏଲ୍ ସିଜନ୍ ଆରମ୍ଭ ହେବା ପୂର୍ବରୁ ଫ୍ରାଞ୍ଚାଇଜ୍ ଡ୍ରୱେନ ବ୍ରାଭୋଙ୍କୁ ଏହାର ନୂତନ ମେଣ୍ଟର ଭାବରେ ନିଯୁକ୍ତ କରିଛି।
ପୂର୍ବତନ କାରାବିୟାନ ଅଲରାଉଣ୍ଡର ଡ୍ରୱେନ ବ୍ରାଭୋ କୋଲକାତା ନାଇଟ୍ ରାଇଡର୍ସ (କେକେଆର୍) ରେ ଗୌତମ ଗମ୍ଭୀରଙ୍କ ସ୍ଥାନ ନେବେ। ଗମ୍ଭୀର ଭାରତୀୟ ରାଷ୍ଟ୍ରୀୟ କ୍ରିକେଟ୍ ଦଳର ମୁଖ୍ୟ ପ୍ରଶିକ୍ଷକ ହେବା ପରେ କେକେଆର୍ ମେଣ୍ଟର ପଦରୁ ଇସ୍ତଫା ଦେଇସାରିଥିଲେ। ପୂର୍ବତନ ୱେଷ୍ଟଇଣ୍ଡିଜ୍ ତାରକା ସମସ୍ତ ପ୍ରକାର କ୍ରିକେଟ୍ ରୁ ଅବସର ଘୋଷଣା କରିବାର କିଛି ସମୟ ପରେ କୋଲକାତା ଫ୍ରାଞ୍ଚାଇଜ୍ ଦ୍ୱାରା ତାଙ୍କୁ କେକେଆର୍ ମେଣ୍ଟର ଭାବେ ଘୋଷଣା କରାଯାଇଛି।
ସୂଚନାଥାଉକି, ବ୍ରାଭୋ ତାଙ୍କର ଇନ୍ଷ୍ଟାଗ୍ରାମ ପୋଷ୍ଟରେ କ୍ରିକେଟର ସମସ୍ତ ଫର୍ମାଟରୁ ଅବସର ନେଇଥିବା ଘୋଷଣା କରିଥିଲେ। ସେ ଲେଖିଥିଲେ ଯେ,' ମୋତେ ଯେଉଁ କ୍ରିଡ଼ା ସବୁକିଛି ଦେଇଛି, ମୁଁ ଏହାର ସମସ୍ତ ଫର୍ମାଟରୁ ଅବସର ଘୋଷଣା କରୁଛି। ପାଞ୍ଚ ବର୍ଷ ବୟସରୁ ମୁଁ ଜାଣିଥିଲି ଯେ, ମୁଁ ଏହି ଦିଗରେ ଯିବାକୁ ଚାହିଁଛି। କ୍ରିକେଟ ହିଁ ମୋ ଭାଗ୍ୟରେ ଲେଖା ଥିଲା। ମୋର ଅନ୍ୟ କୌଣସି ପ୍ରତି ଇଛା ନଥିଲା, ତେଣୁ ମୁଁ ମୋର ସମ୍ପୁର୍ଣ୍ଣ ଜୀବନ କ୍ରିକେଟ ପାଇଁ ଉତ୍ସର୍ଗ କରିଛି। ଏହା ପ୍ରତିବଦଳରେ ଆପଣମାନେ ସେହି ସବୁ ଜିନିଷ ଦେଇଛନ୍ତି, ଯାହାକି ମୁଁ, ମୋର ଏବଂ ମୋ ପରିବାର ପାଇଁ ସ୍ବପ୍ନ ଦେଖିଥିଲି ଏଥିପାଇଁ ମୁଁ ଆପଣଙ୍କୁ ଧନ୍ୟବାଦ ଦେଇପାରୁନି, କାରଣ ଆପଣଙ୍କ ଭଲପାଇବା ଆଗରେ, ମୋର ପ୍ରଶଂସା କମ୍ ପଡ଼ିଯିବ।'
କେକେଆର ସିଇଓ ଭେଙ୍କି ମୈସୁର ସ୍ପଷ୍ଟ କରିଛନ୍ତି ଯେ, ବ୍ରାଭୋ ବିଶ୍ୱର ବିଭିନ୍ନ ଲିଗରେ ଥିବା ନାଇଟ୍ ରାଇଡର୍ସର ଅନ୍ୟ ଫ୍ରାଞ୍ଚାଇଜ୍ ସହିତ ମଧ୍ୟ କାର୍ଯ୍ୟ କରିବେ। ମୈସୁର ଏକ ବିବୃତ୍ତିରେ କହିଛନ୍ତି, 'ଡିଜେ ବ୍ରାଭୋ ଆମ ସହ ଯୋଗଦେବା ଏକ ଉତ୍ସାହଜନକ କଥା ଅଟେ। ସେ ଯେଉଁଠାରେ ବି ଖେଳନ୍ତି, ଜିତିବାର ଗଭୀର ଇଚ୍ଛା, ତାଙ୍କ ଅଭିଜ୍ଞତା ଓ ଜ୍ଞାନ, ଫ୍ରାଞ୍ଚାଇଜ୍ ଏବଂ ସମସ୍ତ ଖେଳାଳିଙ୍କ ପାଇଁ ବହୁତ ଲାଭଦାୟକ ସାବ୍ୟସ୍ତ ହୋଇଛି ଏବଂ ହେବ ମଧ୍ୟ। ଆମେ ମଧ୍ୟ ବହୁତ ଖୁସି ଯେ ସେ ଆମର ଅନ୍ୟ ସମସ୍ତ ଫ୍ରାଞ୍ଚାଇଜ୍ - ସିପିଏଲ୍, ଏମ୍ସିଏଲ୍ ଏବଂ ଆଇଏଲ୍ଟି୨୦ ରେ ଯୋଗଦେବେ।
