ନୂଆଦିଲ୍ଲୀ,୧୯।୪: ଆଫ୍ରିକୀୟ ଦେଶ କଙ୍ଗୋର ବୋଟ୍ ବିସ୍ଫୋରଣ ମାମଲାରେ ମୃତ୍ୟୁ ସଂଖ୍ୟା ୧୫୦କୁ ବୃଦ୍ଧି ପାଇଛି। ଏପର୍ଯ୍ୟନ୍ତ ଅନେକ ନିଖୋଜ ମଧ୍ୟ ଅଛନ୍ତି। ସ୍ଥାନୀୟ ଅଧିକାରୀଙ୍କ କହିବା ଅନୁସାରେ, ଏହି ଅଘଟଣ ରାଜଧାନୀ ମମ୍ବଡାକା ନିକଟସ୍ଥ ରୁକି ଓ କଙ୍ଗୋ ନଦୀରେ ମଙ୍ଗଳବାର ଘଟିଥିଲା। ତାହା ହେଉଛି ଦୁନିର ସବୁଠାରୁ ଗଭୀର ନଦୀ। ବୋଟ୍ରେ ଧାର୍ଯ୍ୟ ସୀମାଠାରୁ ଅଧିକ ଲୋକ ଯାତ୍ରା କରୁଥିଲେ। ହେଲେ ହଠାତ୍ ବିସ୍ଫୋରଣ ପରେ ବୋଟ୍ରେ ନିଆଁ ଲାଗିଯାଇଥିଲା। ଯାତ୍ରୀ ଭୟଭୀତ ହୋଇ ପଳାଇବାକୁ ଚେଷ୍ଟା କରିବା ସମୟରେ ତାହା ଓଲଟି ଯାଇଥିଲା।
ଯାଞ୍ଚ ପାଇଁ ପହଁଞ୍ଚିଥିବା ପ୍ରତିନିଧି ମଣ୍ଡଳୀର ମୁଖ୍ୟ ଜୋସେଫିକ୍ ଲୋକୁମ୍ଙ୍କ କହିବା ଅନୁସାରେ, ଏହି ଘଟଣା ପରେ ନିଖୋଜ ଲୋକଙ୍କର ତଲାସୀ ଜାରି ରହିଛି। ଆମେ ବୁଧବାର ୧୩୧ ଟି ମୃତଦେହ ଉଦ୍ଧାର କରିଛୁ। ସେଭଳି ଗୁରୁବାର ଓ ଶୁକ୍ରବାର ୧୨ଟି ମୃତଦେହ ମିଳିଛି। ଏହି ମୃତଦେହ ଭିତରେ ଅନେକଙ୍କର ସ୍ଥିତି ଖୁବ୍ ଖରାପ ହୋଇଯାଇଛି। ଦୁର୍ଘଟଣା ସମୟରେ ବୋଟ୍ରେ ୪୦୦ ରୁ ଅଧିକ ଯାତ୍ରୀ ଥିଲେ।
ଘଟଣା ସମ୍ପର୍କରେ ସୂଚନା ଦେଇ ଲୋକୁମ୍ କହିଛନ୍ତି ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ, ଜଣେ ମହିଳା ବୋଟ୍ରେ ରୋଷେଇ କରିବା ବେଳେ ନିଆଁ ଲାଗିଯାଇଥିଲା। କାରଣ ବୋଟ୍ରେ ଜ୍ବଳନଶୀଳ ଇନ୍ଧନ ରଖାଯାଇଥିଲା। ଏହା ସଂସ୍ପର୍ଶରେ ଆସିବା ମାତ୍ରେ ଜୋରଦାର ବିସ୍ଫୋରଣ ହୋଇଥିଲା। ଫଳରେ ବୋଟ୍ରେ ଥିବା ଯାତ୍ରୀଙ୍କର ମୃତ୍ୟୁ ହୋଇଥିଲା।
