କଲମ୍ବୋ,୦୨/୦୮: ଶୁକ୍ରବାର ଘରୋଇ ଶ୍ରୀଲଙ୍କା ଓ ଭାରତ ମଧ୍ୟରେ ପ୍ରଥମ ଦିନିକିଆ ଖେଳାଯିବ । ଭାରତର ଷ୍ଟାର୍ ବ୍ୟାଟର ବିରାଟ କୋହଲି ଓ ରୋହିତ ଶର୍ମା ଗ୍ରାଉଣ୍ଡ୍କୁ ଓହ୍ଲାଇବେ । ଭାରତ ଆସନ୍ତା ବର୍ଷ ହେବାକୁ ଥିବା ଚାମ୍ପିଅନ୍ସ ଟ୍ରଫି ପାଇଁ ପ୍ରସ୍ତୁତି ଆରମ୍ଭ କରିବ । ଭାରତର ପ୍ରଦର୍ଶନ ଅପେକ୍ଷା ନୂଆ କୋଚ୍ ଗୌତମ ଗମ୍ଭୀରଙ୍କ ଉପରେ ଫୋକସ ରହିବ । ତାଙ୍କ ରଣନୀତି ଓ କାର୍ଯ୍ୟପ୍ରଣାଳୀ ସିନିୟର ଖେଳାଳିଙ୍କ ପାଇଁ କେତେଦୂର ସହାୟକ ହେବ, ଦେଖିବାକୁ ମିଳିବ ।
ଶ୍ରୀଲଙ୍କା ଦଳ ଟି-ଟ୍ୱେଣ୍ଟି ସିରିଜ ପରାଜୟ ଦୁଃଖରୁ ବାହାରିବା କଷ୍ଟକର । କିନ୍ତୁ ସମର୍ଥକଙ୍କ ଭରସା ଦଳ ଉପରେ ରହିଛି । ଶୁକ୍ରବାର ଘରୋଇ ଦଳକୁ ସମର୍ଥନ କରିବା ପାଇଁ ପ୍ରେମଦାସା ଷ୍ଟାଡ଼ିୟମ୍ରେ ଦର୍ଶକ ଗହଳି ଲାଗି ରହିବ । ତେଣୁ ଟି-ଟ୍ୱେଣ୍ଟି ସିରିଜ ଫଳାଫଳକୁ ଭୁଲି ଶ୍ରୀଲଙ୍କା କ୍ରିକେଟ୍ ପ୍ରେମୀଙ୍କ ମନ ଜିତିବା ପାଇଁ ଜୋରଦାର ପ୍ରୟାସ କରିବ ।
ପୂର୍ବ ପ୍ରଦର୍ଶନକୁ ଦେଖିଲେ ଶୁକ୍ରବାର ଭାରତର ପଲା ଭାରି ରହିବ । ପ୍ରଥମତଃ ଦଳ ବେଶ୍ ସନ୍ତୁଳିତ । ଶ୍ରୀଲଙ୍କା ତୁଳନାରେ ଭାରତୀୟ ଦଳ ଅଭିଜ୍ଞ । ଏକାଦଶ ମଧ୍ୟ ଏକ ପ୍ରକାର ପ୍ରସ୍ତୁତ । କେବଳ ପିଚ୍ ଦେଖି ନିଷ୍ପତ୍ତି ନିଆଯିବ । ବିଶେଷ କରି ବ୍ୟାଟିଂ ଅଲ୍ରାଉଣ୍ଡର ଓ ୱିକେଟ୍ କିପର ସ୍ଥାନକୁ ନେଇ ପରୀକ୍ଷା ନିରୀକ୍ଷା ହୋଇପାରେ । କେଏଲ ରାହୁଲ ଓ ରିଷଭ ପନ୍ତଙ୍କ ମଧ୍ୟରୁ ଜଣଙ୍କୁ ଏକାଦଶରେ ସ୍ଥାନ ମିଳିବା ନିଶ୍ଚିତ। ସେହିପରି ଶିବମ ଦୁବେ ଓ ରିୟାନ ପରାଗଙ୍କ ମଧ୍ୟରୁ ଜଣଙ୍କୁ ବ୍ୟାଟିଂ ଅଲ୍ରାଉଣ୍ଡର ଭବେ ସ୍ଥାନ ମିଳିବ ।
