ଭୁବନେଶ୍ୱର,୨୭/୦୭: ରାଜ୍ୟ ବଜେଟ୍ ସବୁ ବର୍ଗକୁ କେଞ୍ଚେ ମେଞ୍ଚେ ଦେଲେ ହେଲେ ଓଡ଼ିଆ ସିନେମା ପାଇଁ କିଛି ଦେଲେ ନାହିଁ । କେବଳ କଳିଙ୍ଗ ଷ୍ଟୁଡିଓ ପାଇଁ ୨୦ କୋଟି ଟଙ୍କା ବ୍ୟୟବରାଦ ପ୍ରସ୍ତାବ ଦିଆଯାଇଛି । ରାଜ୍ୟରେ ଏକ ଫିଲ୍ମ ସିଟି ନିର୍ମାଣ କରିବାକୁ ଯୋଜନା ରହିଛି । ବାସ୍ ଏତିକି । ୨୦୨୪- ୨୫ ବଜେଟ୍ରେ ମୋହନ ସରକାର ଓଡ଼ିଆ ସିନେମା ପାଇଁ ଏହି ଅନୁକମ୍ପା ଦେଖାଇଛନ୍ତି ଯାହାକୁ ନେଇ ଓଡ଼ିଆ ଚଳଚ୍ଚିତ୍ର ଜଗତ (ଓଲିଉଡ୍)ରେ ନିରାଶ ଦେଖାଦେଇଥିଲାବେଳେ ଅସନ୍ତୋଷ ପ୍ରକାଶ ପାଇଛି ।
କଳାକାରଙ୍କ କହିବା କଥା, ଏଠି ଯୋଉ ସରକାର ଆସିଲେ ସେ କଳିଙ୍ଗ ଷ୍ଟୁଡିଓକୁ ଜାବୁଡ଼ି ଧରିଲେ । ସେ ଷ୍ଟୁଡିଓ କାହା କାମରେ ଆସୁ କି ନ ଆସୁ, ଲାଭ ଦେଉ କି ନ ଦେଉ ଏହା ଆମ ପାଇଁ ବଡ଼ ସମ୍ପତ୍ତି । ବାକି ସବୁ ଚୁଲିକି ଯାଉ । ସରକାର ବଜେଟ୍ ଆଣିଲେ ଅଥଚ ଓଡ଼ିଆ ସିନେମାର ଉନ୍ନତି ତଥା ଅନ୍ୟାନ୍ୟ ଦିଗକୁ ଦେଖିଲେ ନାହିଁ । ୮୮ ବର୍ଷ ଓଡ଼ିଆ ସିନେମା ଶିଳ୍ପରେ ଅନେକ ସମସ୍ୟା ବର୍ଷ ବର୍ଷ ଧରି ମୁଣ୍ଡ ଟେକି ଛିଡ଼ା ହୋଇଥିଲାବେଳେ ବି ସରକାରଙ୍କୁ ତାହା ଦିଶିଲା ନାହିଁ ଯାହା ବେଶି ଦୁଃଖ ଦେଉଛି ବୋଲି କଳାକାରମାନେ କହିଛନ୍ତି ।
ବଡ଼ କଥା ହେଲା, ନୂଆ ସରକାର କ୍ଷମତାକୁ ଆସିବା ପରେ ଓଡ଼ିଆ ସିନେମାର ଉନ୍ନତି ଚିନ୍ତା କରୁଥିବା ଅନେକ ସଂଘ, ଅନୁଷ୍ଠାନ ଓ ବ୍ୟକ୍ତି ନିଜ ନିଜ ସ୍ତରରେ ସରକାରଙ୍କ ସହ ଆଲୋଚନା କଲେ । ମୁଖ୍ୟମନ୍ତ୍ରୀ, ଶିଳ୍ପ ମନ୍ତ୍ରୀଙ୍କଠୁ ଆରମ୍ଭ କରି ବିଭାଗୀୟ ସଚିବ ଏପରିକି ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ (ଓଏଫ୍ଡିସି) ଏମ୍ଡିଙ୍କୁ ଭେଟି ୫ ଦଫା, ୧୦ ଦଫା ଦାବି ପତ୍ର ବି ଦେଲେ । ନୂଆ ସଂଘ ଗଢ଼ି ସାମ୍ବାଦିକ ସମ୍ମିଳନୀ କରି ସସସ୍ୟା ରଖିଲେ, ଚଳଚ୍ଚିତ୍ର ନୀତି ସହ ବହୁ ଦାବି ରଖିଲେ ।
କହିଲେ ମନ୍ତ୍ରୀ କହିଛନ୍ତି, ସବୁ ହେବ । କିନ୍ତୁ ଯେତେବେଳେ ବଜେଟ୍ ଆସିଲା, ସେତେବେଳେ ସବୁ ଫୁସ୍ । ହାତ ଖାଲି । ଯେଉଁମାନେ କିଛି ଦିନ ପୂର୍ବରୁ ଦଳବଳ ନେଇ ମାତିଥିଲେ ଏବଂ ଓଏଫ୍ଡିସି ଅଧ୍ୟକ୍ଷ ପଦବି ଆଶାରେ ଡେଉଁଥିଲେ ସେମାନେ ସବୁ ଚୁପ୍ । କାହାରି ମୁହଁ ଖୋଲୁନି । ଏପଟେ କିନ୍ତୁ ଅନ୍ୟ କଳାକାର, ସମୀକ୍ଷକ, ମିଡିଆ ପ୍ଲାନର୍ ସରକାରଙ୍କୁ ସମାଲୋଚନା କରିବା ସହ ଏହା ଓଡ଼ିଆ ସିନେମା ପ୍ରତି ଅନ୍ୟାୟ ବୋଲି କହିଛନ୍ତି । ଅନ୍ୟପକ୍ଷରେ କିଛି ସିନେପ୍ରେମୀ ଓଡ଼ିଆ ସିନେମାର ଅନ୍ତୁଡ଼ିଶାଳ ଶ୍ରୀକ୍ଷେତ୍ର ପୁରୀରୁ ଆନ୍ଦୋଳନ କରିବାକୁ ପ୍ରସ୍ତୁତ ହେଲେଣି ।
ଅଭିନେତା ବୁଦ୍ଧାଦିତ୍ୟ ମହାନ୍ତି କହିଛନ୍ତି, ଗତ ସରକାରରେ ଆମେ ଧାରଣାରେ ବସିଥିଲୁ, ବହୁ ଆଲୋଚନା ହୋଇଥିଲା । ଏବେ ନୂଆ ସରକାର । ଏଥିରେ ଅନେକ କଳାକାରଙ୍କୁ ନେତା ହେବାର ସୁଯୋଗ ମିଳିଛି । ପୂର୍ବ ସରକାରରେ ମଧ୍ୟ ଅନେକ କଳାକାର ବିଧାୟକ ଏବଂ ସାଂସଦ ଥିଲେ । ଓଡ଼ିଶାରୁ ବି ଅନେକ କଳାକାର ନୂଆ ସରକାରରେ ଅଛନ୍ତି । ତା’ ପରେ ବି ସିନେ ଜଗତ ତଥା କଳାକାରଙ୍କ ଉନ୍ନତି ନିମନ୍ତେ କିଛି ନହେବା ଅତି ଦୁଃଖର କଥା । ଅଭିନେତା ମନୋଜ ମିଶ୍ର କହିଛନ୍ତି, ଓଡ଼ିଆ ସିନେମାର ସୁପର୍ଷ୍ଟାର୍ ମାନେ ଧ୍ୟାନ ଦିଅନ୍ତୁ, ଆପଣମାନେ ଦଳ ବଦଳେଇଲା ପରେ ବି ଆପଣଙ୍କ ଦଳ ଏଥର ବଜେଟ୍ରେ ଓଡ଼ିଆ ସିନେମା ପାଇଁ କିଛି କରିନାହାନ୍ତି ।
