ବେଲବାହାଳି, ୧୩/୭: ଦିନଦ୍ୱିପହରେ ଦମ୍ପତ୍ତିଙ୍କଠୁ ଲୁଟ୍ । ଘସିପୁରା ଥାନା ଜାତୀୟ ରାଜପଥ ୨୦ନଂ ଜାତୀୟ ରାଜପଥ ବେଲବାହାଳି ବାଇପାସ୍ ନିକଟରେ ଗୁଳି ଫୁଟାଇ ଦମ୍ପତିଙ୍କ ନିକଟରୁ ଲୁଟ୍ କରିଛନ୍ତି ୩ ଜଣ ଦୁର୍ବୃତ୍ତ । ଖବର ପାଇ ଘସିପୁରା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ସୂଚନା ଅନୁଯାୟୀ, ଯାଜପୁର ଜିଲ୍ଲା କୋରେଇ ଥାନା ଜଳନ୍ଦା ଗାଁର ଦିଲ୍ଲୀପ ବାରିକ ନିଜ ପତ୍ନୀ ଓ ଝିଅକୁ ନେଇ ଭାଣିଜୀ ବାହାଘର ପାଇଁ କେନ୍ଦୁଝର ଜିଲ୍ଲା ମଲିପଶି ଗାଁକୁ ଯାଇଥିଲେ । ବାହାଘର ସାରି ନିଜ ଘରକୁ ଫେରୁଥିବା ବେଳେ ବେଲବାହାଳି ବାରି ଗାଁ ନିକଟରେ ଏକ ବାଇକରେ ୩ ଜଣ ଦୁର୍ବୃତ୍ତ ସେମାନଙ୍କୁ ପଛ କରିବା ସହିତ ଅଟକ ରଖି ଭୁଜାଲି ଦେଖାଇବା ସହିତ ବନ୍ଧୁକ ଖୋଲି ୩ ରାଉଣ୍ଡ ଫାଇରିଙ୍ଗ କରିଥିଲେ । ସେଠାରେ ସ୍ଥାନୀୟ ଲୋକ ପହଞ୍ଚି ଯିବାରୁ ମହିଳାଙ୍କ କାନଫୁଲ ନେଇ ଦୁର୍ବୃତ୍ତମାନେ ଫେରାର ହୋଇଯାଇଥିଲେ ।
ଘଟଣାପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଥିବା ବେଳେ ପାରିପାର୍ଶ୍ଵିକ ସ୍ଥିତିକୁ ନେଇ ତଦନ୍ତ ଆରମ୍ଭ କରିଛି ପୋଲିସ । ଆନନ୍ଦପୁର ଅଞ୍ଚଳରେ ପ୍ରତ୍ୟେକ ଦିନ ଏଭଳି ଅନେକ ସମୟରେ ଗୁଳି ଫୁଟାଇ ହାତ ହତିଆର ଦେଖାଇ ଲକ୍ଷାଧିକ ଟଙ୍କା ସହ ସୁନାଗହଣା ଚୋରି ହେଉଛି ।କିନ୍ତୁ, କୌଣସି ଚୋରି ଘଟଣାରେ ପୋଲିସ ଚୋରକୁ ଧରିବାରେ ବିଫଳ ହେଉଥିବା ଦେଖିବାକୁ ମିଳିଛି । ଶନିବାର ଦିନ ଦ୍ୱିପହରେ ରାସ୍ତା ମଝିରେ ବନ୍ଧୁକ ଓ ଭୁଜାଲି ଦେଖାଇ ୩ ରାଉଣ୍ଡ ଗୁଳି ଫୁଟାଇ ସୁନା ଗହଣା ଝାମ୍ପି ନେଇଯାଇଛନ୍ତି । ତେବେ ଚୋରଙ୍କୁ ତୁରନ୍ତ ଧରିବାକୁ ସାଧାରଣରେ ଦାବି ହେଉଛି ।