ଭୁବନେଶ୍ୱର,୦୭/୦୬: ବିସିସିଆଇ ୨୦୨୪- ୨୦୨୫ ସିଜନ ପାଇଁ ଘରୋଇ କ୍ରୀଡ଼ାସୂଚୀ ଘୋଷଣା କରିଛି । ରଣଜୀ ଟ୍ରଫିର ଲିଗ୍ ରାଉଣ୍ଡକୁ ଏଥର ଦୁଇଟି ପର୍ଯ୍ୟାୟରେ ଆୟୋଜନ କରାଯିବ । ପ୍ରଥମ ପର୍ଯ୍ୟାୟ ଅକ୍ଟୋବର ୧୧ରୁ ୨୪ ଏବଂ ଦ୍ୱିତୀୟ ପର୍ଯ୍ୟାୟ ଫେବ୍ରୁଆରୀ ୨ରୁ ୨୫ ତାରିଖ ମଧ୍ୟରେ ଖେଳାଯିବ । କିନ୍ତୁ ପ୍ଲେଟ୍ ପର୍ଯ୍ୟାୟର ଦ୍ୱିତୀୟ ରାଉଣ୍ଡ ନଭେମ୍ବର ୧୬ରୁ ୨୪ ତାରିଖ ମଧ୍ୟରେ ଶେଷ ହେବ ।
ଏଥର ଓଡ଼ିଶା ରଣଜୀ ଟ୍ରଫି ଏଲିଟ୍ ଗ୍ରୁପ୍ ଏ’ରେ ସ୍ଥାନ ପାଇଛି । ଏହି ଗ୍ରୁପ୍ରେ ମୁମ୍ବାଇ, ବରୋଦା, ସର୍ଭିସେସ, ଜାମ୍ମୁ ଓ କାଶ୍ମୀର, ତ୍ରିପୁରା, ମହାରାଷ୍ଟ୍ର ଓ ମେଘାଳୟ ରହିଛନ୍ତି । ଗତ ସିଜନରେ ଜାନୁଆରୀରୁ ମାର୍ଚ୍ଚ ମାସ ମଧ୍ୟରେ ରଣଜୀ ଟ୍ରଫି ଖେଳାଯାଇଥିଲା । ପାଣିପାଗ ଖରାପ ରହିବାରୁ ବହୁ ମ୍ୟାଚ୍ ବାଧାପ୍ରାପ୍ତ ହୋଇଥିଲା । ତେଣୁ ଆଗାମୀ ସିଜନରେ ଦୁଇଟି ପର୍ଯ୍ୟାୟରେ ଟୁର୍ଣ୍ଣାମେଣ୍ଟ ଆୟୋଜନ କରିବା ନେଇ ବିସିସିଆଇ ନିଷ୍ପତ୍ତି ନେଇଛି । ଟିମ୍ ଇଣ୍ଡିଆ ମୁଖ୍ୟ କୋଚ୍ ରାହୁଲ ଦ୍ରାବିଡ଼, ଏନ୍ସିଏ ଅଧ୍ୟକ୍ଷ ଭିଭିଏସ୍ ଲକ୍ଷ୍ମଣ ଏବଂ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ପରାମର୍ଶକ୍ରମେ ବୋର୍ଡ ଏଭଳି ନିଷ୍ପତ୍ତି ନେଇଛି ।
