ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଟେଲିଫୋନ ଯୋଗେ ଟେସଲା ଓ ସ୍ପେସଏକ୍ସର ମାଲିକ ଏଲନ ମସ୍କଙ୍କ ସହ କଥା ହୋଇଛନ୍ତି। ବୈଷୟିକ ଜ୍ଞାନ ଓ ଉଦ୍ଭାବନ କ୍ଷେତ୍ରରେ ଭାରତ ଏବଂ ଆମେରିକା ମଧ୍ୟରେ ସହଯୋଗକୁ ସୁଦୃଢ଼ କରିବାକୁ ପାରସ୍ପରିକ ଆଗ୍ରହ ରହିଛି ବୋଲି ମୋଦୀ କହିଛନ୍ତି। ଗୋଟିଏ ପଟେ ଭାରତୀୟ ଇଲେକ୍ଟ୍ରିକ୍ ଯାନ ବଜାରରେ ପ୍ରବେଶ କରିବା ପାଇଁ ଟେସଲା ସୁଯୋଗ ଖୋଜୁଥିବା ବେଳେ ମୋଦୀଙ୍କ ଆଲୋଚନା ଆଗକୁ ଫଳପ୍ରଦ ହୋଇପାରେ ବୋଲି ଅନୁମାନ କରାଯାଉଛି।
ଚଳିତ ବର୍ଷ ୱାଶିଂଟନ ଡିସିରେ ହୋଇଥିବା ପୂର୍ବ ବୈଠକକୁ ଆଧାର କରି ମସ୍କଙ୍କ ଓ ମୋଦୀଙ୍କ ମଧ୍ୟରେ ବିଭିନ୍ନ ବିଷୟରେ ଆଲୋଚନା ହୋଇଥିଲା। ଭାରତର ଦ୍ରୁତ ଗତିରେ ବିକଶିତ ହେଉଥିବା ଟେକ୍ ଇକୋସିଷ୍ଟମ ଏବଂ ମସ୍କଙ୍କ ଉଦ୍ୟମରେ ହେଉଥିବା କଟିଂ ଏଜ୍ ଇନୋବେସନ ଉପରେ ଆଲୋକପାତ କରାଯାଇଥିଲା।
ଆଲୋଚନା ଉପରେ ସବିଶେଷ ସୂଚନା ଦେଇ ମୋଦୀ ଏକ୍ସରେ ପୋଷ୍ଟ କରି ଲେଖିଛନ୍ତି “ଏଲନ ମସ୍କଙ୍କ ସହ କଥା ହୋଇ ବିଭିନ୍ନ ପ୍ରସଙ୍ଗ ବିଷୟରେ ଆଲୋଚନା କଲି, ଚଳିତ ବର୍ଷ ଆରମ୍ଭରେ ୱାଶିଂଟନ ଡିସିରେ ଆମର ବୈଠକ ସମୟରେ ଆମ ଆଲୋଚିତ ପ୍ରସଙ୍ଗ ଉପରେ ମଧ୍ୟ ଆଲୋଚନା କରିଛୁ। ପ୍ରଯୁକ୍ତିବିଦ୍ୟା ଏବଂ ନବସୃଜନ କ୍ଷେତ୍ରରେ ସହଯୋଗର ଅପାର ସମ୍ଭାବନା ଉପରେ ଆଲୋଚନା କଲୁ। ଭାରତ ଏହି କ୍ଷେତ୍ରଗୁଡ଼ିକରେ ଆମେରିକା ସହିତ ଆମର ସହଭାଗୀତାକୁ ଆଗକୁ ବଢ଼ାଇବା ପାଇଁ ପ୍ରତିବଦ୍ଧ।”
ଚଳିତ ବର୍ଷ ଫେବୃଆରୀରେ ପ୍ରଧାନମନ୍ତ୍ରୀ ମୋଦୀ ଦୁଇ ଦିନିଆ ଆମେରିକା ଗସ୍ତ ସମୟରେ ଏଲନ ମସ୍କଙ୍କୁ ଭେଟିଥିଲେ। ମସ୍କଙ୍କ ସମେତ ତାଙ୍କର ୩ ସନ୍ତାନ - ଏକ୍ସ, ଷ୍ଟ୍ରାଇଡର ଏବଂ ଆଜ୍ୟୁର ମଧ୍ୟ ଏହି ସମ୍ମିଳନିରେ ଉପସ୍ଥିତ ଥିଲେ। ସାକ୍ଷାତ ସମୟରେ ଏଲନ ମସ୍କ ପ୍ରଧାନମନ୍ତ୍ରୀ ମୋଦୀଙ୍କୁ ଏକ ଷ୍ଟାରସିପ୍ ହେକ୍ସାଗୋନାଲ୍ ହିଟ୍ସିଲ୍ଡ ଟାଇଲ୍ ଉପହାର ମଧ୍ୟ ଦେଇଥିଲେ।
ଟେସଲା ଭାରତରେ ଏଣ୍ଟ୍ରି ମାରିବା ଅପେକ୍ଷାରେ ରହିଛି। ଆସନ୍ତା କିଛି ମାସ ମଧ୍ୟରେ ଟେସ୍ଲା ଆମେରିକାରୁ କେତେ ହଜାର କାର୍ ଆମଦାନୀ କରି ଭାରତରେ ନିଜ ଆଉଟଲେଟ ପ୍ରତିଷ୍ଟା କରିବା ଦିଗରେ କାମ କରୁଛି। ବ୍ଲୁମବର୍ଗର ରିପୋର୍ଟ ଅନୁସାରେ, ଚଳିତ ବର୍ଷର ତୃତୀୟ ତ୍ରୈମାସିକ ସୁଦ୍ଧା ମୁମ୍ବାଇ, ଦିଲ୍ଲୀ ଏବଂ ବାଙ୍ଗାଲୋରରେ କମ୍ପାନୀ କାର ବିକ୍ରୟ ଆରମ୍ଭ କରିବାକୁ ଯୋଜନା କରୁଛି। ଏନେଇ କମ୍ପାନି ଭାରତରେ ଶୋ-ରୁମ ଓ କାରର ଡେଲିଭରି ପାଇଁ ନିଯୁକ୍ତି ଦେବା ଆରମ୍ଭ କରିଦେଇଛି।
