ବ୍ରହ୍ମପୁର/ଛତ୍ରପୁର, ୧/୯: ଗିରଫ ହେଲେ ଛତ୍ରପୁର ବିଇଓ । ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଗିରଫ କଲା ଭିଜିଲାନ୍ସ । ବିଇଓଙ୍କୁ କୋର୍ଟ ଚାଲାଣ କରାଯିବ । ଗଞ୍ଜାମ ଜିଲ୍ଲା ଛତ୍ରପୁର ଗୋଷ୍ଠୀ ଶିକ୍ଷାଧିକାରୀ (ବିଇଓ) ସୀତାରାମ ପାତ୍ରଙ୍କ ଘରେ ଭିଜିଲାନ୍ସ ଚଢ଼ାଉ ପରେ ରବିବାର ତାଙ୍କୁ ଗିରଫ କରାଯାଇଛି । ଶନିବାର ଭୋରରୁ ବିଇଓଙ୍କ ଘରେ ଚଢ଼ଉ କରିଥିଲା ଭିଜିଲାନ୍ସ । ଛତ୍ରପୁରରେ କାର୍ଯ୍ୟ କରିବା ସମୟରେ ବିଇଓ ପାତ୍ରଙ୍କ ନାଁରେ ଅର୍ଥ ହେରଫେରଠାରୁ ଆରମ୍ଭ କରି ଅନେକ ଅଭିଯୋଗ ହୋଇଥିଲା । ଭିଜିଲାନ୍ସ ଚଢ଼ଉ ବେଳେ ନଗଦ ସାଢ଼େ ୬ ଲକ୍ଷ ଟଙ୍କା, ବିଶାଳ ଅଟ୍ଟାଳିକା, ପ୍ଲଟ୍ ଏବଂ ବହୁ ସ୍ଥାବର ଓ ଅସ୍ଥାବର ସମ୍ପତ୍ତି ଠାବ କରିଛି । ବ୍ରହ୍ମପୁର ସ୍ୱତନ୍ତ୍ର ଭିଜିଲାନ୍ସ କୋର୍ଟ ସର୍ଚ୍ଚୱାରେଣ୍ଟ ଜାରି କରିବା ପରେ ଶନିବାର ଭୋର ୫ଟାରେ ଭିଜିଲାନ୍ସର ୬ଟି ଟିମ୍ ଏକକାଳୀନ ୬ଟି ଜାଗାରେ ଚଢ଼ଉ କରିଥିଲେ ।
ବ୍ରହ୍ମପୁର ରାମକୃଷ୍ଣ ନଗର ୭ମ ଗଳିରେ ଥିବା ଅଟ୍ଟାଳିକା, ପୋଲସରା କୋଳିସାହିରେ ଥିବା ଦୁଇ ମହଲା କୋଠା, ସେହି ସାହିରେ ଥିବା ଆଉ ଏକ ଘର, ବ୍ରହ୍ମପୁର କଳିଙ୍ଗନଗରରେ ଥିବା ତାଙ୍କ ସମ୍ପର୍କୀୟଙ୍କ ଘର ସମେତ ଛତ୍ରପୁରସ୍ଥିତ ସରକାରୀ କାର୍ଯ୍ୟାଳୟରେ ଭିଜିଲାନ୍ସ ଟିମ୍ ଯାଞ୍ଚ କରିଥିଲା । ସେହିପରି ୩୫ ଲକ୍ଷ ୬୧ ହଜାର ଟଙ୍କା ବ୍ୟାଙ୍କ୍ ଓ ବୀମାରେ ବିନିଯୋଗ ହୋଇଥିବା ଭିଜିଲାନ୍ସ ଚଢ଼ଉରେ ଜଣାପଡ଼ିଛି ।
