ଚନ୍ଦ୍ରଶେଖରପୁର, ୨୬/୦୭: ଆମ ବରକୁ ଆମ ପାଖକୁ ଫେରାଇ ଆଣ । ସେ ଅନ୍ୟଜଣେ ଯୁବତୀ ସହ ପଳାଇଛି । ଆମେ ଯେତେ ନେହୁରା ହେଲେ ମଧ୍ୟ ସେ ଆମ ପାଖକୁ ଆସୁନାହିଁ । ତେଣୁ ତୁରନ୍ତ ଆମ ବରକୁ ଫେରାଇ ଆଣିବାରେ ସାହାଯ୍ୟ କର । ନଚେତ୍ ଆମେ ଜୀବନ ହାରିଦେବୁ । ଗୁରୁବାର ଏମିତି ଅଭିଯୋଗ ଆଣି ୨ ଭଉଣୀ ଚନ୍ଦ୍ରଶେଖରପୁର ଥାନାରେ ହଲାପଟା କରିଛନ୍ତି । ପୁଲିସ ସେମାନଙ୍କୁ ବୁଝେଇ ବୁଝେଇ ନୟାନ୍ତ ହୋଇପଡ଼ିଛି । ଏଭଳି ଘଟଣା ଚନ୍ଦ୍ରଶେଖରପୁର ଅଞ୍ଚଳରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି ।
ଘଟଣା ଏମିତି, ରାଜେଶ ମଲ୍ଲିକ ନାମକ ଜଣେ ଯୁବକ ଡମଣାରେ ଥିବା ଏକ ବସ୍ତିରେ ରୁହନ୍ତି । ସେହି ବସ୍ତିର ଦୁଇ ଭଉଣୀ ରାଜେଶଙ୍କ ପ୍ରେମରେ ଉବୁଟୁବୁ ହେଉଥିଲେ । ବଡ଼ ଭଉଣୀଙ୍କୁ ରାଜେଶ ମନ୍ଦିରରେ ବାହା ହେବା ପରେ ସାନ ଭଉଣୀଙ୍କୁ ଲୁଚି ବିବାହ କରିଥିଲେ ରାଜେଶ । ଜଣଙ୍କ ସାଙ୍ଗରେ କିଛି ଦିନ ବିତାଇବା ପରେ ଅନ୍ୟଜଣେ ଭଉଣୀ ଏହା ଜାଣିପାରିଥିଲେ । ଶେଷରେ ନିଷ୍ପତ୍ତି ନେଇଥିଲେ ୨ଭଉଣୀ ରାଜେଶଙ୍କୁ ନେଇ ଏକାଠି ରହିବେ । ହେଲେ ଏହା ଭିତରେ ରାଜେଶ ଅନ୍ୟଜଣେ ଯୁବତୀଙ୍କ ପ୍ରେମରେ ପଡ଼ି ଯାଇଥିଲେ । ତାଙ୍କୁ ଧରି ପୁରୀ ବୁଲିବାକୁ ଯାଇଥିଲେ । ସେଠାରେ ସଂପୃକ୍ତ ଯୁବତୀଜଣଙ୍କ ସହ ସମୁଦ୍ରକୂଳେ ଏକାଠି ବୁଲୁଥିବାର ଫଟୋକୁ ସୋସିଆଲ ମିଡିଆରେ ପୋଷ୍ଟ କରି ଦେଇଥିଲେ ।
ଏହି ଫଟୋକୁ ସୋସିଆଲ ମିଡିଆରେ ଦେଖି ୨ଭଉଣୀଙ୍କ ଅକଲ ଗୁଡୁମ୍ । ଉଭୟେ ରାଜେଶଙ୍କୁ ବାରମ୍ବାର ଫୋନ୍ କରିଥିଲେ । ସେପଟୁ ରାଜେଶ ଉତ୍ତର ଦେଇଥିଲେ, ସେ ଆଉ ସେମାନଙ୍କ ପାଖକୁ ଫେରିବେନି । ଉକ୍ତ ଯୁବତୀଙ୍କ ସହ ଘର ସଂସାର କରିବେ। ଏହା ଶୁଣି ୨ଭଉଣୀ ଆସି ଚନ୍ଦ୍ରଶେଖରପୁର ଥାନାରେ ପହଞ୍ଚିଛନ୍ତି । ତୁରନ୍ତ ଆମ ସ୍ୱାମୀଙ୍କୁ ଉକ୍ତ ଯୁବତୀ କବଳରୁ ଉଦ୍ଧାର କରି ଆମ ପାଖକୁ ନେଇଆସ। ଆମେ ଦୁଇ ଭଉଣୀ ରାଜେଶ ସହ ଏକାଠି ରହିବୁ । ପୁଲିସ ଯେତେ ବୁଝାଇଥିଲେ ମଧ୍ୟ ସେମାନେ ବୁଝି ନଥିଲେ । ଏକା ଜିଦ୍ରେ ଦୁଇ ଭଉଣୀ ଅଟଳ ଥିଲେ । ଆମ ବରକୁ ଫେରାଇ ଆଣ ବୋଲି ଥାନାରେ ଜିଦ୍ ଧରି ବସି ରହିଥିଲେ । ଶେଷରେ ପୁଲିସ ରାଜେଶଙ୍କୁ ଫେରାଇ ଆଣିବାର ପ୍ରତିଶ୍ରୁତି ଦେବା ପରେ ୨ ଭଉଣୀ ଥାନାରୁ ଫେରିଥିଲେ । ତା’ପରେ ପୁଲିସ ଟିକେ ଶାନ୍ତିରେ ନିଶ୍ୱାସ ନେଇଛି ।
