ପ୍ୟାରିସ,୨୭/୦୭ ଦୀର୍ଘ ପ୍ରତୀକ୍ଷାର ଅନ୍ତଃ ଘଟାଇ ଶେଷରେ ମହାଆଡ଼ମ୍ବରରେ ପ୍ରାଚ୍ୟୁର୍ଯ୍ୟ ଭରା ପ୍ୟାରିସ ନଗରୀରେ ଆରମ୍ଭ ହୋଇଛି ଅଲିମ୍ପିକ୍ସ କ୍ରୀଡ଼ାର ୩୩ତମ ସଂସ୍କରଣ । ପ୍ୟାରିସ ନଗରୀର ଜୀବନରେଖା ସେନ ନଦୀରେ ଅଲିମ୍ପିକ୍ସ ଇତିହାସରେ ପ୍ରଥମ ଥର ଉଦ୍ଘାଟନୀ ଉତ୍ସବ ଆୟୋଜିତ ହୋଇଥିଲା । ୨୦୬ ରାଷ୍ଟ୍ରରୁ ୭୦୦୦ କ୍ରୀଡ଼ାବିତ ଡଙ୍ଗା ପରେଡରେ ଛଅ କିଲୋ ମିଟର ଯାତ୍ରା କରିଥିଲେ । ଏଥିପାଇଁ ୮୫ଟି ବଡ଼ ବଡ଼ ଡଙ୍ଗା ନିୟୋଜିତ ହୋଇଥିଲା । ଅଷ୍ଟ୍ରେର୍ଲିଜ ବ୍ରିଜ୍ (ପୋଲ) ପାଖରୁ ଆରମ୍ଭ ହୋଇଥିଲା ଉଦ୍ଘାଟନୀ ଉତ୍ସବ । ପରେଡ୍ ଶେଷରେ ୧୬ଟି ପୋଲ ଅତିକ୍ରମ କରି ଆଇଫିଲ ଟାୱାର ନିକଟରେ ଶେଷ ହୋଇଥିଲା । ରଙ୍ଗାରଙ୍ଗ ଆଲୋକମାଳା, ନଦୀ ଗର୍ଭରେ ଜଳ ଫୁତ୍କାର ଏବଂ ଆତସବାଜି ଆକର୍ଷଣର ମୁଖ୍ୟ କେନ୍ଦ୍ରବିନ୍ଦୁ ପାଲଟିଥିଲା ।
ସାଂସ୍କୃତିକ କାର୍ଯ୍ୟକ୍ରମରେ ଥିଲା ବିଶ୍ୱକୁ ପ୍ରେମଭରା ଶାନ୍ତିର ବାର୍ତ୍ତା ଏବଂ ପ୍ରଦର୍ଶିତ ହୋଇଥିଲା ଫ୍ରାନ୍ସର କଳା, ସଂସ୍କୃତି ଓ ଐତିହ୍ୟର ଛବି । ୩ ହଜାର କଳାକାର ଏଥିରେ ଭାଗ ନେଇଥିଲେ । ବେଶ ମନମୁଗ୍ଧକର ଥିଲା ପରିବେଶ । ପ୍ରଥମ ଥର ଅଲିମ୍ପିକ୍ସପ୍ରେମୀ ଷ୍ଟାଡିୟମ ପରିବର୍ତ୍ତେ ଖୋଲା ଆକାଶତଳେ ଉଦ୍ଘାଟନୀ ଉତ୍ସବର ରୋମାଞ୍ଚ ନେଇଥିଲେ । ପ୍ରସିଦ୍ଧ କଣ୍ଠଶିଳ୍ପୀ ଲେଡି ଗାଗା, ସେଲିନ ଡିୟନ ଏବଂ ପପ୍ ଷ୍ଟାର ଆୟା ନାକାମୁରାଙ୍କ ଧମାକାଦାର ଶୋ ପରିବେଶକୁ ମନ୍ତ୍ରମୁଗ୍ଧ କରିଥିଲା । ମଝିରେ ମଝିରେ ହାଲକା ବର୍ଷା ସମସ୍ତଙ୍କୁ ଭିଜାଇ ଦେଉଥିଲା । ଶେଷରେ ଆନୁଷ୍ଠାନିକ ଭାବେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରନ କ୍ରୀଡ଼ା ଶୁଭାରମ୍ଭ ଘୋଷଣା କରିଥିଲେ । ଆଇଫିଲ ଟାୱାର ନିକଟରେ ଶେଷରେ ଉତ୍ସବ ସମାପିତ ହୋଇଥିଲା । ଅନ୍ତର୍ଜାତୀୟ ଅଲିମ୍ପିକ୍ସ କମିଟର ସଭାପତି ଥୋମାସ ବାକ୍ ଏବଂ ୮୦ଟିରୁ ଊଦ୍ଧ୍ୱର୍ ରାଷ୍ଟ୍ରର ମୁଖ୍ୟମାନେ ଉତ୍ସବରେ ଯୋଗ ଦେଇଥିଲେ ।
୧୦୦ ବର୍ଷ ପରେ ପ୍ୟାରିସକୁ ଅଲିମ୍ପିକ୍ସ କ୍ରୀଡ଼ା ଫେରିଛି । ପୂର୍ବରୁ ଏଠାରେ ୧୯୦୦ ଓ ୧୯୨୪ରେ ଦୁଇ କ୍ରୀଡ଼ା ଆୟୋଜିତ ହୋଇଥିଲା। ଉଦଘାଟନୀ ପାଇଁ ପ୍ୟାରିସ ନଗରୀରେ କଡ଼ା ସୁରକ୍ଷା ବ୍ୟବସ୍ଥା ହୋଇଛି । ଆଜି ଉଦ୍ଘାଟନୀ ସ୍ଥଳ ଠାରୁ ପୂରା ସହରକୁ ୪୫ ହଜାର ସୁରକ୍ଷାକର୍ମୀ ଜଗି ରହିଥିଲେ । ତଥାପି ସକାଳୁ ପ୍ୟାରିସକୁ ଯୋଗାଯୋଗ ବିଛିନ୍ନ କରିବା ପାଇଁ ଷଡ଼ଯନ୍ତ୍ର ହୋଇଥିଲା । ସହରର ଚତୁର୍ଦିଗରୁ ହାଇ-ସ୍ପିଡ୍ ରେଳ ସିଗନାଲ୍ ବକ୍ସକୁ ଆକ୍ରମଣକାରୀମାନେ ନିଆଁ ଲଗାଇ ଦେଇଥିଲେ । ଫଳରେ ସହରକୁ ରେଳ ଯୋଗାଯୋଗ ସଂପୂର୍ଣ୍ଣ ଅଚଳ ହୋଇ ଯାଇଥିଲା । ଅଲିମ୍ପିକ୍ସ ଇତିହାସରେ ଏହା ପ୍ରଥମ କ୍ରୀଡ଼ା ଯାହା ଉଦ୍ଘାଟନୀର ସପ୍ତାହେ ପୂର୍ବରୁ ସହରକୁ ଲକ୍ଡାଉନ କରି ଦିଆଯାଇଥିଲା ।
ପ୍ୟାରିସ କ୍ରୀଡ଼ାରେ ୨୦୬ ରାଷ୍ଟ୍ରରୁ ୧୦,୭୧୪ କ୍ରୀଡ଼ାବିତ ୩୨ଟି କ୍ରୀଡ଼ାର ୩୨୮ଟି ଇଭେଣ୍ଟରେ ଅଂଶ ଗ୍ରହଣ କରିଛନ୍ତି । କ୍ରୀଡ଼ା ଆସନ୍ତା ମାସ ୧୧ ତାରିଖରେ ଉଦ୍ଯାପିତ ହେବ । ୧୧୭ ଜଣିଆ ଭାରତୀୟ ଦଳ ଅଲିମ୍ପିକ୍ସରେ ଭାଗ ନେଇଛି । କିନ୍ତୁ ଆଜି କ୍ରୀଡ଼ାବିତ ଓ ଅଫିସିଆଲମାନଙ୍କୁ ନେଇ ୭୮ ଜଣ ପରେଡରେ ସାମିଲ ହୋଇଥିଲେ । ଦୁଇ ଥର ଅଲିମ୍ପିକ୍ସ ପଦକ ବିଜେତା ପିଭି ସିନ୍ଧୁ ଏବଂ ଟେବୁଲ ଟେନିସ ତାରକା ଶରତ କମଲ ଦଳର ନେତୃତ୍ୱ ନେଇ ତ୍ରିରଙ୍ଗା ଧାରଣ କରିଥିଲେ ।
