ପ୍ୟାରିସ, ୦୬/୦୯: ପାରାଲିମ୍ପିକ୍ସର ଅଷ୍ଟମ ଦିବସରେ ଜୁଡୋରେ କପିଳ ପାରମରଙ୍କ ବ୍ରୋଞ୍ଜରୁ ଭାରତର ପଦକ ଯାତ୍ରା ଆରମ୍ଭ ହୋଇଥିଲା। ବୁଧବାର ବିଳମ୍ବିତ ରାତିରେ ପୁରୁଷ କ୍ଲବ ଥ୍ରୋରେ ଡବଲ ପଦକ ମିଳିଥିଲା । ଧରମବୀର ସ୍ୱର୍ଣ୍ଣ ଏବଂ ପ୍ରଣବ ସୁରମା ରୌପ୍ୟ ପଦକ ଜିତିଥିଲେ । ପୂର୍ବରୁ ହାଇଜମ୍ପ ଏବଂ ଜାଭେଲିନ ଥ୍ରୋରେ ଡବଲ ପଦକ ମିଳିଥିଲା । ଭାରତର ପଦକ ସଂଖ୍ୟା ୨୫ରେ (୫ ସ୍ୱର୍ଣ୍ଣ, ୯ ରୌପ୍ୟ ଓ ୧୧ ବ୍ରୋଞ୍ଜ) ପହଞ୍ଚିଛି । ଟୋକିଓରେ ମୋଟ୍ ୧୯ଟି ପଦକ ମିଳିଥିଲା ।
ଜୁଡୋ (ଜେ-୧): ପୁରୁଷ ୬୦ କିଲୋ ଓଜନ ବର୍ଗରେ କପିଳ ବ୍ରୋଞ୍ଜ ପଦକ ଜିତିଛନ୍ତି । ସେ ବ୍ରୋଞ୍ଜ ଲଢ଼େଇରେ ୧୦-୦ରେ ବ୍ରାଜିଲର ଏଲିଏଲଟନ ଓଲିଭେଇରାଙ୍କୁ ପରାଜିତ କରିଥିଲେ । ସେମି ଫାଇନାଲରେ କପିଳ ୧୦-୦ରେ ଇରାନର ସୟେଦ ମେୟସାମଙ୍କ ଠାରୁ ପରାଜିତ ହୋଇଥିଲେ ।
କ୍ଲବ୍ ଥ୍ରୋ (ଏଫ୍ ୫୧): ଧରମବୀର ଏରିଆ ରେକର୍ଡ ସହ (୩୪.୯୨ ମିଟର) ପ୍ରଥମ ସ୍ଥାନ ହାସଲ କରିଥିଲେ । ୩୪.୫୯ ମିଟର ଥ୍ରୋ କରି ପ୍ରଣବ ରୌପ୍ୟ ଏବଂ ସର୍ବିଆର ଜେଲଜକୋ ଦିମିତ୍ରିଜେଭିକ ବ୍ରୋଞ୍ଜ ଜିତିଥିଲେ । ଧରମବୀରଙ୍କ ପ୍ରଥମ ୪ଟି ପ୍ରୟାସ ଫାଉଲ ହୋଇଥିଲା । ପଞ୍ଚମ ପ୍ରୟାସରେ ୩୪.୯୨ ମିଟର ଥ୍ରୋ କରିଥିଲେ । ପ୍ରଣବ ପ୍ରଥମ ପ୍ରୟାସରେ ହିଁ ରୌପ୍ୟ ପକ୍କା କରିଥିଲେ ।
ପୁରୁଷ ବ୍ୟକ୍ତିଗତ ରିକର୍ଭ ଓପନରେ ହରବିନ୍ଦର ପ୍ରଥମ ଭାରତୀୟ ଭାବେ ଫାଇନାଲରେ ପ୍ରବେଶ କରି ରୌପ୍ୟ ନିଶ୍ଚିତ କରିଥିଲେ । ସେ ଫାଇନାଲରେ ୬-୦ରେ ପୋଲାଣ୍ଡର ଲୁକାସ ସିସଜେକଙ୍କୁ ପରାଜିତ କରି ସ୍ୱର୍ଣ୍ଣ ଜିତିଥିଲେ । ହରବିନ୍ଦର ଭାରତର ପ୍ରଥମ ପାରା ତୀରନ୍ଦାଜ ଭାବେ ପାରାଲିମ୍ପିକ୍ସରେ ସ୍ୱର୍ଣ୍ଣ ଜିତିଛନ୍ତି । ପୂର୍ବରୁ ସେମି ଫାଇନାଲରେ ସେ ୭-୩ରେ ଇରାନର ମହମ୍ମଦ ରେଜାଙ୍କୁ ହରାଇଥିଲେ । ସେମିତି କ୍ୱାର୍ଟରରେ କଲମ୍ବିଆର ଜୁଲିଓ ହେକ୍ଟରଙ୍କୁ ୬-୨ରେ ପରାସ୍ତ କରିଥିଲେ ।
ଟୋକିଓ ଅଲିମ୍ପିକ୍ସରେ ହରବିନ୍ଦର ବ୍ରୋଞ୍ଜ ପଦକ ଜିତିଥିଲେ । ଏସୀୟ ପାରା କ୍ରୀଡ଼ାରେ ସେ ଗୋଟିଏ ସ୍ୱର୍ଣ୍ଣ ଓ ଗୋଟିଏ ବ୍ରୋଞ୍ଜ ଜିତିଥିଲେ । ସେ ଜଣେ ଉଚ୍ଚ ଶିକ୍ଷିତ । ଅର୍ଥନୀତିରେ ପିଏଚ୍ଡି ହାସଲ କରିଛନ୍ତି ।
