ଭୁବନେଶ୍ୱର,୦୨/୦୨: ହାଇଟେକ ଢଙ୍ଗରେ ନିର୍ବାଚନ ଲଢ଼ିବ କଂଗ୍ରେସ । ଟିକଟ ପାଇଁ ଟଣାଓଟରା କି ଲବି ରାଜନୀତିରେ ଲାଗିବ ରୋକ୍ । ପୂରା ସ୍ୱଚ୍ଛ ଢଙ୍ଗରେ ଟିକଟ ବାଣ୍ଟିବ କଂଗ୍ରେସ । ଯିଏ ଟିକଟ ଆଶାୟୀ ଅନଲାଇନରେ ଆବେଦନ କରିବେ । ସବୁ ଆଶାୟୀଙ୍କ ବାବଦରେ ଟିକିନିଖି ପରଖିବ ଦଳ । ଜନତାଙ୍କ ମତ ବୁଝିବ । ସର୍ଭେ ଟିମ୍ ପୂରା ଖୋଳତାଡ଼ କରି ରିପୋର୍ଟ ଦେବେ । ଯାହାର ଜିତିବା ସମ୍ଭାବନା ଅଧିକ, ତାଙ୍କୁ ହିଁ କଂଗ୍ରେସ ଟିକଟ ଦେବ ।
କଂଗ୍ରେସ ଏଥର ଟିକଟ ଦେଇ ଦଳ ପୂରା ମାପିଚୁପି ବାଟ ଚାଲୁଛି । ପୂର୍ବ ଅଭିଜ୍ଞତାରୁ ଦଳ ଟିକଟ ବଣ୍ଟନରେ କୌଣସି ପ୍ରକାର ଲବି ରାଜନୀତିକୁ ପ୍ରଶୟ ଦେବନି ବୋଲି ନିଷ୍ପତ୍ତି ନେଇଛି । ଏ ନେଇ ଦଳର ପ୍ରଭାରୀ ଡ. ଅଜୟ କୁମାର ନେଇଛନ୍ତି କଡ଼ା ଆଭିମୁଖ୍ୟ । ଅନ୍ୟପଟେ ଟିକଟ ବଣ୍ଟନ ପ୍ରକ୍ରିୟା କେମିତି ତ୍ୱରିତ ହେବ, ସେ ନେଇ ସ୍କ୍ରିନିଂ କମିଟି ଅଧ୍ୟକ୍ଷ ମଧୁସୂଦନ ମିସ୍ତ୍ରୀ ଭୁବନେଶ୍ୱର ଆସି ଦୁଇଦିନ ହେବ ପ୍ରଭାରୀ ଅଜୟ କୁମାର ଓ ପିସିସି ସଭାପତି ଶରତ ପଟ୍ଟନାୟକଙ୍କ ସହ ଆଲୋଚନା କରିଛନ୍ତି । ଉଭୟ ନେତା କହିଛନ୍ତି, ଦଳ ଏଥର ଯୋଗ୍ୟ ଓ ଜିତିବା ସମ୍ଭାବନା ଥିବା ନେତାଙ୍କୁ ହିଁ ଟିକଟ ଦେବ । ଏଥିରେ କାହାର ପ୍ରଭାବ କି ଲବି କାଟୁ କରିବନି । ପୂରା ବ୍ୟବସ୍ଥା ସ୍ୱଚ୍ଛତାର ସହ ହେବ ।
