ଟିକିରି,୬/୩ : ରାୟଗଡ଼ା ଜିଲ୍ଲା ଟିକିରି ଥାନା ଅନ୍ତର୍ଗତ ଜଣେ ଦିବ୍ୟାଙ୍ଗ ନାବାଳିକାକୁ ବଳାତ୍କାର ଘଟଣାରେ ଜଣେ ଅଭିଯୁକ୍ତକୁ ଗିରଫ କରି ଟିକିରି ପୋଲିସ ବୁଧବାର କୋର୍ଟ ଚାଲାଣ କରିଛି । ଅଭିଯୁକ୍ତ ଜଣକ ହେଉଛନ୍ତି କାଳିଆକୋଣା ଗ୍ରାମର ପ୍ରକାଶ ମାଝୀ । ସମ୍ପୃକ୍ତ ନାବାଳିକା ଜଣେ ମାନସିକ ରୋଗୀ ବୋଲି ଜଣାପଡ଼ିଛି । ପୋଲିସ୍ ସୂଚନା ଅନୁଯାୟୀ, ନାବାଳିକା ଜଣକ ସୋମବାର ମା’ ସହ ଗାଁ ନିକଟ ଜଙ୍ଗଲକୁ କାଠ ଆଣିବାକୁ ଯାଇଥିଲେ ।ଏହି ସମୟରେ ପ୍ରକାଶ ତାକୁ ଭୂଆଁ ବୁଲାଇ ଏକ କୁଡ଼ିଆକୁ ନେଇ ବଳାତ୍କାର କରିଥିଲେ। ଉକ୍ତ ସମୟରେ ମା’ ପହଞ୍ଚି ଝିଅକୁ ଉଦ୍ଧାର କରିଥିଲେ। ପରେ ଥାନାରେ ଲିଖିତ ଅଭିଯୋଗ କରିଥିଲେ।
ଅଭିଯୋଗ ପାଇ ଟିକିରି ପୋଲିସ୍ କେଶ ନଂ୩୭/୨୫ରେ ଏକ ମାମଲା ରୁଜୁ କରି ପକ୍ସୋ ଆକ୍ଟରେ ଗିରଫ କରି ଡାକ୍ତରୀ ପରୀକ୍ଷା ପରେ ଅଭିଯୁକ୍ତକୁ କୋର୍ଟ ଚାଲାଣ କରିଛି । ପୋଲିସ୍ ନାବାଳିକାକୁ ମଙ୍ଗଳବାର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣି ଡାକ୍ତରୀ ପରୀକ୍ଷା କରିଥିଲା।