ମହିଳା ୧୦୦ମିଟର: ସିମରନ ଚତୁର୍ଥ ବିଶ୍ୱ ଚାମ୍ପିଅନସିପ୍ ସ୍ୱର୍ଣ୍ଣ ପଦକ ବିଜୟିନୀ ଦୃଷ୍ଟି ବାଧିତ ମହିଳା ଆଥଲେଟ୍ ସିମରନ ଶର୍ମା ୧୦୦ମି. (ଟି-୧୨) ଦୌଡ଼ରେ ଅଳ୍ପକେ ପଦକରୁ ବଞ୍ଚିତ ହୋଇଛନ୍ତି । ସେ ଫାଇନାଲ୍ରେ ୧୨.୩୧ ସେକେଣ୍ଡରେ ନିର୍ଦ୍ଧାରିତ ଦୂରତା ଅତିକ୍ରମ କରି ଚତୁର୍ଥ ସ୍ଥାନରେ ସନ୍ତୁଷ୍ଟ ହୋଇଥିଲେ । ମାତ୍ର ୦.୦୫ ସେକେଣ୍ଡ ପାଇଁ ପଦକ ହାତଛଡ଼ା କରିଥିଲେ । ପୂର୍ବରୁ ସେମି ଫାଇନାଲ୍ରେ ସେ ହିଟ୍-୨ରେ ଦୌଡ଼ି ଥିଲେ ଏବଂ ନିର୍ଦ୍ଧାରିତ ଦୂରତାକୁ ୧୨.୩୩ ସେକେଣ୍ଡରେ ଅତିକ୍ରମ କରି ଦ୍ୱିତୀୟ ସ୍ଥାନରେ ରହିଥିଲେ । ତାଙ୍କ ଗାଇଡ୍ ହେଉଛନ୍ତି ଅଭୟ ସିଂହ ।
କ୍ୟୁବାର ଓମାରା ଡୁରାଣ୍ଡ ଇଲିଆସ୍ ୧୧.୮୧ ସେକେଣ୍ଡରେ ରେସ୍ ଶେଷ କରି ଟାଇଟଲ୍ ବଜାୟ ରଖିଥିଲେ । ସେହିପରି ୟୁକ୍ରେନର ଓକସାନା (୧୨.୧୭) ରୌପ୍ୟ ଏବଂ ଜର୍ମାନୀର କାଟ୍ରିନ ମୁଲର (୧୨.୨୬) ବ୍ରୋଞ୍ଜ ପଦକ ହାସଲ କରିଛନ୍ତି । ଓମାରାଙ୍କ ନାମରେ ପୂର୍ବରୁ ବିଶ୍ୱ ରେକର୍ଡ଼ (୧୧.୪୦ସେକେଣ୍ଡ୍) ଏବଂ ପାରାଲିମ୍ପିକ୍ସ ରେକର୍ଡ଼ ରହିଛି । ଓମାରା ପାରାଲିମ୍ପିକ୍ସରେ କ୍ରମାନ୍ୱୟରେ ଚତୁର୍ଥ ଥର ୧୦୦ମିଟର ଟାଇଟଲ୍ ବଜାୟ ରଖିଛନ୍ତି । ସେ ମୋଟ ୧୦ଟି ସ୍ୱର୍ଣ୍ଣ ପଦକ ଜିତିଛନ୍ତି । ଚଳିତ ସଂସ୍କରଣରେ ସେ ୪୦୦ମି. (ଟି-୧୨) ଟାଇଟଲ୍ ବଜାୟ ରଖିଛନ୍ତି ।
ତୀରନ୍ଦାଜୀ: ହରବିନ୍ଦର-ପୂଜା ବ୍ରୋଞ୍ଜରୁ ବଞ୍ଚିତ
ମିକ୍ସଡ୍ ଟିମ୍ ଇଭେଣ୍ଟରେ ହରବିନ୍ଦର ସିଂହ ଓ ପୂଜା ଯୋଡ଼ି ବ୍ରୋଞ୍ଜ ପଦକ ହାତଛଡ଼ା କରିଛନ୍ତି । ଉଭୟ ତୃତୀୟ-/ଚତୁର୍ଥ ମ୍ୟାଚ୍ରେ ସୁଟ୍ ଅଫ୍ରେ ସ୍ଲୋଭେନିଆ ଯୋଡ଼ିଙ୍କ ନିକଟରୁ ହାରି ଯାଇଥିଲେ । ପୂର୍ବରୁ ଭାରତୀୟ ଯୋଡ଼ି ସେମିରେ ୨-୬ରେ ଇଟାଲୀର ଏଲିସାବେଟ୍ଟା ମିଜନୋ ଓ ଷ୍ଟିଫାନୋ ଟ୍ରାଭିସାନି ଯୋଡ଼ିଙ୍କ ନିକଟରୁ ହାରି ସ୍ୱର୍ଣ୍ଣ/ରୌପ୍ୟ ଦୌଡ଼ରୁ ବାଦ୍ ପଡ଼ିଥିଲେ । ଉଭୟ ପ୍ରି-କ୍ୱାର୍ଟରରେ ସୁଟ୍ ଅଫ୍ରେ ଅଷ୍ଟ୍ରେଲିଆର ଆମାଣ୍ଡା ଜେନିଙ୍ଗ୍ସ ଓ ତାଏମୋନ କେଣ୍ଟନ- ସ୍ମିଥ୍ ଯୋଡ଼ିଙ୍କୁ ୫-୪ରେ ଏବଂ କ୍ୱାର୍ଟରରେ ୬-୦ରେ ପୋଲାଣ୍ଡର ମିଲିନା ଓଲ୍ସଜିଓସ୍କା ଓ ଲୁକାସ ସିସଜେକ୍ ଯୋଡ଼ିଙ୍କୁ ହରାଇଥିଲେ ।
