ଭୁବନେଶ୍ୱର, ୨୭/୭: କଲେଜ ଓ ବିଶ୍ୱବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ଶିକ୍ଷାର୍ଥୀଙ୍କ ପାଠପଢ଼ା, ଗବେଷଣା ଓ ପରୀକ୍ଷା ଉପରେ କୌଣସି ପ୍ରଭାବ ପକାଇବ ନାହିଁ । ଶାନ୍ତିଶୃଙ୍ଖଳା ସହ ଛାତ୍ର ସଂସଦ ନିର୍ବାଚନ ହୋଇପାରିବ । ରାଜ୍ୟ ସରକାର ଏନେଇ ବିଚାରବିମର୍ଶ କରୁଛନ୍ତି । ବିଧାୟକ ତୁଷାରକାନ୍ତି ବେହେରାଙ୍କ ପ୍ରଶ୍ନରେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଏପରି ସକାରାତ୍ମକ ଉତ୍ତର ରଖିଛନ୍ତି ।
ସୂଚନାଯୋଗ୍ୟ, ରାଜ୍ୟରେ ୨୦୧୮ ମସିହାରୁ ଛାତ୍ର ସଂସଦ ନିର୍ବାଚନ ହେଉନି । ପ୍ରତି ବର୍ଷ ବିଭିନ୍ନ ଛାତ୍ର ସଂଗଠନ ନିର୍ବାଚନ କରିବାକୁ ଦାବି କରୁଛନ୍ତି । ପୂର୍ବ ସରକାର କଲେଜରେ ବିଶୃଙ୍ଖଳା ହେଉଥିବା ଦର୍ଶାଇ ଏହାକୁ ବନ୍ଦ କରିଥିଲେ । ସେ ସମୟରେ ବିଜେପି ବିରୋଧୀ ଦଳରେ ରହି ଛାତ୍ର ସଂସଦ ନିର୍ବାଚନ ପ୍ରସଙ୍ଗ ଉଠାଇଥିଲା । ଏବେ ରାଜ୍ୟରେ ବିଜେପି ସରକାର ଗଠନ ହୋଇଛି । ବିଭିନ୍ନ ସମୟରେ ଗଣମାଧ୍ୟମରେ ଛାତ୍ର ସଂସଦ ନିର୍ବାଚନ ସପକ୍ଷରେ ମନ୍ତ୍ରୀ ମତ ଦେଇଛନ୍ତି । ଆଜି ବିଧାନସଭାରେ ଛାତ୍ର ସଂସଦ ନିର୍ବାଚନକୁ ନେଇ ମନ୍ତ୍ରୀଙ୍କ ଉତ୍ତର ପୁଣି ଛାତ୍ରଛାତ୍ରୀଙ୍କ ମଧ୍ୟରେ ଆଶା ସଞ୍ଚାର କରିଛି । କଲେଜ, ବିଶ୍ୱବିଦ୍ୟାଳୟରେ ଛାତ୍ର ନେତାଙ୍କ ପାଇଁ ସ୍ୱତନ୍ତ୍ର ଛାତ୍ର ସଂସଦ ଗୃହ (ଷ୍ଟୁଡେଣ୍ଟ ୟୁନିୟନ୍ ରୁମ୍) ରହିଥିଲା । ନିର୍ବାଚିତ ପ୍ରାର୍ଥୀ ଏଠାରେ ବସୁଥିଲେ ଏବଂ ପିଲାଙ୍କ ଅଭିଯୋଗ ଉପରେ ଆଲୋଚନା ହେଉଥିଲା । ବିଦ୍ୟାର୍ଥୀଙ୍କ ସମସ୍ୟା କର୍ତ୍ତୃପକ୍ଷ ଏବଂ ସରକାରଙ୍କ ନିକଟରେ ପହଞ୍ଚାଇ ସମାଧାନର ବାଟ ବାହାର କରୁଥିଲେ । ନାମଲେଖା ସମୟରେ ହେଲ୍ପ ଡେସ୍କ କରି ଛାତ୍ରନେତା ମାନେ ନୂଆ ଛାତ୍ରଛାତ୍ରୀଙ୍କୁ ସାହାଯ୍ୟ କରୁଥିଲେ । ସୌନ୍ଦର୍ଯୀକରଣଠୁ ଆରମ୍ଭ କରି ଶିକ୍ଷାଦାନ ବ୍ୟବସ୍ଥାରେ ସୁଧାର ଆଣିବା ଏବଂ ବାର୍ଷିକ ଉତ୍ସବ ଆଦି ପାଇଁ ଛାତ୍ରନେତା ଅଣ୍ଟା ଭିଡ଼ୁଥିଲେ ।
ସୂଚନାଯୋଗ୍ୟ, ଛାତ୍ର ସଂସଦ ନିର୍ବାଚନକୁ ନେଇ ସରକାରଙ୍କ ସକାରାତ୍ମକ ମନୋଭାବ ଦେଖି ଏବିଭିପି ଏବେଠୁ ନିର୍ବାଚନ ପାଇଁ ପ୍ରସ୍ତୁତି ଚଳାଇଛି । ସମସ୍ତ ଛାତ୍ର ସଂଗଠନ କଲେଜ, ବିଶ୍ୱବିଦ୍ୟାଳୟରେ ହେଲ୍ପ ଡେସ୍କ କରି ନିଜ ଆଡ଼କୁ ପିଲାଙ୍କୁ ଆକୃଷ୍ଟ କରିବାକୁ ଚେଷ୍ଟା ଚଲାଇଛନ୍ତି ।