ସୁଟିଂରେ ପ୍ରଥମ ପଦକ ସୁଯୋଗ
ପ୍ୟାରିସ୍ ଅଲିମ୍ପିକ୍ସର ଦ୍ୱିତୀୟ ଦିବସରେ ବିଭିନ୍ନ କ୍ରୀଡ଼ା ଇଭେଣ୍ଟରେ ଏକାଧିକ ଭାରତୀୟ ଆକ୍ସନକୁ ଓହ୍ଲାଇବେ । ସୁଟିଂ କ୍ରୀଡ଼ାରେ ଭାରତ ନିକଟରେ ପଦକ ଖାତା ଖୋଲିବାର ସୁବର୍ଣ୍ଣ ସୁଯୋଗ ରହିଛି । ସେହିପରି ହକି, ବ୍ୟାଡ଼ମିଣ୍ଟନ, ଟେନିସ୍, ଟେବୁଲ ଟେନିସ୍, ବକ୍ସିଂ, ରୋଇଂ ଇଭେଣ୍ଟରେ ଭାରତୀୟ ପ୍ରତିଯୋଗୀ ଅଭିଯାନ ଆରମ୍ଭ କରିବେ ।
ଶନିବାର ସୁଟିଂରେ ୧୦ମିଟର ଏୟାର ରାଇଫଲ୍ ମିକ୍ସଡ୍ ଟିମ୍ ଇଭେଣ୍ଟର ଯୋଗ୍ୟତା ଏବଂ ପଦକ ରାଉଣ୍ଡ୍ ରହିଛି । ଏଥିରେ ଭାରତର ଅର୍ଜୁନ ବାବୁତା ଓ ରମିତା ଜିନ୍ଦଲ ଏବଂ ଏଲାଭେନିଲ୍ ଭାଲାରିଭାନ୍ ଓ ସନ୍ଦୀପ ସିଂହ ଭାଗ ନେବେ । ଯୋଗ୍ୟତା ରାଉଣ୍ଡ୍ ଅପରାହ୍ଣ ୧୨.୩୦ରୁ ଆରମ୍ଭ ହେବ । ଭାରତୀୟ ଯୋଡ଼ିଙ୍କ ନିକଟରୁ ଏକ ପଦକ ଆଶା କରାଯାଉଛି । ଏଥିରେ ମୋଟ ୨୮ଟି ଯୋଡ଼ି ଭାଗ ନେବେ। ଚୀନର ଡୁ’ ଲିଙ୍ଗସୁ-ହାନ୍ ଜିଆୟୁ ଯୋଡ଼ି ଡିଫେଣ୍ଡିଂ ଚାମ୍ପିଅନ୍ ରହିଛନ୍ତି ।
ସେହିପରି ଆମେରିକାର ମେରୀ କାରୋଲିନ ଟକର ଓ ର୍ୟାନ୍ କିସେଲ ଏବଂ ଫ୍ରାନ୍ଦର ମନୋନ ହର୍ବୋଲ୍ଟ ଓ ରୋମେନ ଔଫ୍ରେରେ ଯୋଡ଼ି ପଦକ ଦାବିଦାରଙ୍କ ମଧ୍ୟରେ ସାମିଲ ରହିଛନ୍ତି । ସେହିପରି ମହିଳା ୧୦ମିଟର ଏୟାର ପିସ୍ତଲ୍ ଯୋଗ୍ୟତା ରାଉଣ୍ଡ୍ରେ ମନୁ ଭାକର ଓ ରିଦମ ସାଙ୍ଗୱାନ୍ ଏବଂ ପୁରୁଷ ବର୍ଗରେ ସରବଜୋତ ସିଂହ ଓ ଅର୍ଜୁନ ସିଂହ ଚୀମା ଆକ୍ସନକୁ ଓହ୍ଲାଇବେ ।