ନୂଆଦିଲ୍ଲୀ, ୧୫।୮: ଅନ୍ତରୀକ୍ଷରୁ ଅଲମ୍ପିକ୍ସ । ସଶସ୍ତ୍ରବଳରୁ ସଂସଦ । ସବୁ କ୍ଷେତ୍ରରେ ଆଜି ମହିଳାମାନଙ୍କ ବିଜୟର ବାନା ଫରଫର ହୋଇ ଉଡ଼ୁଛି । ନିଜର ଦକ୍ଷତାକୁ ଯୁଗେ ଯୁଗେ ସେ ପ୍ରମାଣିତ କରିଆସିଛି । ଘରର ଚାରିକାନ୍ଥ ଭିତରେ ସେ ନିଜକୁ ସୀମିତ କରିନାହିଁ, ଦେଶ ତଥା ସମାଜର ସୁରକ୍ଷା ବହନ କରି ପୁରୁଷ ସହ କାନ୍ଧ ମିଳାଇ ସଶସ୍ତ୍ରବଳରେ ନିଜକୁ ପ୍ରତିଷ୍ଠା କରିପାରିଛି । ସେ ହେଉଛି ଭାରତୀୟ ନାରୀ । ଜଳ, ସ୍ଥଳ ତଥା ବାୟୁସେନାରେ କାର୍ଯ୍ୟ କରି ପ୍ରସିଦ୍ଧି ଲାଭ କରିଥିବା ଏମାନେ ହେଉଛନ୍ତି ସେହି ସାହସୀ ମହିଳା ।
ପୁନିତା ଅରୋରା- ଭାରତୀୟ ସେନାରେ ନିଯୁକ୍ତି ଦିନେ ମହିଳାଙ୍କ ପାଇଁ ସ୍ୱପ୍ନ ଥିଲା । ଆଉ ଏବେ ଭାରତୀୟ ସେନାରେ ନିଯୁକ୍ତ ବହୁସଂଖ୍ୟକ ମହିଳା ଅଧିକାରୀ । କିଏ ସେହି ମହିଳା ଯିଏ ପ୍ରଥମେ ଏହି କ୍ଷେତ୍ରରେ ପାଦ ଥାପିଥିଲେ । ଏ ଅସମ୍ଭବକୁ ସମ୍ଭବ କରି ଦେଖାଇଥିଲେ ପୁନିତା ଅରୋରା । ଯିଏ ଭାରତୀୟ ନୌସେନାର ପ୍ରଥମ ମହିଳା ଲେପ୍ଟନାଣ୍ଟ ଜେନେରାଲ । ୧୯୪୬ ମେ ୩୧ରେ ପାକିସ୍ତାନ ଲାହୋରେ ପୁନିତାଙ୍କ ଜନ୍ମ । ୨୦୦୪ ମସିହାରେ ଭାରତୀୟ ନୌସେନାରେ ଲେପ୍ଟନାଣ୍ଟ ଜେନେରାଲ ଭାବେ ନିଯୁକ୍ତି ପାଇଥିଲେ । ୩୬ ବର୍ଷ କାର୍ଯ୍ୟକାଳ ଭିତରେ ସେ ସମୁଦାୟ ୧୫ଟି ପଦକ ହାସଲ କରିଥିଲେ ।
କିରଣ ଶେଖାୱାତ୍- ଭାରତୀୟ ମହିଳା ନୌସେନାଙ୍କ କଥା ଉଠିଲେ, କିରଣ ଶେଖାୱାତ୍ଙ୍କ ଛବି ପ୍ରଥମେ ଆସେ । କାର୍ଯ୍ୟରେ ସହିଦ ହୋଇଥିବା ପ୍ରଥମ ମହିଳା ଅଧିକାରୀ ଥିଲେ ସେ । ମେ ୧, ୧୯୮୮ରେ ମୁମ୍ୱାଇର ଏକ ରାଜପୁତ୍ ପରିବାରରେ ତାଙ୍କ ଜନ୍ମ । ଭାରତୀୟ ନୌସେନାର ପର୍ଯ୍ୟବେକ୍ଷକ ଭାବେ ବିମାନଯାତ୍ରା ସମୟରେ ୨୦୧୫ ମାର୍ଚ୍ଚ ୧୪ରେ ଗୋଆରେ ଦୁର୍ଘଟଣାଗ୍ରସ୍ତ ହୋଇଥିଲା ଡୋର୍ନିୟର ବିମାନ । ଯେଉଁଥିରେ ପ୍ରାଣ ହରାଇଥିଲେ ଲେପ୍ଟନାଣ୍ଟ କିରଣ ଶେଖାୱତ୍ । ୨୦୧୦ ମସିହାରେ ସେ ସେନାର ଯୋଗ ଦେଇଥିଲେ । ଏହାର ଠିକ୍ ୫ ବର୍ଷ ପରେ ସେ ସେନାରେ ସହିଦ୍ ହୋଇଥିଲେ ।
