ନୂଆଦିଲ୍ଲୀ: ଜି-7 ଶିଖର ସମ୍ମିଳନୀର ଆଉଟରିଚ୍ ଅଧିବେଶନରେ ସାମିଲ ହେବା ପାଇଁ ଇଟାଲୀ ଗସ୍ତରେ ଥିବା ପ୍ରଧାନମନ୍ତ୍ରୀ ମୋଦୀ ନିଜ ସମକକ୍ଷ ଜର୍ଜିଆ ମେଲୋନୀଙ୍କୁ ସାକ୍ଷାତ କରିଛନ୍ତି । ଦୁଇ ନେତା ପରସ୍ପରକକୁ ନମସ୍କାର କରି ଅଭିବାଦନ ଜଣାଇଛନ୍ତି । ପ୍ରଧାନମନ୍ତ୍ରୀ ମୋଦୀ ଇଟାଲୀରେ ବିଶ୍ବର ବହୁ ବଡ଼ ବଡ଼ ନେତାଙ୍କ ସହ ସାକ୍ଷାତ ଆଲୋଚନା କରିଛନ୍ତି । ଆଜି ପିଏମ ମୋଦୀ ପିଏମ୍ ମୋଦୀ ମଞ୍ଚରେ ଜର୍ଜିଆ ମେଲୋନୀଙ୍କ ସହ କିଛି ସମୟ ଯାଏ ହସି ହସି କଥା ହେବା ସହ ଦୁଇ ନେତା କିଛି ଫଟୋ ମଧ୍ୟ ଉଠାଇଛନ୍ତି ।
ପ୍ରଧାନମନ୍ତ୍ରୀ ମୋଦୀ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନଙ୍କ ସହ ଦ୍ବିପାକ୍ଷିକ ଆଲୋଚନା କରି ପ୍ରତିରକ୍ଷା, ପରମାଣୁ ଏବଂ ମହାକାଶ ସହ ସାମରିକ ବୁଝାମଣାକୁ ଅଧିକ ମଜଭୁତ କରିବା ଉପରେ ଚର୍ଚ୍ଚା କରିଛନ୍ତି । ଦୁଇ ନେତା ପ୍ରମୁଖ ବୈଶ୍ବିକ ଏବଂ କ୍ଷେତ୍ରୀୟ ପ୍ରସଙ୍ଗରେ ବିଚାର-ବିମର୍ଶ କରିଛନ୍ତି । ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କୁ ମଧ୍ୟ ଭେଟିଛନ୍ତି । ଏହି ଆଲୋଚନା ବେଳେ ପ୍ରଧାନମନ୍ତ୍ରୀ କହିଛନ୍ତି ଯେ, ଭାରତ ମାନବ-କେନ୍ଦ୍ରୀତ ଦୃଷ୍ଟିକୋଣରେ ବିଶ୍ବାସ କରେ ଏବଂ ଶାନ୍ତିର ମାର୍ଗ ‘ଆଲୋଚନା ଏବଂ କୂଟନୀତି’ ଦେଇ ଯାଇଥାଏ ।
ଇଟାଲୀର ଅପୁଲିଆ କ୍ଷେତ୍ରରେ ଜି-7 ଶିଖର ସମ୍ମିଳନୀ ସମୟରେ ଜେଲେନସ୍କିଙ୍କୁ ଭେଟିଛନ୍ତି ମୋଦୀ । ପ୍ରଧାନମନ୍ତ୍ରୀ ମୋଦୀ ଜେଲେନସ୍କିଙ୍କ ସହ ବୈଠକରୁ ଏକ ବଡ଼ ଉପଯୋଗୀ ବୋଲି କହିବା ସହ ଭାରତ, ୟୁକ୍ରେନ ସହ ଦ୍ବିପାକ୍ଷିକ ସମ୍ପର୍କକୁ ଅଧିକ ମଜଭୁତ ପାଇଁ ଉତ୍ସୁକ ବୋଲି କହିଛନ୍ତି । ସେପଟେ ପ୍ରଧାନମନ୍ତ୍ରୀ ଭାଟିକାନ୍ର ପୋପ୍ ପ୍ରାନ୍ସିସ୍ଙ୍କୁ ସାକ୍ଷାତ କରିଛନ୍ତି । ଏହା ସହ ତାଙ୍କୁ ଭାରତ ଆସିବାକୁ ନିମନ୍ତ୍ରଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ।