ନୂଆଦିଲ୍ଲୀ: ଅମିତାଭ ବଚ୍ଚନଙ୍କ ଫିଲ୍ମ ସୂର୍ଯ୍ୟବଂଶମ ଆପଣ ମାନେ ନିଶ୍ଚୟ ଦେଖିଥିବେ । ଟିଭିରେ ଏହି ଫିଲ୍ମଟି ଏତେ ଥର ପ୍ରସାରିତ ହୋଇଛି ଯେ, ଆପଣ ମାନେ ଏହାର ପ୍ରତିଟି ଦୃଶ୍ୟକୁ ମନେ ରଖିଥିବେ । ଏହି ଫିଲ୍ମରେ ଅମିତାଭଙ୍କ ସହ ଅଭିନେତ୍ରୀ ସୌନ୍ଦର୍ଯ୍ୟା ତାଙ୍କ ପ୍ରେମିକା ଭାବରେ ଅଭିନୟ କରିଥିଲେ । ସୌନ୍ଦର୍ଯ୍ୟା ସାଉଥ୍ ସିନେମାର ଜଣେ ଚର୍ଚ୍ଚିତ ଅଭିନେତ୍ରୀ ଥିଲେ । ସେ ଅନେକ ତେଲୁଗୁ ସିନେମାରେ ମଧ୍ୟ ଅଭିନୟ କରିଛନ୍ତି । କିନ୍ତୁ ହିନ୍ଦି ଇଣ୍ଡଷ୍ଟ୍ରୀରେ ସେ ସୂର୍ଯ୍ୟବଂଶମ ମାଧ୍ୟମରେ ବହୁ ପରିଚିତ ହୋଇଥିଲେ।
ସୌନ୍ଦର୍ଯ୍ୟାଙ୍କର ସେତେବେଳେ ବିମାନ ଦୁର୍ଘଟଣାରେ ମୃତ୍ୟୁ ହୋଇଥିଲା। ସେହି ସମୟରେ ଅଭିନେତ୍ରୀ ଗର୍ଭବତୀ ଥିଲେ । ହେଲେ ଏହି ଅଭିନେତ୍ରୀଙ୍କ ମୃତ୍ୟୁର ବହୁ ବର୍ଷ ପରେ ଟଲିଉଡ୍ର ବରିଷ୍ଠ ଅଭିନେତା ମୋହନ ବାବୁଙ୍କ ବିରୋଧରେ ଏବେ ମାମଲା ଦାଖଲ ହୋଇଛି । ତାଙ୍କ ଉପରେ ସୌନ୍ଦର୍ଯ୍ୟାଙ୍କ ମୃତ୍ୟୁରେ ସାମିଲ ହୋଇଥିବା ଅଭିଯୋଗ ହୋଇଛି ।
ଅଭିନେତ୍ରୀ ସୌନ୍ଦର୍ଯ୍ୟାଙ୍କର ୧୭ ଅପ୍ରେଲ୍ ୨୦୦୪ରେ ପ୍ରାଇଭେଟ ପ୍ଲେନ କ୍ରାସରେ ମୃତ୍ୟୁ ହୋଇଥିଲା। ରିପୋର୍ଟ ମୁତାବକ ସେତେବେଳେ ସେ କରିମନଗରରେ ଭାରତୀୟ ଜନତା ପାର୍ଟି ଏବଂ ତେଲୁଗ ଦେଶମ ପାର୍ଟି ପାଇଁ ରାଜନୈତିକ ପ୍ରଚାରରେ ସାମିଲ ହେବା ପାଇଁ ଯାଉଥିଲେ । ଏଥିରେ ତାଙ୍କ ଭାଇର ବି ମୃତ୍ୟୁ ହୋଇଥିଲା। ସେତେବେଳେ ସୌନ୍ଦର୍ଯ୍ୟାଙ୍କ ମୃତ ଦେହ ମଧ୍ୟ ମିଳି ପାରିନଥିଲା ।
ତେବେ ମୃତ୍ୟୁର ୨୨ ବର୍ଷ ପରେ ଏକ ମାମଲା ରୁଜୁ ହୋଇଛି, ଯେଉଁଥିରେ ଦାବି କରାଯାଉଛି ଯେ, ସୌନ୍ଦର୍ଯ୍ୟାଙ୍କର ମୃତ୍ୟୁ ଦୁର୍ଘଟଣାରେ ହୋଇନାହିଁ । ବରଂ ତାଙ୍କୁ ହତ୍ୟା କରାଯାଇଛି । ଅଭିନେତା ମୋହନଙ୍କ ସହ ତାଙ୍କର ସମ୍ପତ୍ତି ବିବାଦ ରହିଥିଲା । ଖମ୍ମମ ଏସିପି ଏବଂ ଜିଲ୍ଲା ଅଧିକାରୀଙ୍କ ନିକଟରେ ଏହି ମାମଲା ଦାଖଲ କରିଛନ୍ତି ଚିଟ୍ଟି ମଲ୍ଲୁ ନାମକ ଜଣେ ବ୍ୟକ୍ତି ।
