ଭୁବନେଶ୍ୱର,୧୧/୦୨: ଚଳିତ ଏଫ୍ଆଇଏଚ୍ ପ୍ରୋ-ଲିଗ୍ରେ ଭାରତୀୟ ପୁରୁଷ ଦଳ ଚିତ୍ତାକର୍ଷକ ବିଜୟ ସହ ଅଭିଯାନ ଆରମ୍ଭ କରିଛି । କଳିଙ୍ଗ ଷ୍ଟାଡ଼ିୟମ୍ରେ ଶନିବାର ଅନୁଷ୍ଠିତ ଏକ ମ୍ୟାଚ୍ରେ ଭାରତ ୪-୧ ଗୋଲ୍ରେ ସ୍ପେନ୍କୁ ହରାଇଥିଲା ।
ମ୍ୟାଚ୍ ଆରମ୍ଭରୁ ଭାରତ ପ୍ରଭାବ ବିସ୍ତାର କରି ଖେଳିଥିଲା । ସପ୍ତମ ମିନିଟ୍ରେ ହର୍ମନପ୍ରୀତ ସିଂହ ଏକ ପେନାଲ୍ଟି କର୍ଣ୍ଣରକୁ ଗୋଲ୍ରେ ପରିଣତ କରିବା ଫଳରେ ଭାରତ ୧-୦ରେ ଅଗ୍ରଣୀ ହାସଲ କରିଥିଲା ।
ଦ୍ୱିତୀୟ କ୍ୱାର୍ଟର ରୋମାଞ୍ଚକର ରହିଥିଲା । ଭାରତ ଘନ ଘନ ଆକ୍ରମଣ କରିଥିଲା । ୨୦ତମ ମିନିଟ୍ରେ ଭାରତ ପେନାଲ୍ଟି ହାତେଇଥିଲା । ହର୍ମନପ୍ରୀତ ଶକ୍ତିଶାଳୀ ଷ୍ଟ୍ରୋକ୍ ବଳରେ ପେନାଲ୍ଟିକୁ ଗୋଲ୍ରେ ରୂପାନ୍ତରିତ କରିଥିଲେ । ଏହାପରେ ୨୪ତମ ମିନିଟ୍ରେ ଭାରତ ଆଉ ଏକ ପେନାଲ୍ଟି କର୍ଣ୍ଣର ହାସଲ କରିଥିଲା ଓ ଗୁରଜନ୍ତ ସିଂହ ଏହାକୁ ଗୋଲ୍ରେ ପରିଣତ କରିଥିଲେ । ଭାରତ ଦ୍ୱିତୀୟ କ୍ୱାର୍ଟର ଶେଷ ସୁଦ୍ଧା ୩-୦ ଗୋଲ୍ରେ ଆଗୁଆ ରହିଥିଲା ।
ତୃତୀୟ କ୍ୱାର୍ଟରରେ ସ୍ପେନ୍ ଆକ୍ରମଣ କରିଥିଲା ଓ କଠିନ ପରିଶ୍ରମର ମୂଲ୍ୟ ମିଳିଥିଲା । ୩୪ତମ ମିନିଟ୍ରେ ଦଳକୁ ମିଳିଥିବା ଏକ ପେନାଲ୍ଟି କର୍ଣ୍ଣରକୁ ମାର୍କ ମିରାଲେସ୍ ଗୋଲ୍ରେ ପରିଣତ କରିବାରେ ସଫଳ ହୋଇଥିଲେ ।
ଚତୁର୍ଥ କ୍ୱରାର୍ଟରରେ ସ୍ପେନ୍ ଲଢୁଆ ଖେଳ ପ୍ରଦର୍ଶନ କରିଥିଲେ ହେଁ ଭାରତ ବାଜି ମାରି ଦେଇଥିଲା । ସ୍ପେନକୁ ୨ଟି ପେନାଲ୍ଟି କର୍ଣ୍ଣର ମିଳିଥିଲା ମାତ୍ର ଦଳ ବିଫଳ ହୋଇଥିଲା । ଅନ୍ୟ ପଟରେ ଭାରତ ପକ୍ଷରୁ ଲଳିତ ଉପାଧ୍ୟାୟ ୫୦ତମ ମିନିଟ୍ରେ ଏକ ଦର୍ଶନୀୟ ଫିଲ୍ଡ ଗୋଲ୍ କରିବା ଫଳରେ ଭାରତ ୪-୧ ଗୋଲ୍ରେ ବିଜୟ ହାସଲ କରିଥିଲା ।
ନେଦରଲାଣ୍ଡ୍ସ ୫-୧ ଆୟର୍ଲାଣ୍ଡ
ଅନ୍ୟ ଏକ ମ୍ୟାଚ୍ରେ ନେଦରଲାଣ୍ଡ୍ସ ୫-୧ ଗୋଲ୍ରେ ଆୟର୍ଲାଣ୍ଡକୁ ହରାଇଥିଲା । ଶକ୍ତିଶାଳୀ ନେଦରଲାଣ୍ଡ୍ସ ପ୍ରାରମ୍ଭରୁ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା । ୧୨ତମ ମିନିଟ୍ରେ ଜେପ ହୋଏଡମେକର୍ସ ଏକ ପେନକ୍ଟି କର୍ଣ୍ଣରକୁ ଗୋଲ୍ରେ ପରିଣତ କରିଥିଲେ । ସେହିପରି ୨୧ତମ ମିନିଟ୍ରେ ଜରିଟ୍ କ୍ରୁନ୍ଙ୍କ ଫିଲ୍ଡ ଗୋଲ୍ ବଳରେ ନେଦରଲାଣ୍ଡ୍ସ ୨-୦ ଗୋଲ୍ରେ ଅଗ୍ରଣୀ ହାସଲ କରିଥିଲା ।
ତୃତୀୟ କ୍ୱାର୍ଟର ସଂଘର୍ଷପୂର୍ଣ୍ଣ ରହିଥିଲା । ୩୫ତମ ମିନିଟ୍ରେ ଜିପ ଜାନସେନ ପେନାଲ୍ଟି ଷ୍ଟ୍ରୋକ୍କୁ ଗୋଲ୍ରେ ପରିଣତ କରି ଦଳକୁ ୩-୦ ରେ ଆଗେଇ ନେଇଥିଲେ । ମାତ୍ର ଆୟର୍ଲାଣ୍ଡ ପକ୍ଷରୁ ୩୬ତମ ମିନିଟ୍ରେ ଲି କୋଲ୍ ପେନାଲ୍ଟି ଷ୍ଟ୍ରୋକ ବଳରେ ଏକ ଗୋଲ୍ ପରିଶୋଧ କରିଥିଲେ ।
ଚତୁର୍ଥ କ୍ୱାର୍ଟରରେ ନେଦରଲାଣ୍ଡ୍ସ ଆଉ ୨ଟି ଗୋଲ୍ କରିଥିଲା । ଆୟର୍ଲାଣ୍ଡ ମ୍ୟାଚ୍କୁ ଫେରି ପାରିନଥିଲା । ୫୨ତମ ମିନିଟ୍ରେ ଜିପ ଜାନସେନ ପେନାଲ୍ଟି କର୍ଣ୍ଣରକୁ ଗୋଲ୍ ପୋଷ୍ଟରେ ପହଞ୍ଚାଇଥିଲେ । ସେହିପରି ୫୪ତମ ମିନିଟ୍ରେ ଷ୍ଟେଜିନ ଭାନ ହେଜିଙ୍ଗେନ ଫିଲ୍ଡ ଗୋଲ୍ କରିଥିଲେ ।
