ନୂଆଦିଲ୍ଲୀ ୦୭/୦୯ : ଏକ କମ୍ପାନି ନିଜ କର୍ମଚାରୀଙ୍କ ପାଇଁ ଏକ ବଡ଼ ପଦକ୍ଷେପ ହାତକୁ ନେଇଛି । ଡ୍ୟୁଟି ସମୟରେ କର୍ମଚାରୀ ସେମାନଙ୍କ ପ୍ରେମିକ/ପ୍ରେମିକାଙ୍କ ସହ ଡେଟିଂରେ ଯାଇପାରିବେ । ସେତିକି ନୁହେଁ, ଏଥିପାଇଁ ସେମାନଙ୍କୁ ପୂରା ଦରମା ମଧ୍ୟ ମିଳିବ । ହଁ, ଆଶ୍ଚର୍ଯ୍ୟ ଲାଗିଲେ ବି ଏହା ସତ । ଥାଇର ମାର୍କେଟିଂ ଏଜେନ୍ସି ‘ହ୍ୱାଇଟ୍‌ଲାଇନ୍‌ ଗ୍ରୁପ୍‌’ ନିଜ କର୍ମଚାରୀଙ୍କ ପାଇଁ ଏହି ପଦକ୍ଷେପ ନେଇଛି । ଅଫିସ୍‌ରେ ଡ୍ୟୁଟି ସମୟରେ ଏହା କର୍ମଚାରୀଙ୍କୁ ବାହାରକୁ ଯିବାକୁ ଏବଂ ଲୋକଙ୍କ ସହ ଡେଟ୍‌ କରିବାକୁ ଉତ୍ସାହିତ କରୁଛି । 

ଏଭଳି ଏକ ଅଜବ ନୀତି ଲାଗୁ କରିବାର କାରଣ ବିଷୟରେ କମ୍ପାନି କହିଛି, ଅନେକ ଅଧ୍ୟୟନକର୍ତ୍ତାଙ୍କ କହିବା ଅନୁସାରେ ଯେଉଁମାନେ ପ୍ରେମ କରିଛନ୍ତି ଏବଂ ପ୍ରେମ ସମ୍ପର୍କରେ ଅଛନ୍ତି ଅନ୍ୟମାନଙ୍କ ତୁଳନାରେ ସେମାନେ ଅଧିକ ସୁଖୀ । ସେମାନେ ଖୁସି ରହୁଥିବାରୁ ନିଜ କାମକୁ ମଧ୍ୟ ଉପଭୋଗ କରନ୍ତି । ତେଣୁ କର୍ମଚାରୀଙ୍କ ଉତ୍ପାଦକତା ବଢ଼ାଇବା ପାଇଁ, କମ୍ପାନି ଏହି ଅଦ୍ଭୁତ ନିୟମ ଲାଗୁ କରିଛି । କାମସ୍ଥଳୀରେ କର୍ମଚାରୀଙ୍କ ଉତ୍ପାଦକତା ବୃଦ୍ଧି ଓ ସେମାନଙ୍କ ସାମଗ୍ରୀକ କଲ୍ୟାଣ ପାଇଁ କମ୍ପାନି ‘ଟିଣ୍ଡର୍‌ ଲିଭ୍‌ସ’ ନାମକ ଛୁଟି ନୀତି ଲାଗୁ କରିଛି ।

ଏହି ଛୁଟିରେ କର୍ମଚାରୀଙ୍କ ଦରମା କଟିବ ନାହିଁ । କମ୍ପାନିରେ ପ୍ରାୟ ୨୦୦ କର୍ମଚାରୀ ଅଛନ୍ତି । ସେମାନେ ଗତ ଜୁଲାଇ ମାସରୁ ଆସନ୍ତା ଡିସେମ୍ବର ଶେଷ ପର୍ଯ୍ୟନ୍ତ ୬ ମାସ ପାଇଁ ‘ଟିଣ୍ଡର୍‌ ଲିଭ୍‌ସ’ ବା ଡେଟିଂ ଛୁଟି ନେଇପାରିବେ । ସେତିକି ନୁହେଁ, ଉପଯୁକ୍ତ ସାଥୀ ଖୋଜୁଥିବା କର୍ମଚାରୀଙ୍କୁ ସାହାଯ୍ୟ କରିବା ଲାଗି ଟିଣ୍ଡର୍‌ ଗୋଲ୍ଡ ଓ ଟିଣ୍ଡର୍‌ ପ୍ଲାଟିନମ୍‌ (ଟିଣ୍ଡର୍‌ରେ ସାଥୀ ଖୋଜିବା ପାଇଁ ଉପଲବ୍ଧ ବିକଳ୍ପ, ଯେଉଁଥିପାଇଁ ଶୁଳ୍କ ଦେବାକୁ ପଡ଼େ)ରେ ସବ୍‌ସ୍କ୍ରାଇବ୍‌ କରିଥିବା କର୍ମଚାରୀଙ୍କୁ ମଧ୍ୟ କମ୍ପାନି ଅର୍ଥ ଦେବାକୁ ଘୋଷଣା କରିଛି । ତେବେ, ଡେଟିଂ ଲାଗି କମ୍ପାନି କେତେ ଦିନ ଛୁଟି ଦେବ, ତାହା କହିନାହିଁ । କେବଳ ଗୋଟିଏ ସପ୍ତାହ ପୂର୍ବରୁ ସେମାନଙ୍କୁ ଏ ବିଷୟରେ ଜଣାଇବାକୁ ପଡ଼ିବ । ଏହି ଅଜବ ନୀତି ଲାଗୁ କରିବା ପଛରେ ଏକ କାହାଣୀ ରହିଛି । କମ୍ପାନିର ଜଣେ ମହିଳା କର୍ମଚାରୀ କାମ ବ୍ୟସ୍ତ ଯୋଗୁ ରୋମାଣ୍ଟିକ୍‌ ଡେଟ୍‌ରେ ଯାଇ ପାରୁନଥିବା ଅଭିଯୋଗ କରିବା ପରେ କମ୍ପାନି ଏହି ଯୁଗାନ୍ତକାରୀ ବିଚାରକୁ କାର୍ଯ୍ୟକାରୀ କରିଛି ।