ଗାଜା,୦୮/୦୮: ଇସ୍ମାଇଲ ହାନିୟେଙ୍କ ମୃତ୍ୟୁ ପରେ ୟାହ୍ୟା ସିନୱାରଙ୍କୁ ହମାସ୍ର ନୂଆ ମୁଖ୍ୟ ବନାଯାଇଛି । ହମାସ ପକ୍ଷରୁ ମଙ୍ଗଳବାର ଏକ ବିବୃତି ଜାରି କରାଯାଇଛି । ଏହା ପୂର୍ବରୁ ସିନୱାର କେବଳ ଗାଜାରେ ହମାସ୍ର କମାଣ ସମ୍ଭାଳୁଥିଲେ । ହମାସ୍ର ପୂର୍ବତନ ମୁଖ୍ୟ ହାନିୟେ କାତାରରେ ରହି ଏହି ଆତଙ୍କୀ ସଙ୍ଗଠନର ପରିଚାଳନା କରୁଥିଲେ ।
୨୦୧୭ରେ ସିନୱାରଙ୍କୁ ଗାଜାର ମୁଖ୍ୟ ବନାଯାଇଥିବାବେଳେ ସେବେଠାରୁ ସେ ସାମ୍ନାକୁ ଆସିନାହାନ୍ତି । ହମାସ ଉପରେ ସିନୱାରଙ୍କ ବେଶ୍ ଦବଦବା ରହିଛି । ଗତ ଜୁଲାଇ ୩୧ରେ ଇରାନ ରାଜଧାନୀ ତେହରାନରେ ହାନିୟେ ରହୁଥିବା ହୋଟେଲ ଉପରେ ଆକ୍ରମଣ ହୋଇଥିଲା । ଏଥିରେ ହାନିୟେଙ୍କ ମୃତ୍ୟୁ ଘଟିଥିଲା । ଏଥିପାଇଁ ଇରାନ ଏବଂ ହମାସ୍ ଇସ୍ରାଏଲକୁ ଦାୟୀ କରିଥିଲେ । ଏହାକୁ ନେଇ ଇରାନ ପ୍ରତିଶୋଧ ପରାୟଣ ହେବା ସହ ଇସ୍ରାଏଲ ଉପରେ ଆକ୍ରମଣ ଧମକ ଦେଇଛି । ଫଳରେ ଏବେ ମଧ୍ୟପ୍ରାଚ୍ୟ ସ୍ଥିତି ବେଶ୍ ଅଶାନ୍ତ ରହିଛି ।
ଗାଜା ଷ୍ଟ୍ରିପ୍ରେ ଏକ ଶରଣାର୍ଥୀ ଶିବିରରେ ଜନ୍ମ ନେଇଥିବା ସିନୱାର ଇସ୍ରାଏଲର ଦୁଇ ସୈନିକଙ୍କୁ ଅପହରଣ ଏବଂ ହତ୍ୟା ଅଭିଯୋଗରେ ୧୯୮୯ରେ ଗିରଫ ହୋଇଥିଲେ । ସେତେବେଳେ ତାଙ୍କୁ ୧୯ ବର୍ଷ ହୋଇଥିଲା । ପରେ ତାଙ୍କୁ ଆଜୀବନ କାରାଦଣ୍ଡ ହୋଇଥିଲା । ୨୦୧୧ରେ ଇସ୍ରାଏଲ ସୈନିକ ଗିଲାଦ ଶାଲିଟ୍ଙ୍କ ବଦଳରେ ୧ ହଜାର ପାଲେଷ୍ଟିନୀୟ କଏଦୀଙ୍କୁ ଇସ୍ରାଏଲ ମୁକ୍ତ କରିଥିଲା । ସେମାନଙ୍କ ମଧ୍ୟରେ ସିନୱାର ରହିଥିଲେ । ସେତେବେଳକୁ ସିନୱାର ୨୨ ବର୍ଷ ଜେଲ୍ରେ କାଟିସାରିଥିଲେ।