ଶ୍ରୀଲଙ୍କା ଦଳ ମୁଖ୍ୟତଃ ପେସ୍ ବୋଲିଂକୁ ନେଇ ଚିନ୍ତାରେ ରହିଛି । ଆହତ ଓ ଅସୁସ୍ଥତା ଯୋଗୁଁ ୫ଜଣ ପେସ୍ ବୋଲର ସମ୍ପ୍ରତି ଦଳରୁ ବାଦ ପଡ଼ିଛନ୍ତି । କେବଳ ଆସିଥା ଫର୍ଣ୍ଣାଣ୍ଡୋ ଓ ଚାମିକା କରୁଣାରତ୍ନେ ଫିଟ୍ ଅଛନ୍ତି । ତଥାପି ସ୍ପିନରଙ୍କୁ ସହାୟତା କରୁଥିବା ପିଚ୍ରେ ଶ୍ରୀଲଙ୍କା ପାଇଁ ବୋଲିଂ ବିଭାଗ ପ୍ରସ୍ତୁତ କରିବା କଷ୍ଟକର ହେବ ନାହିଁ । ମଧ୍ୟ ଓ ନିମ୍ନ କ୍ରମ ବ୍ୟାଟିଂ ବିଭାଗ ବଡ଼ ସମସ୍ୟା ହୋଇ ଛିଡ଼ା ହୋଇଛି । ଟି-ଟ୍ୱେଣ୍ଟି ସିରିଜରେ ୩ଟି ଯାକ ମ୍ୟାଚ୍ରେ ମଧ୍ୟକ୍ରମର ବିଫଳତା ଯୋଗୁଁ ଶ୍ରୀଲଙ୍କା ବିଜୟ ହାତଛଡ଼ା କରିଥିଲା । ତେଣୁ ଶୁକ୍ରବାର ମଧ୍ୟକ୍ରମ ବ୍ୟାଟିଂ ବିଭାଗକୁ ସୁଦୃଢ କରିବା ମୁଖ୍ୟ କାର୍ଯ୍ୟ ହେବ ।
ଶୁକ୍ରବାର ଶ୍ରୀଲଙ୍କା ଓପନର ପଥୁମ ନିଶଙ୍କା ଓ ଭାରତୀୟ ବୋଲର କୁଲଦୀପ ଯାଦବଙ୍କ ଉପରେ ନଜର ରହିବ । ନିଶଙ୍କା ୨୦୨୩ରୁ ଇତି ମଧ୍ୟରେ ଦିନିକିଆରେ ସର୍ବାଧିକ ୧୬୪୮ ରନ୍ ସଂଗ୍ରହ କରିଛନ୍ତି । ସେ ଟି-ଟ୍ୱେଣ୍ଟି ସିରିଜରେ ମଧ୍ୟ ଚମତ୍କାର ବ୍ୟାଟିଂ କରିଥିଲେ । ସେହିପରି କୁଲଦୀପ ଯାଦବଙ୍କ ଯାଦୁକରୀ ସ୍ପିନ ବୋଲିଂ ଉପରେ ସମସ୍ତଙ୍କ ନଜର ରହିଛି ।
ପ୍ରେମଦାସା ଗ୍ରାଉଣ୍ଡର ପିଚ୍ ସ୍ପିନରଙ୍କୁ ସହାୟତା କରିବା ନିଶ୍ଚିତ । ଅପରାହ୍ଣରେ ମ୍ୟାଚ୍ ଆରମ୍ଭ ହେବ । ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଆଶା କରାଯାଇପାରେ। କାରଣ ଅପରାହ୍ଣରେ ବର୍ଷା ସମ୍ଭାବନା ରହିଛି ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ଶ୍ରେୟାସ ଆୟର, ରିଷଭ ପନ୍ତ/କେଏଲ ରାହୁଲ, ଶିବମ ଦୁବେ/ରିୟାନ ପରାଗ, ଅକ୍ଷର ପଟେଲ, କୁଲଦୀପ ଯାଦବ, ଖଲିଲ ଅହମ୍ମଦ/ହର୍ଷିତ ରାଣା, ଅର୍ଶଦୀପ ସିଂହ, ମହମ୍ମଦ ସିରାଜ ।
ଶ୍ରୀଲଙ୍କା: ପଥୁମ ନିଶଙ୍କା, କୁଶଲ ମେଣ୍ଡିସ, ସଦିରା ସମରବିକ୍ରମା, କାମିଣ୍ଡୁ ମେଣ୍ଡିସ୍, ଚରିଥ ଆଶାଲଙ୍କା(ଅଧିନାୟକ), ଜନିଥ ଲିୟାନେଜ, ଦୁନିଥ ୱେଲାଲେଜ/ଚାମିକା କରୁଣାରତ୍ନେ, ୱାନିଣ୍ଡୁ ହସରଙ୍ଗା, ମହୀଶ ତୀକ୍ଷଣା, ମହମ୍ମଦ ସିରାଜ/ ଏହସାନ ମାଲିଙ୍ଗା, ଆସିଥା ଫର୍ଣ୍ଣାଣ୍ଡୋ ।