ଦିବ୍ୟା ଅଜିତ୍ କୁମାର- ମାତ୍ର ୨୧ ବର୍ଷ ବୟସରେ ଭାରତୀୟ ସେନାରେ ‘ସୋଡ୍ ଅଫ୍ ଅନର’ ହାସଲ କରିଥିବା ପ୍ରଥମ ମହିଳା କ୍ୟାଡେଟ୍ ଭାବେ ଇତିହାସ ରଚିଥିଲେ ଦିବ୍ୟା ଅଜିତ୍ କୁମାର । ଚେନ୍ନାଇର ଏକ ତାମିଲ ପରିବାରରେ ଜନ୍ମ ଗ୍ରହଣ କରିଥିଲେ ଦିବ୍ୟା । ୨୦୧୦ ମସିହାରେ ବାୟୁରକ୍ଷା କୋରରେ ନିଯୁକ୍ତି ପାଇଥିଲେ କ୍ୟାପଟେନ୍ ଦିବ୍ୟା ଅଜିତ୍ କୁମାର ।
ପଦ୍ମା ବନ୍ଦ୍ୟୋପାଧ୍ୟାୟ- ଭାରତୀୟ ବାୟୁସେନାର ପ୍ରଥମ ମହିଳା ଏୟାର ମାର୍ସଲ ଭାବେ ପରିଚିତ ପଦ୍ମା ବନ୍ଦ୍ୟୋପାଧ୍ୟାୟ । ୪ ନଭେମ୍ୱର ୧୯୪୪ରେ ଆନ୍ଧ୍ରପ୍ରଦେଶ ତିରୁପତିର ଏକ ତାମିଲ ପରିବାରରେ ସେ ଜନ୍ମଗ୍ରହଣ କରିଥିଲେ । ୧୯୬୮ ମସିହାରେ ଭାରତୀୟ ବାୟୁସେନାରେ ଯୋଗ ଦେଇଥିଲେ । ଭାରତର ପ୍ରଥମ ଏୟାର ମାର୍ସଲ ଭାବେ ସେ ଏହି ସୁନାମ ଅର୍ଜନ କରିଛନ୍ତି । ନିଜର ଅଦମ୍ୟ ସାହସ ଓ ଉତ୍ସର୍ଗୀକୃତ ଦେଶସେବା ପାଇଁ ୨୦୨୦ରେ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଦ୍ୱାରା ପଦ୍ମ ପୁରସ୍କାରରେ ମଧ୍ୟ ସମ୍ମାନିତ ହୋଇଥିଲେ । ଭାରତୀୟ ସଶସ୍ତ୍ରବାହିନୀରେ ତିନି ତାରକା ପ୍ରାପ୍ତ କରିଥିବା ଦ୍ୱିତୀୟ ମହିଳା ଥିଲେ ପଦ୍ମା । କେବଳ ସେତିକି ନୁହେଁ, ୧୯୭୧ରେ ଭାରତ-ପାକିସ୍ତାନ ଯୁଦ୍ଧ ସମୟରେ ତାଙ୍କର ସେବା ପାଇଁ ବିଶିଷ୍ଟ ସେବା ପଦକ ପାଇଥିଲେ ।
ଗୁଞ୍ଜନ ସକ୍ସେନା- ‘କାର୍ଗିଲ୍ ଗର୍ଲ’ ଭାବେ ଜଣାଶୁଣା ଗୁଞ୍ଜନ ସକ୍ସେନା । ଯିଏ କାର୍ଗିଲ ଯୁଦ୍ଧ ସମୟରେ ଭାରତୀୟ ମହିଳା ପାଇଲଟ୍ ଭାବେ ମୁଖ୍ୟ ଭୂମିକା ଗ୍ରହଣ କରିଥିଲେ । ସେ ଭାରତର ପ୍ରଥମ ମହିଳା ଥିଲେ, ଯିଏ କାର୍ଗିଲ ଯୁଦ୍ଧ ସମୟରେ ଭାରତ ପକ୍ଷରୁ ଶତ୍ରୁକୁ କଡ଼ା ଜବାବ ଦେଇଥିଲେ । ଏଥିପାଇଁ ସେ ଶୌର୍ଯ୍ୟବୀର ପୁରସ୍କାର ମଧ୍ୟ ପାଇଛନ୍ତି । ତେବେ ତାଙ୍କ ଜୀବନ କାହାଣୀ ଉପରେ ଆଧାରିତ ଏକ ହିନ୍ଦୀ ଚଳଚ୍ଚିତ୍ର ମଧ୍ୟ ତିଆରି ହୋଇଛି ।
