ଭୁବନେଶ୍ୱର/ଢେଙ୍କାନାଳ/ପରଜଙ୍ଗ,୨୪/୦୯: ପୂରା ବିଚଳିତ କଲାଭଳି ଦୃଶ୍ୟ ଯାତ୍ରା ପେଣ୍ଡାଲ୍ରେ । ଆଇଟମ୍ ଡ୍ୟାନ୍ସ ନାଁରେ ନଗ୍ନ ନାଚ । ଖୋଲା ମଞ୍ଚରେ ଦର୍ଶକଙ୍କ ଆଗରେ ଅଙ୍ଗ ପ୍ରଦର୍ଶନ । କିଏ ‘ଟିପିଟିପି ବର୍ଷା ପାନି’ରେ ଉଲଗ୍ନ ହେଲାଣି ତ କିଏ ‘ଭିଗି ଜାନେସେ’ରେ ଅଙ୍ଗ ଦେଖାଇ ଅଶ୍ଲୀଳତାର ପ୍ରଦର୍ଶନ କଲାଣି । ପୁଲିସ୍, ଦର୍ଶକ,ସାମାଜିକକର୍ମୀ ସମସ୍ତଙ୍କ ଆଗରେ ଏହିଭଳି ବେଆଇନ୍ ତଥା କଦର୍ଯ୍ୟ କାର୍ଯ୍ୟ ଅଭିନୀତ ହେଉଛି । ନା’ ଆଇନ୍ ରକ୍ଷକ ଏହାର ପ୍ରତିବାଦ କରୁଛନ୍ତି ନା’ ଦର୍ଶକ ମହଲରେ ସ୍ୱର ଉଠୁଛି ।
ମୁକ୍ତ ମଞ୍ଚରେ ଜାଣିଶୁଣି ଜନସାଧାରଣଙ୍କ ସମ୍ମୁଖରେ ଦେହ ପ୍ରଦର୍ଶନ ଭାରତୀୟ ନ୍ୟାୟ ସଂହିତାରେ ଧର୍ତ୍ତବ୍ୟ ଅପରାଧ । କିନ୍ତୁ କେହି ମାନୁନାହାନ୍ତି । ବରଂ ପ୍ରତିଯୋଗିତା ଆରମ୍ଭ ହୋଇଛି, ଏମିତି କରି କିଏ କେତେ ଚର୍ଚ୍ଚାରେ ରହୁଛି । ବର୍ତ୍ତମାନ ଓଡ଼ିଶା ଯାତ୍ରା ଜଗତରେ ଏବେ ୨-୩ ଜଣ ଆଇଟମ୍ ଗାର୍ଲଙ୍କ ଭିତରେ ଏହି ପ୍ରତିଯୋଗିତା ଆରମ୍ଭ ହୋଇଛି । ରାତି ରାତି ନାଁ କମେଇବା ପାଇଁ ଅଙ୍ଗ ପ୍ରଦର୍ଶନୀକୁ ସାହାର କରିଛନ୍ତି ଏହି ଆଇଟମ୍ ଗାର୍ଲମାନେ ।
ଏସବୁ ପାଇଁ କିଏ ଅନୁମତି ଦେଉଛି, ବାସ୍ତବରେ ଏହା ଉପରେ କଟକଣା ଅଛି କି ନାହିଁ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ସାମାଜିକ କଳା ପରିବେଷଣ ସ୍ଥାନରେ ଏହିଭଳି କଳାକାରନାମା ସବୁ ଦେଖିବାକୁ ମିଳୁଛି । ଯାହା ବର୍ଷର ବର୍ଷର ବହୁ ପ୍ରାଚୀନ ଓଡ଼ିଆ ଯାତ୍ରା ପରମ୍ପରାକୁ ନଷ୍ଟ କରୁଛି । କଳଙ୍କର ଛିଟା ବୋଳୁଛି । ଓଡ଼ିଆ ଅସ୍ମିତାକୁ ଦଳି ପକାଇଛି ।
