ନୂଆଦିଲ୍ଲୀ: ୟେମେନର ରାସ୍ ଇସା ତୈଳ ବନ୍ଦର ଉପରେ ଆମେରିକା ଏୟାର ଷ୍ଟ୍ରାଇକ୍ କରିଛି। ଏହି ଆକ୍ରମଣରେ ଅତି କମରେ ୭୪ ଜଣଙ୍କର ମୃତ୍ୟୁ ହୋଇଛି ଏବଂ ୧୭୧ ଜଣ ଆହତ ହୋଇଛନ୍ତି। ୟେମେନରେ ସକ୍ରିୟ ହୁଥି ବିଦ୍ରୋହୀ ମାନେ ଏହି ସୂଚନା ଦେଇଛନ୍ତି। କୁହାଯାଉଛି କି, ଗୁରୁବାର ବିଳମ୍ବିତ ରାତିରେ ଲୋକମାନେ ବନ୍ଦରରେ କାମ କରୁଥିବା ସମୟରେ ଏହି ଆକ୍ରମଣ କରାଯାଇଥିଲା।

ଆମେରିକା ସେନାର ସେଣ୍ଟ୍ରାଲ କମାଣ୍ଡ (CENTCOM) ଏହି ଆକ୍ରମଣକୁ ନିଶ୍ଚିତ କରିଛି ଏବଂ କହିଛି ଯେ, ଏହାର ଲକ୍ଷ୍ୟ ହୁଥି ବିଦ୍ରୋହୀଙ୍କ ଇନ୍ଧନ ଏବଂ ଆର୍ଥିକ ସମ୍ବଳକୁ ଦୁର୍ବଳ କରିବା। ଅଲ-ଜଜିରା ରିପୋର୍ଟ ଅନୁଯାୟୀ, ଆକ୍ରମଣରେ ବନ୍ଦର ଏବଂ ଏହାର ଆଖପାଖ ଅଞ୍ଚଳ ଗୁଡ଼ିକୁ ବିଶେଷ ଭାବରେ ଟାର୍ଗେଟ କରାଯାଇଥିଲା। ବନ୍ଦର କର୍ମଚାରୀ ଏବଂ ଟ୍ରକ୍ ଡ୍ରାଇଭର ମାନେ ମଧ୍ୟ ଆକ୍ରମଣର ଶିକାର ହୋଇଛନ୍ତି।

ସୂଚନାଥାଉକି, ରାସ୍ ଇସା ବନ୍ଦର ୟେମେନର ଅର୍ଥନୀତି ଏବଂ ମାନବିକ ସହାୟତା ଯୋଗାଣ ପାଇଁ ଗୁରୁତ୍ୱପୂର୍ଣ୍ଣ । ଦେଶର ଆମଦାନୀର ୭୦ ପ୍ରତିଶତରୁ ଅଧିକ ଏବଂ ମାନବିକ ସହାୟତାର ୮୦ ପ୍ରତିଶତ ସେଠାରୁ ଆସେ । ଆକ୍ରମଣ ପରେ ଅଞ୍ଚଳରେ ବ୍ୟାପକ ବିରୋଧ ପ୍ରଦର୍ଶନ କରାଯାଇଛି।

ତେବେ ଆକ୍ରମଣ ପରର ଏକ ଭିଡିଓରେ ଜଳୁଥିବା ଟ୍ରକ୍, ଭଗ୍ନାବଶେଷ ଏବଂ ସାଧାରଣ ଲୋକଙ୍କ ମୃତଦେହ ଦୃଶ୍ୟମାନ ହେଉଛି। ରିପୋର୍ଟ ଅନୁସାରେ, ଆକ୍ରମଣରେ ଅନେକ ବନ୍ଦର କର୍ମଚାରୀ ଆହତ ହୋଇଛନ୍ତି।