ଶାରଜା: ମୁମ୍ବାଇର ଜଣେ ଡିଜେ କ୍ଲେଟନ୍ ରୋଡ୍ରିଗେଜଙ୍କ ଆବେଦନକୁ ଖାରଜ କରିଦେଇଛନ୍ତି ଶାରଜା କୋର୍ଡ । ଡ୍ରଗ୍ସ କାରବାର ମାମଲାରେ ତାଙ୍କୁ ୨୫ ବର୍ଷ ଜେଲ ଦଣ୍ଡାଦେଶ ହୋଇଛି । ଏହା ବିରୋଧରେ ସେ ଯେଉଁ ଆବେଦନ କରିଥିଲେ ତାହାକୁ କୋର୍ଟ ଖାରଜ କରିଦେଇଛନ୍ତି । କ୍ଲେଟନ ଏବେ ଶାରଜା ଜେଲରେ ବନ୍ଦୀ ଅଛନ୍ତି । ଅଭିଯୁକ୍ତ ଆନ୍ଥୋନି ପଲ୍ ପାଇଁ ରୋଡ୍ରିଗେଜ୍ ଫସିଯାଇଛନ୍ତି । ତାଙ୍କ ସହ ଅନ୍ୟ ଜଣେ କ୍ରୀସାନ ପେରେରା ମଧ୍ୟ ଡ୍ରଗ୍ସ ମାମଲାରେ ଛନ୍ଦି ହୋଇଥିଲେ । ହେଲେ ସେ ଗତ ଅଗଷ୍ଟ ମାସରେ ସ୍ବଦେଶ ଫେରିଯିବାକୁ ସକ୍ଷମ ହୋଇଥିଲେ ।
ମୁମ୍ବାଇ ପୋଲିସର ଜଣେ ବରିଷ୍ଠ ଅଧିକାରୀଙ୍କ ଅନୁସାରେ, ଦଣ୍ଡାଦେଶ ବିରୋଧରେ କ୍ଲେଟନ୍ ରୋଡ୍ରିଗେଜଙ୍କ ଆବେଦନ ହାଇକୋର୍ଟ ଖାରଜ କରିଦେଇଥିବା ବେଳେ ସେ ଆବୁଧାବିର ସୁପ୍ରିମକୋର୍ଟରେ ଆବେଦନ କରିବେ । ତେବେ ତାଙ୍କୁ ଡ୍ରଗ୍ସ ମାମଲାରେ ଫସାଇ ଦିଆଯାଇଥିବା କଥା ହୁଏତ ସୁପ୍ରମକୋର୍ଟ ବିଚାରକୁ ନେବେ ବୋଲି ମୁମ୍ବାଇ ପୋଲିସ ଆଶାବାଦୀ ରହିଛି ।
ଆନ୍ଥୋନି ପଲ୍ ଜଣେ ପେଶାଦାର ଡ୍ରଗ୍ସ ବେପାରୀ ହୋଇଥିବା ବେଳେ ସେ ୫ ଜଣଙ୍କୁ ଶାରଜା ଏୟାରପୋର୍ଟରେ ଫସାଇବାକୁ ଚେଷ୍ଟା କରିଥିଲା । ସେମାନଙ୍କ ସହ ଡ୍ରଗ୍ସ ପଠାଇ ସେମାନଙ୍କୁ ସେଠାରେ ଗିରଫ କରାଇବାକୁ ଚାହିଁଥିଲା ଆନ୍ଥୋନି । ଏନେଇ ଜଣାପଡ଼ିବା ପରେ ଗତ ଏପ୍ରିଲ ମାସରେ ଆନ୍ଥୋନି ଏବଂ ତାର ସହଯୋଗୀ ରାଜେଶ ବୋରାଟେକୁ ମୁମ୍ବାଇ ପୋଲିସର କ୍ରାଇମ ବ୍ରାଞ୍ଚ ଗିରଫ କରିଥିଲା । ସେପଟେ ଶାରଜା ଏୟାରପୋର୍ଟରେ କ୍ଲେଟନ୍ ରୋଡ୍ରିଗେଜ ଏବଂ କ୍ରୀସାନ ପେରେରା ଡ୍ରଗ୍ସ ସହ ଧରାପଡ଼ିଯାଇଥିବା ବେଳେ ଅନ୍ୟ ୩ ଜଣ ଖସିଯିବାକୁ ସକ୍ଷମ ହୋଇଥିଲେ ।
ପୂର୍ବ ଶତ୍ରୁତାକୁ କେନ୍ଦ୍ର କରି ପଲ୍ ନିଜର ସହଯୋଗୀ ବୋରାଟେକୁ ଲଗାଇ କ୍ଲେଟନ୍ ରୋଡ୍ରିଗେଜ ଫସାଇବା ପାଇଁ ପ୍ଲାନ କରିଥିଲା । ଇଭେଣ୍ଟ ମ୍ୟାନେଜର ବୋଲି ନିଜକୁ ଦର୍ଶାଇ ଶାରଜାରେ ଏକ କାମ ପାଇଁ କ୍ଲେଟନ୍ ରୋଡ୍ରିଗେଜକୁ କହିଥିଲା ବୋରାଟେ । ଯେଉଁଦିନ କ୍ଲେଟନ୍ ରୋଡ୍ରିଗେଜ ବିମାନ ଯାତ୍ରା କରିବାର ଥିଲା ତାଙ୍କୁ ଏକ କେକରେ ଡ୍ରଗ୍ସ ପୂରାଇ ଦେଇଥିଲା ବୋରାଟେ । ଆଉ ଏହା ପରେ ପଲ୍ ଶରଜା ଏୟାରପୋର୍ଟ ଅଥୋରିଟିଙ୍କୁ ଫୋନ୍ କରି କ୍ଲେଟନ୍ ରୋଡ୍ରିଗେଜ ପାଖରେ ଡ୍ରଗ୍ସ ଥିବା ନେଇ ଜଣାଇଦେଇଥିଲା । ସେଠାରେ ପହଞ୍ଚିବା ପରେ ଏୟାରପୋର୍ଟ ଅଥୋରିଟି କ୍ଲେଟନ୍ ରୋଡ୍ରିଗର ବ୍ୟାଗ୍ ଯାଞ୍ଚ କରିବା ପରେ ଡ୍ରଗ୍ସ ବାହାରିଥିଲା । ପରେ କ୍ଲେଟନ୍ ରୋଡ୍ରିଗେଜଙ୍କୁ ବାନ୍ଧି ନେଇଥିଲା ପୋଲିସ । ସେପଟେ କ୍ଲେଟନ୍ ରୋଡ୍ରିଗେଜକୁ ପଲ ଫସାଇଥିବା ଜଣାପଡ଼ିବା ପରେ ମୁମ୍ବାଇ ପୋଲିସ ମଧ୍ୟ ତାଙ୍କ ସଜା କୋହଳ କରିବା ପାଇଁ ଚେଷ୍ଟା ଜାରି ରଖିଛି ।
