ବାଲେଶ୍ୱର,୦୪/୦୩: ପୁଣି ଲଜ୍ଜ୍ୟା । ବାଲେଶ୍ବରରେ ଜଣେ ଦଶମ ଶ୍ରେଣୀ ଛାତ୍ରୀ ଗଣଦୁଷ୍କର୍ମର ଶିକାର ହୋଇଛନ୍ତି । ପୀଡିତା ଜଣକ ଏବେ ୪ ମାସର ଗର୍ଭବତୀ ଥିବା ଜଣାପଡିଛି । ସେ ମାଟ୍ରିକ ବୋର୍ଡ ପରୀକ୍ଷା ଦେଉଛନ୍ତି । ବାଲିଆପାଳ ବ୍ଲକରେ ଘଟିଥିବା ଏହି ଘଟଣା ଲୋକଲୋଚନକୁ ଆସିବା ପରେ ଜିଲ୍ଲାରେ ଚର୍ଚ୍ଚା ଜୋର ଧରିଛି । କିଛି ଦିନ ତଳେ ଚିତ୍ରକୋଣ୍ଡା ଓ ଯାଜପୁର ଅଞ୍ଚଳରେ ଦଶମ ଶ୍ରେଣୀ ଛାତ୍ରୀ ମା' ହେବା ଘଟଣା ପରେ ଏହି ଘଟଣା ଆଲୋଡନ ସୃଷ୍ଟି କରିଛି ।
ସୂଚନା ମୁତାବକ, ପ୍ରାୟ ୪ ମାସ ପୂର୍ବରୁ ପୀଡିତା ନିଜ ସମ୍ପର୍କୀୟ ଭାଇଙ୍କ ସହ ଗଡ଼ରା ବୁଲିବାକୁ ଯାଇଥିଲେ । ସେଠାରେ ପୂର୍ବରୁ ପରିଚୟ ଥିବା କିଛି ଯୁବକଙ୍କ ସହ ସେମାନଙ୍କର ଦେଖା ହୋଇଥିଲା । ସେମାନେ ଏକ ହୋଟେଲକୁ ଯାଇଥିଲେ । ପୂର୍ବ ଯୋଜନା ମୁତାବକ ସେମାନେ ପୀଡିତାଙ୍କୁ ମୃଦୁ ପାନୀୟରେ ନିଶା ଦେଇ ଦୁଷ୍କର୍ମ କରିଥିଲେ । ଏ ଘଟଣା ବାବଦରେ କାହାକୁ କିଛି ନ କହିବାକୁ ଚେତାବନୀ ଦେଇଥିଲେ। କଥା ପ୍ରଘଟ କଲେ ପରିବାର ଲୋକଙ୍କୁ ହତ୍ୟା କରିବେ ବୋଲି ମଧ୍ୟ ଧମକ ମଧ୍ୟ ଦେଇଥିଲେ ।
ଅଧିକ ପଢନ୍ତୁ...ଚିତ୍ରକୋଣ୍ଡା ପରେ ଯାଜପୁରରେ ଲଜ୍ଜ୍ୟା, ମା' ହେଲେ ଦଶମ ଶ୍ରେଣୀ ଛାତ୍ରୀ
କିଛି ଦିନ ତଳେ ପୀଡିତା ପେଟରେ ଯନ୍ତ୍ରଣା ଅନୁଭବ କରିଥିଲେ । ପରିବାର ଲୋକେ ନିକଟସ୍ଥ ହସ୍ପିଟାଲ ନେଇଥିଲେ । ସେଠାରେ ସେ ୪ ମାସର ଗର୍ଭବତୀ ଥିବା ଜଣାପଡିଥିଲା । ପରେ ପୀଡିତା ଜଣକ ସବୁ ଘଟଣା ଘର ଲୋକଙ୍କୁ କହିଥିଲେ । ଏନେଇ ପରିବାର ଲୋକ ବାଲିଆପାଳ ଥାନା ଲିଖିତ ଅଭିଯୋଗ କରିଛନ୍ତି । ପୋଲିସ ତଦନ୍ତ ଆରମ୍ଭ କରିଛି । ମହିଳା ଓ ଶିଶୁ ବିକାଶ ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ବାଲେଶ୍ୱର ଗସ୍ତର ଠିକ ପୂର୍ବରୁ ଏହି ଘଟଣା ଲୋକଲୋଚନକୁ ଆସିବା ପରେ ଆଲୋଚନା ଜୋର ଧରିଛି । ଛାତ୍ରୀ ଜଣଙ୍କ ଦଶମ ବୋର୍ଡ ପରୀକ୍ଷା ଦେଉଥିବାରୁ ପରିବାର ଲୋକ ଗର୍ଭପାତ କରିବାକୁ ଆବେଦନ କରିଛନ୍ତି ।
କହି ରଖୁଛୁ କି, କିଛି ତଳେ ଦୁଇ ଦଶମ ଶ୍ରେଣୀ ଛାତ୍ରୀ ମା' ହେବା ଘଟଣା ସାମ୍ନାକୁ ଆସିଥିଲା । ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକରେ ମଙ୍ଗଳ ବିଭାଗର ଏକ ହାଇସ୍କୁଲରେ ଜଣେ ଦଶମ ଶ୍ରେଣୀ ଛାତ୍ରୀ ମାଟ୍ରିକ ପରୀକ୍ଷା ଦେବାକୁ ଯାଇ ସନ୍ତାନ ପ୍ରସବ କରିଥିଲେ । ଏହାର କିଛି ଦିନ ପରେ ଯାଜପୁର ବରୀ ଅଞ୍ଚଳର ଜଣେ ଦଶମ ଶ୍ରେଣୀ ଛାତ୍ରୀ ଏକ ଶିଶୁକନ୍ୟା ଜନ୍ମ ଦେଇଥିଲେ ।
