ନୂଆଦିଲ୍ଲୀ, ୨୬/୦୭: ଶୁକ୍ରବାର ଉଦ୍‌ଘାଟନୀ ଉତ୍ସବରେ ଭାରତୀୟ ଦଳର ନେତୃତ୍ୱ ନେଇ ତ୍ରିରଙ୍ଗା ଧାରଣ କରିବେ  କ୍ରମାନ୍ୱୟରେ ଦୁଇ ଥର ପଦକ ବିଜେତା ପିଭି  ସିନ୍ଧୁ ଏବଂ ଭେଟେରାନ ଟେବୁଲ ଟେନିସ ଖେଳାଳି ଶରତ କମଲ । 

ସ୍ୱତନ୍ତ୍ର ପୋଷାକ ପରିଧାନ କରି ହାତରେ ପତାକା ଧରି ଭାରତୀୟ କ୍ରୀଡ଼ାବିତ ଡଙ୍ଗା  ପରେଡ୍‌ରେ ସାମିଲ ହେବେ । ପରେଡ୍‌  ଅଷ୍ଟ୍ରେର୍ଲିଜ ବ୍ରିଜ୍‌ (ପୋଲ) ପାଖରୁ ଉତ୍ସବ ଆରମ୍ଭ  ହୋଇ ଆଇଫିଲ ଟାୱାର ନିକଟରେ ଶେଷ ହେବ । 

ବ୍ୟାଡମିଣ୍ଟନ ତାରକା ସିନ୍ଧୁ ରିଓ  ଅଲିମ୍ପିକ୍ସରେ ରୌପ୍ୟ ପଦକ ଜିତିଥିଲେ । ପୁଣି ଟୋକିଓରେ ବ୍ରୋଞ୍ଜ । ଏଥର ସେ  ହ୍ୟାଟ୍ରିକ୍‌ ପଦକ ଜିତିବା ନେଇ ଲକ୍ଷ୍ୟ  ରଖିଛନ୍ତି । ସେମିତି ଭେଟେରାନ କମଲ  ଅଲିମ୍ପିକ୍ସରେ ନିଜର ଶ୍ରେଷ୍ଠ ପ୍ରଦର୍ଶନ ଦେବାକୁ  ପ୍ରସ୍ତୁତ ରହିଛନ୍ତି । ଭାରତୀୟ ଅଲିମ୍ପିକ୍ସ ସଂଘ  ସଭାପତି ପିଟି ଉଷା ଏବଂ ଭାରତୀୟ ଅଲିମ୍ପିକ୍ସ  ଦଳର ଚିଫ୍‌ ଡି ମିଶନ ଗଗନ ନାରଙ୍ଗ ମଧ୍ୟ ଉଦ୍‌ଘାଟନୀରେ ଉପସ୍ଥିତ ରହିବେ । 

ଗତ ଟୋକିଓରେ ଭାରତ ସର୍ବାଧିକ ୭ଟି  ପଦକ ଜିତିଥିଲା । ପ୍ୟାରିସ ଦଳ ଦୁଇ ଅଙ୍କ  ଛୁଇଁବ ବୋଲି ଆଶା ରହିଛି । ନୀରଜ ଚୋପ୍ରା ଜାଭେଲିନ ଥ୍ରୋରେ ଅଲିମ୍ପିକ୍ସ ଟାଇଟଲ ବଜାୟ ରଖିବେ ବୋଲି ବିଶ୍ୱାସ କରାଯାଉଛି ।