ଦୁଇ ଦିନ ତଳେ ଢେଙ୍କାନାଳ ଜିଲ୍ଲାର ପରଜଙ୍ଗ ଅଞ୍ଚଳରେ ଏକ ପ୍ରତିଷ୍ଠିତ ଯାତ୍ରା ଅନୁଷ୍ଠାନ ଯାତ୍ରା କରୁଥିଲା । ସେଠାକୁ ଜଣେ ନିମନ୍ତ୍ରିତ ଅତିଥି କଳାକାର ଆସିଥିଲେ, ଯିଏ ଦର୍ଶକଙ୍କ ମନୋରଞ୍ଜନ କରିବାକୁ ଯାଇ ସବୁ ସୀମା ଟପି ଯାଇଥିଲେ । ଖୋଲା ମଞ୍ଚରେ ଅଙ୍ଗ ପ୍ରଦର୍ଶନ କରିଥିଲେ । ଯାହାଙ୍କ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି । ଗତ ୧୮ ତାରିଖରେ ମେଲୋଡିରେ ଜଣେ ଆଇଟମ୍ ଗାର୍ଲଙ୍କୁ ନୃତ୍ୟ ପରିବେଷଣ କରିବାକୁ ଯାତ୍ରା କମିଟି ପକ୍ଷରୁ ଡକା ଯାଇଥିଲା । ରାତି ହାଉସ୍ଫୁଲ୍ ହେବା ପରେ ପୁଣି ୨୦ ତାରିଖରେ ତାଙ୍କୁ ନିମନ୍ତ୍ରଣ କରାଯାଇଥିଲା । କିନ୍ତୁ ୨୦ ରାତିରେ ସେ ଯାହା କଲେ, ତାହା ଯାତ୍ରାକୁ ନିନ୍ଦିତ ସହ ବଦନାମ କରିଛି । ଦୁର୍ଭାଗ୍ୟର ବିଷୟ³ ଏଯାଏ ଏନେଇ ଥାନାରେ କୌଣସି ମାମଲା ହୋଇନାହିଁ । ମାତ୍ର ବୟସ୍କ, ମହିଳା ଓ ଛୋଟପିଲାଙ୍କ ଉପସ୍ଥିତିରେ ଏପରି ନୃତ୍ୟକୁ ସାମାଜିକ ଗଣମାଧ୍ୟମରେ ଦୃଢ଼ ନିନ୍ଦା କରାଯାଇଛି । କିନ୍ତୁ କିଛି ଉତ୍ପାତିଆ ଯୁବ ଦର୍ଶକ ଉତ୍ସାହିତ ହୋଇ ଆଇଟମ୍ ଗାର୍ଲଙ୍କୁ ୫ ଶହ ଟଙ୍କିଆ ନୋଟ୍ ବଢ଼ାଇବା ଲଜ୍ଜିତ କରିଛି ।
ସେହିପରି ଅନ୍ୟ ଏକ ସ୍ଥାନରେ ଆଉ ଚର୍ଚ୍ଚିତ ଜଣେ ଆଇଟମ୍ ଗାର୍ଲ ବି ଖୋଲାଖୋଲି ଭାବରେ ଅଙ୍ଗ ପ୍ରଦର୍ଶନ କରି ଭାଇରାଲ୍ ହୋଇଛନ୍ତି । କିନ୍ତୁ ଏନେଇ ତାଙ୍କର କୌଣସି ପରୱା ନାହିଁ । କାରଣ ସେ ଯାତ୍ରାରେ ପ୍ରବେଶ ଦିନରୁ ହିଁ ଏହା କରିଆସୁଛନ୍ତି । ଏହା କୁଆଡ଼େ ତାଙ୍କୁ ନାଁ ଓ ପରିଚୟ ଦେଇଛି । ଯାହାଙ୍କ ଉପରେ ପ୍ରଶାସନ, ପୁଲିସ୍, ଯାତ୍ରା କମିଟି ବା ମହାସଂଘ କିମ୍ବା ସରକାରଙ୍କ ପକ୍ଷରୁ କୌଣସି କଟକଣା ନାହିଁ । କିଛି ଯାତ୍ରା କମିଟି ତାଙ୍କୁ ନେବାକୁ ବ୍ୟାକୁଳ ହୋଇପଡ଼ୁଥିବାବେଳେ ସେ କାହିଁକି ଆସିଲେ ନାହିଁ ବୋଲି ରବିବାର ରାତିରେ ଖୋର୍ଦ୍ଧା ଜିଲ୍ଲା ନିରାକାରପୁର ଅଞ୍ଚଳରେ ଦର୍ଶକ ମଞ୍ଚକୁ ଚେୟାର ଫିଙ୍ଗି ନାଟକ ବନ୍ଦ କରିଥିଲେ । କିଛି ଦିନ ତଳେ ଉକ୍ତ ଆଇଟମ୍ ଗାର୍ଲଙ୍କୁ ମଞ୍ଚରେ ବିରୋଧ ହୋଇଥିଲା ।