ଅଭିନେତା ପାର୍ଥସାରଥୀ ରାୟ କହିଛନ୍ତି, ସିନେମା ଶିଳ୍ପ ପାଇଁ ସମ୍ପୂର୍ଣ୍ଣ ଉଦାସୀନ ମନୋଭାବ ଅତ୍ୟନ୍ତ ଯନ୍ତ୍ରଣାଦାୟକ । ଅଭିନେତା ସୋମେଶ ମହାନ୍ତି ସୋସିଆଲ୍ ମିଡିଆରେ ବଜେଟ୍ର ଏକ ପୃଷ୍ଠା ପୋଷ୍ଟ କରି ସିନେମା ପାଇଁ ସରକାରଙ୍କ ପଦକ୍ଷେପ କ’ଣ ବୋଲି ପ୍ରଶ୍ନ କରିଛନ୍ତି ଏବଂ ବଜେଟ୍ରେ ସିନେମାର ସ୍ଥାନ କେଉଁଠି ତାହା ଖୋଜିଛନ୍ତି ।
ମିଡିଆ ପ୍ଲାନର୍ ପ୍ରଣୟ ଜେଠୀ କହିଛନ୍ତି, ଓଡ଼ିଆ ସିନେମା ଶିଳ୍ପକୁ ଷ୍ଟୁଡିଓ ପରିସରରେ ସୀମିତ ରଖିଥିବାରୁ ସରକାରଙ୍କୁ ଧନ୍ୟବାଦ । ସଂଘଗୁଡିକ ସରକାରଙ୍କୁ କି ପରାମର୍ଶ ଦେଲେ କେଜାଣି ଆଜି ଏ ଅବସ୍ଥା । ପୂର୍ବ ସରକାର ୨୦୦ କୋଟି ଦେଇଛନ୍ତି ଯେ, ୨୦୨୧ ମସିହାରୁ ଷ୍ଟୁଡିଓର ନବୀକରଣ ସରୁନି । ଏହାପରେ ପୁଣି ୨୦୨୩- ୨୪ ବଜେଟ୍ରେ ସରକାର ପୁନଃନିର୍ମାଣ ଲାଗି ୫୫ କୋଟି ଦେଇଥିଲେ । ବର୍ଷକୁ ବର୍ଷ ଖାଲି ଅନୁଦାନ ଦେଉଛନ୍ତି, ହେଲେ ଆଦାୟ କେତେ, ଲାଭ କେତେ ଆଉ ସେଠି କ’ଣ ଚାଲିଛି ତାହା ସରକାରଙ୍କୁ ଜଣା । ଏବେ କ’ଣ କହିଲେଣି ଏଣ୍ଟରଟେନ୍ମେଣ୍ଟ ପାର୍କ ହେବ । ସମୀକ୍ଷକ ଶ୍ୟାମା ପ୍ରସାଦ ମିଶ୍ର କହିଛନ୍ତି, ସମସ୍ତଙ୍କୁ ଏକାଠି ହୋଇ ସରକାରଙ୍କୁ ଭଲରେ ବୁଝାଇ ବିଷଦ ଭାବେ ଆଲୋଚନା କରିବାର ଆବଶ୍ୟକତା ରହିଛି । ନଚେତ୍ ଓଡ଼ିଆ ସିନେମାର ଜନ୍ମସ୍ଥାନ ପୁରୀରୁ ଶ୍ରୀମନ୍ଦିର ସିଂହଦ୍ୱାରରୁ ଆନ୍ଦୋଳନ ହେଉ ।
ପ୍ରଯୋଜକ ଅକ୍ଷୟ ପରିଜା କହିଛନ୍ତି, ସିନେମା ଜଗତ ପାଇଁ ଏହା ନୈରାଶ୍ୟଜନକ ବଜେଟ୍ । ସରକାର ଭଲ ସିନେମା ନିର୍ମାଣ ପାଇଁ ୨୦ କୋଟି ସବ୍ସିଡି ବ୍ୟବସ୍ଥା କରିଥିଲେ ଭଲ ହୋଇଥାନ୍ତା । ଏମିତିରେ ଷ୍ଟୁଡିଓକୁ ବହୁତ ଟଙ୍କା ଦିଆଯାଇଛି, ଯାହାକୁ ନେଇ ବିବାଦ ଉପୁଜିଲାଣି । ଏବେ ପୁଣି ୨୦ କୋଟି ଦେଇ ସରକାର କାହାର ଉନ୍ନତି କରିବାକୁ ଚେଷ୍ଟା କରିଛନ୍ତି ବୋଲି ଶ୍ରୀ ପରିଜା ପ୍ରଶ୍ନ କରିଛନ୍ତି ।