ଭୁବନେଶ୍ୱର,୧୫/୦୬: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ପାଇଁ ଦିଲ୍ଲୀରେ ପ୍ରସ୍ତୁତ ହେଉଛି ଓଡ଼ିଶା ଭବନ । ୨୭ କୌଟିଲ୍ୟ ମାର୍ଗ ଡିପ୍ଲମାଟିକ ଏନ୍କ୍ଲେଭ୍ରେ ରହିଛି ଓଡ଼ିଶା ଭବନ । ଦିଲ୍ଲୀ ଆସିଲେ ଏହି ସ୍ଥାନରେ ରୁହନ୍ତି ଓଡ଼ିଶାର ମୁଖ୍ୟମନ୍ତ୍ରୀ । ଏହାର ପ୍ରଥମ ମହଲାରେ ରହିଛି ମୁଖ୍ୟମନ୍ତ୍ରୀଙ୍କ ୪ ପ୍ରକୋଷ୍ଠ । ଏଥିରେ ବେଡ୍ରୁମ୍, ଅଫିସ, ସେକ୍ରେଟାରୀ ରୁମ୍ ସହିତ କନ୍ଫରେନ୍ସ ହଲ୍ ରହିଛି ।
ନୂଆ ମୁଖ୍ୟମନ୍ତ୍ରୀ ଶପଥ ନେବା ପରେ ଓଡ଼ିଶା ଭବନରେ ମଧ୍ୟ ହଲଚଲ ଦେଖିବାକୁ ମିଳିଛି । ବନ୍ଦ ରହିଥିବା ଘରକୁ ଖୋଲି ସଫେଇ କରାଯିବା ସହ ଆବଶ୍ୟକ ପ୍ରସ୍ତୁତି କରାଯାଉଛି । ନୂଆ ମୁଖ୍ୟମନ୍ତ୍ରୀ ଆସିବା ପରେ ତାଙ୍କ ଆବଶ୍ୟକତା ଓ ବରାଦ ଅନୁସାରେ ପୁଣି ଏହାକୁ ସୁସଜ୍ଜିତ କରାଯିବ । ଏହି ରୁମ୍ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆବଶ୍ୟକତା ଅନୁସାରେ ସଜ୍ଜିତ ଥିଲା ।
ଗତ ୨୪ ବର୍ଷ ହେଲା ୩ ଅବଦୁଲ କଲାମ ରୋଡ୍ ଥିଲା ଦିଲ୍ଲୀରେ ନବୀନଙ୍କ ବାସସ୍ଥାନ । ଦିଲ୍ଲୀରେ ଓଡ଼ିଶାର ପାୱାର ସେଣ୍ଟର ଅବଦୁଲ କଲାମ ରୋଡ୍ ଥିଲା । ସେ ଦିଲ୍ଲୀ ଆସିଲେ ଏଠାରେ ରହୁଥିଲେ । ଆବାସିକ କମିଶନ ଓ ଅନ୍ୟ ସରକାରୀ କାମ ସମସ୍ତ ବୈଠକ ଓଡ଼ିଶା ଭବନରେ କରୁଥିଲେ ।