ଭୁବନେଶ୍ବର, ୧୧/୩ : ବାନ୍ଧବୀରୁ ହେଲେ ସ୍ତ୍ରୀ । ସାଂସଦ ତଥା ଅଭିନେତା ଅନୁଭବ ମହାନ୍ତିଙ୍କ ସାତ ଜନ୍ମର ସାଥୀ ହେଲେ ଜାଗ୍ରତି ଶୁକ୍ଲା । ଅଗ୍ନିକୁ ସାକ୍ଷୀ ରଖି ବିବାହ ବନ୍ଧନରେ ବାନ୍ଧି ହେଲେ ଅନୁଭବ ଓ ଜାଗ୍ରତି । ଉଭୟଙ୍କ ବିବାହ ସହ ବହୁ ଦିନରୁ ଲାଗି ରହିଥିବା କଳ୍ପନାଜଳ୍ପନାର ଅନ୍ତ ଘଟିଛି । ରାଜ୍ୟ ବାହାରେ ଏହି ବିବାହର ଆୟୋଜନ ହୋଇଛି । ସୂଚନା ଅନୁସାରେ ରାଜସ୍ଥାନର ଜୟପୁରଠାରେ ଭବ୍ୟ ଆୟୋଜନରେ ଏହି ବିବାହ ସମ୍ପର୍ଣ୍ଣ ହୋଇଛି । ଆଜି ଅପରାହ୍ନରେ ଅନୁଭବ ମହାନ୍ତିଙ୍କ ବର ବେଶରେ ଫଟୋ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହୋଇଥିଲା। ଯାହାକୁ ବହୁ ଦିନରୁ ତାଙ୍କ ଫ୍ୟାନ୍ସମାନେ ଅପେକ୍ଷା କରିଥିଲେ । ଏହି ଫଟୋ ଆସିବା ମାତ୍ରକେ ଭାଇରାଲ ହେବା ସହ ତାଙ୍କ ଫ୍ୟାନ୍ସମାନେ ଖୁସିରେ ବିଭୋର ହୋଇପଡ଼ିଥିଲେ । ଏହି ବିବାହ ଉତ୍ସବରେ ଉଭୟଙ୍କ ପରିବାର ଲୋକ ସାମିଲ୍ ହୋଇଥିବାବେଳେ କେତେକ ନିକଟତମ ସମ୍ପର୍କୀୟ ଯୋଗଦେଇଛନ୍ତି ।
ଗତ ୭ ତାରିଖରେ ଉଭୟଙ୍କ ନିର୍ବନ୍ଧ ଫଟୋ ସୋସିଆଲ୍ ମିଡିଆରେ ଦେଖିବାକୁ ମିଳିଥିଲା। ଏହାପରେ ଜାଗ୍ରତି ତାଙ୍କ ସୋସିଆଲ ମିଡ଼ିଆ ପେଜରେ ଉଭୟଙ୍କ ଫଟୋ ପୋଷ୍ଟ କରି ନିର୍ବନ୍ଧ ସରିଥିବା ପ୍ରକାଶ କରିଥିଲେ । ପରେ ବାହାଘରକୁ ନେଇ ଚର୍ଚ୍ଚା ଜୋର ଧରିଥିଲା । କେବେ ହେବ ବାହାଘର ତାକୁ ନେଇ ଚାଲିଥିଲା କଳ୍ପନା ଜଳ୍ପନା । ବହୁ ଦିନରୁ ୧୧ତାରିଖରେ ବାହାଘର ବୋଲି ସୂଚନା ରହିଥିଲା । ମାତ୍ର ଏ ସବୁ ଚର୍ଚ୍ଚାର ଆଜି ଅନ୍ତ ଘଟିଛି । ସନ୍ଧ୍ୟାରେ ବିବାହ ବନ୍ଧନରେ ବାନ୍ଧି ହୋଇଛନ୍ତି ଓଲିଉଡ଼ର ବାଳୁଙ୍ଗା ଟୋକା ଅନୁଭବ ମହାନ୍ତି ।
ପ୍ରକାଶ ଯେ, ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ବିବାହ ବିଚ୍ଛେଦ ପରେ ଅନୁଭବ ଖୁବଶୀଘ୍ର ଜାଗ୍ରତିଙ୍କୁ ବିବାହ କରିବେ ବୋଲି ବହୁ ଚର୍ଚ୍ଚା ହେଉଥିଲା । ଦୀର୍ଘ ଦିନ ଧରି ଏ ନେଇ ଆଲୋଚନା ହେଉଥିଲା ।
