ନୂଆଦିଲ୍ଲୀ ୩୧/୦୫: ଲୋକସଭା ନିର୍ବାଚନର ୬ଟି ପର୍ଯ୍ୟାୟ ପାଇଁ ମତଦାନ ଶେଷ ହୋଇଯାଇଛି । ସପ୍ତମ ତଥା ଅନ୍ତିମ ପର୍ଯ୍ୟାୟ ନିମନ୍ତେ ଆସନ୍ତା ମାସ ୧ ତାରିଖ (ଶନିବାର)ରେ ଭୋଟ ପଡ଼ିବ । ଏଥିଲାଗି ଗୁରୁବାର ପ୍ରଚାରର ଶେଷ ଦିନ ଥିଲା । ବିଭିନ୍ନ ଦଳ ନିର୍ଣ୍ଣାୟକ ଲଢ଼େଇ ପାଇଁ ପ୍ରାଣମୂର୍ଚ୍ଛା ପ୍ରଚାର କରିଥିଲେ । ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କଂଗ୍ରେସ ନେତା ରାହୁଲ ଗାନ୍ଧୀ ନିର୍ବାଚନୀ ସଭା କରିଥିଲେ । ଶେଷ ପର୍ଯ୍ୟାୟରେ କେନ୍ଦ୍ରଶାସିତ ଅଞ୍ଚଳ ଚଣ୍ଡିଗଡ଼ ଏବଂ ୭ଟି ରାଜ୍ୟର ମୋଟ ୫୭ ଲୋକସଭା ଆସନରେ ମତଦାନ ହେବ । ସପ୍ତମ ପର୍ଯ୍ୟାୟ ନିର୍ବାଚନରେ ମୋଟ ୯୦୪ ପ୍ରାର୍ଥୀ ନିଜ ଭାଗ୍ୟ ପରୀକ୍ଷା କରାଉଛନ୍ତି ।
ପ୍ରଧାନମନ୍ତ୍ରୀ ମୋଦି, କଙ୍ଗନା ରାଣାୱତ, ରବିଶଙ୍କର ପ୍ରସାଦ, କେନ୍ଦ୍ରମନ୍ତ୍ରୀ ଅନୁରାଗ ସିଂହ ଠାକୁର, ଟିଏମ୍ସି ନେତା ଅଭିଷେକ ବାନାର୍ଜୀ, ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନି ଏବଂ ଭୋଜପୁରୀ ଅଭିନେତା ପୱନ ସିଂହଙ୍କର ଭାଗ୍ୟ ପରୀକ୍ଷା ହେବ । ଏହି ପର୍ଯ୍ୟାୟରେ ଉତ୍ତର ପ୍ରଦେଶ ଓ ପଞ୍ଜାବର ୧୩ ଲେଖାଏଁ ଆସନରେ ମତଦାନ ହେବାକୁ ଯାଉଛି । ସେହିଭଳି ପଶ୍ଚିମବଙ୍ଗର ୯, ବିହାରର ୮, ଓଡ଼ିଶାର ୬, ହିମାଚଳ ପ୍ରଦେଶର ୪ ଓ ଝାଡ଼ଖଣ୍ଡର ୩ଟି ଆସନରେ ଭୋଟିଂ ହେବ । ଏହାବ୍ୟତୀତ କେନ୍ଦ୍ରଶାସିତ ଅଞ୍ଚଳ ଚଣ୍ଡିଗଡ଼ର ଏକମାତ୍ର ଲୋକସଭା ଆସନରେ ବି ମତଦାନ ହେବ । ଏହି ପର୍ଯ୍ୟାୟରେ ଲଢ଼ୁଥିବା ୯୦୪ ପ୍ରାର୍ଥୀଙ୍କ ମଧ୍ୟରେ ୨୯୯ କୋଟିପତି ଥିବା ବେଳେ ୧୯୯ ଦାଗୀ ନେତା ଅଛନ୍ତି । ସେହିଭଳି ୧୧% ମହିଳା ପ୍ରାର୍ଥୀ ରହିଛନ୍ତି ।
୨୦୧୯ରେ ଏହି ୫୭ ଆସନ ମଧ୍ୟରୁ ବିଜେପି ଏକାକୀ ୨୫ ଆସନ ଜିତିଥିଲା । ସେହିଭଳି ଟିଏମ୍ସି ଖାତାକୁ ୮ଟି ଯାଇଥିଲା ବେଳେ କଂଗ୍ରେସକୁ ୭ଟି ମିଳିଥିଲା । ଗତ ନିର୍ବାଚନରେ ଏହି ୫୭ ଆସନରେ ମୋଟ ୬୫.୨୯% ମତଦାନ ହୋଇଥିଲା । ପଶ୍ଚିମବଙ୍ଗରେ ସର୍ବାଧିକ ୭୮.୮୦% ଏବଂ ବିହାରରେ ସର୍ବନିମ୍ନ ୫୧.୩୪% ଭୋଟିଂ ହୋଇଥିଲା । ବାରାଣସୀ (ୟୁପି), ପାଟନା ସାହିବ(ବିହାର), ମଣ୍ଡି (ହିମାଚଳ ପ୍ରଦେଶ), ହମିରପୁର (ହିମାଚଳ ପ୍ରଦେଶ), ଡାଏମଣ୍ଡ ହାର୍ବର (ପଶ୍ଚିମବଙ୍ଗ) ଆସନ ଉପରେ ଦେଶବାସୀଙ୍କ ନଜର ରହିବ ।ଏହି ଆସନଗୁଡ଼ିକରେ ଯଥାକ୍ରମେ ମୋଦି, ରବିଶଙ୍କର ପ୍ରସାଦ, କଙ୍ଗନା ରାଣାୱତ, ଅନୁରାଗ ସିଂହ ଠାକୁର ଓ ଅଭିଷେକ ବାନାର୍ଜୀ ଲଢ଼ୁଛନ୍ତି ।