ନୂଆଦିଲ୍ଲୀ,୦୧/୦୬: ଚଳିତ ନରୱେ ଚେସ୍ ଟୁର୍ଣ୍ଣାମେଣ୍ଟର ଓପନ ଓ ମହିଳା ବର୍ଗରେ ୪ ରାଉଣ୍ଡ୍ ଖେଳ ଶେଷ ହୋଇଛି । ମହିଳା ବର୍ଗରେ ଭାରତୀୟ ଗ୍ରାଣ୍ଡ୍ମାଷ୍ଟର ଆର୍ ବୈଶାଳୀ ଆଧିପତ୍ୟ ଜାରି ରଖି ଶୀର୍ଷ ସ୍ଥାନ ବଜାୟ ରଖିଛନ୍ତି । ଅନ୍ୟ ପଟରେ ଓପନ ବର୍ଗରେ ଚେସ୍ ବିସ୍ମୟ ଆର୍ ପ୍ରଜ୍ଞାନନ୍ଦାଙ୍କୁ ପରାଜୟର ସାମ୍ନା କରିବାକୁ ପଡ଼ିଛି ।
ମହିଳା ବର୍ଗର ଚତୁର୍ଥ ରାଉଣ୍ଡ୍ରେ ବୈଶାଳୀ ସ୍ୱିଡେନର ପିୟା କ୍ରାମଲିଙ୍ଗ୍ଙ୍କୁ ହରାଇ ପୂର୍ଣ୍ଣ ୩ପଏଣ୍ଟ ହାସଲ କରିଥିଲେ । ଏହି ମ୍ୟାଚ୍ରେ ସେ ୫୪ ଗୋଟିଚାଳନା ମଧ୍ୟରେ ବିଜୟ ହାସଲ କରିଥିଲେ । ବୈଶାଳୀ ମୋଟ ୮.୫ପଏଣ୍ଟ ସହ ଶୀର୍ଷରେ ରହିଛନ୍ତି । ଅନ୍ୟ ଭାରତୀୟ ଖେଳାଳି କୁନେରୁ ହମ୍ପି ୟୁକ୍ରେନର ଆନା ମୁଜିଚୁକଙ୍କ ନିକଟରୁ ହାରି ଯାଇଥିଲେ ।
ଓପନ ବର୍ଗରେ ବିଶ୍ୱର ଏକ ନମ୍ବର ଖେଳାଳି ମାଗନସ୍ କାର୍ଲସେନଙ୍କୁ ହରାଇ ବିପର୍ଯ୍ୟୟ ଘଟାଇଥିବା ପ୍ରଜ୍ଞାନନ୍ଦା ଆଜି ଆମେରିକାର ହିକାରୁ ନାକାମୁରାଙ୍କ ନିକଟରୁ ହାରି ଯାଇଥିଲେ । ନାକାମୁରା ପୂର୍ଣ୍ଣ ୩ ପଏଣ୍ଟ ହାତେଇବା ସହ ତାଲିକାରେ ଶୀର୍ଷ ସ୍ଥାନକୁ ଉନ୍ନୀତ ହୋଇଛନ୍ତି । ସେ ୭ପଏଣ୍ଟ ପାଇଛନ୍ତି । ପ୍ରଜ୍ଞାନନ୍ଦା ୫.୫ ପଏଣ୍ଟ ସହ ଚତୁର୍ଥରେ ରହିଛନ୍ତି । ଅନ୍ୟ ମ୍ୟାଚ୍ରେ କାର୍ଲସେନ ଆମେରିକାର ଫାବିଆନୋ କାରୁଆନାଙ୍କୁ ଏବଂ ଅଲିରେଜା ଫଇରୌଜା ବିଶ୍ୱ ଚାମ୍ପିଅନ ଚୀନର ଡିଙ୍ଗ୍ ଲିରେନଙ୍କୁ ହରାଇଥିଲେ ।