ଏ ସମ୍ପର୍କରେ ନାଟ୍ୟକାର ତଥା ନିର୍ଦ୍ଦେଶକ ଦିନେଶ ଦାସ କହିଛନ୍ତି, ଏଥିପାଇଁ କୌଣସି ନୀତିନିୟମ ନାହିଁ । ଦଣ୍ଡବିଧାନ ନ ଥିଲେ କେହି କେବେ ଶୃଙ୍ଖଳିତ ହୋଇପାରେ ନାହିଁ । ଯେ ପର୍ଯ୍ୟନ୍ତ ଯାତ୍ରା ପାଇଁ ନୀତି ଆସିନାହିଁ, ସେପର୍ଯ୍ୟନ୍ତ ଏହିପରି କାର୍ଯ୍ୟକଳାପ ଜାରି ରହିବ । ଯାହା ନାଟକ ଓ ଯାତ୍ରାର ମହାନତାକୁ ନଷ୍ଟ କରି ଚାଲିଥିବ ।
ନିର୍ଦ୍ଦେଶକ ବାପୁ ଓଝା କହିଛନ୍ତି, ଜଣେ ମହିଳା ରାତିରେ ବୁଲିପାରିବନି କିନ୍ତୁ ଯାତ୍ରା ମଞ୍ଚରେ ସର୍ବସମ୍ମୁଖରେ ଫୁଙ୍ଗୁଳା ଦେହ ଦେଖାଇ ପାରିବ । ଏହା କାହା ଆଖିକୁ ଦେଖାଯାଉନି । ଯିଏ ଅନୁମତି ଦେଉଛନ୍ତି ସେ କ’ଣ ଏହା ଦେଖିବା ଏବଂ ଦର୍ଶକଙ୍କୁ ଦେଖାଇବା ଲାଗି ଅନୁମତି ଦେଉଛନ୍ତି? ଏ ଘଟଣାରେ ନାଚିଲା, ନଚେଇଲା ଆଉ ନାଚକୁ ପ୍ରୋତ୍ସାହିତ ତଥା ଅନୁମତି ଦେଉଥିଲାବାଲା ଉପରେ ଦୃଢ଼ କାର୍ଯ୍ୟାନୁଷ୍ଠାନ ଜରୁରି ।
ଅନ୍ୟପକ୍ଷରେ କିନ୍ତୁ ଏ ଘଟଣାରେ ନିରବ ରହିବା ସହ ଆମେ ନୁହେଁ, ଯାତ୍ରା କମିଟି ଅତିଥି କଳାକାରଙ୍କୁ ନିମନ୍ତ୍ରଣ କରୁଥିବା କହି ଖସି ଯାଉଛନ୍ତି ଯାତ୍ରା ଅନୁଷ୍ଠାନ । କାରଣ ଏହା ସେମାନଙ୍କୁ ଅଧିକ ଟିକଟ ସେଲ୍ ଓ ଅର୍ଥ ରୋଜଗାରର ସୁଯୋଗ ଦେଉଛି । ଯାହାକୁ କେହି ଅଗ୍ରାହ୍ୟ କରିପାରିବେ ନାହିଁ । ମାତ୍ର ପ୍ରଶ୍ନ ଏଭଳି କଦର୍ଯ୍ୟ ନାଚ କେବେ ବନ୍ଦ ହେବ? ଯଦି ସରକାର ସୋସିଆଲ୍ ମିଡିଆ ପାଇଁ ଆଇନ୍ ଆଣିଲେ, ପର୍ଣ୍ଣୋଗ୍ରାଫି ଭିଡିଓ ଉପରେ କଟକଣା ଲଗାଇଲେ । ରୁଦ୍ଧ ଦ୍ୱାରା ବାର୍ରେ ନାଚ ବନ୍ଦ କଲେ ତାହାଲେ ଖୋଲା ଯାତ୍ରା ମଞ୍ଚରେ ଶହ ଶହ ଦର୍ଶକଙ୍କ ସାମ୍ନାରେ ନଗ୍ନ ନାଚ ଉପରେ କେବେ ଅଙ୍କୁଶ ଲଗାଇବେ?
