ପୁରୀ,୧୮/୧୦: ପୁଣ୍ୟ କାର୍ତ୍ତିକରେ ଶ୍ରୀକ୍ଷେତ୍ରେ ରହି ମାସବ୍ୟାପୀ ଧର୍ମ କରିବୁ । ପୁଅବୋହୂ ନାତି ନାତୁଣୀଙ୍କୁ ଛାଡ଼ି ସାଂସାରିକ ମୋହ ତୁଟାଇ ଇଶ୍ୱର ମନସ୍କ ହେବୁ । ମହାପ୍ରଭୁଙ୍କ ଦର୍ଶନ କରି ରାଇଦାମୋଦର ବ୍ରତ ପାଳିବୁ । ଏହି ଆଶା ନେଇ କିଏ ଗଞ୍ଜାମରୁ ତ କିଏ କୃଷ୍ଣପ୍ରସାଦରୁ ପୁଣି କିଏ ସୁଦୂର ସମ୍ବଲପୁରରୁ ଆସି ଶ୍ରୀକ୍ଷେତ୍ରରେ ପହଞ୍ଚିଥିଲେ । ମାସବ୍ୟାପୀ ରହିବା ପାଇଁ ସାଥିରେ ଆଣିଥିଲେ ପୁଳାପୁଳା ସାମଗ୍ରୀ । ଅନ୍ଲାଇନ୍ରେ ଆବେଦନ କରିଥିବା ଫର୍ମ ମଧ୍ୟ ସାଙ୍ଗରେ ଆଣିଥିଲେ । ହେଲେ ପହଞ୍ଚି ଦେଖିଲେ ତାଲିକାରେ ତାଙ୍କର ନାଁ ନାହିଁ । ଶିବିରରେ ରହିବା ପାଇଁ ତାଙ୍କର ଆବେଦନ ବାତିଲ ହୋଇଯାଇଛି ।
ଶିବିରରେ ରଖେଇ ଦେବା ପାଇଁ ହବିଷ୍ୟାଳିମାନେ ଅଧିକାରୀଙ୍କ ପାଦ ଧରିଲେ, ବାପାଧନ କହି କାକୁତି ମୀନତି ହେଲେ, ଲୁହ ଢାଳି ଗୁହାରି କଲେ । ହେଲେ ନାଁ ନଥିବାରୁ କୌଣସି ବି ପରିସ୍ଥିତିରେ ଶିବିର ରଖିବା ସମ୍ଭବ ନୁହେଁ ବୋଲି ଅଧିକାରୀ ସ୍ପଷ୍ଟ ମନା କରିଦେଇଥିଲେ । ଫଳରେ ଉପାୟଶୂନ୍ୟ ହବିଷ୍ୟାଳି ଶିବିରରେ ରହିବା ଜିଦ୍ରେ ବୃନ୍ଦାବତି ନିବାସ ସମ୍ମୁଖ ରାସ୍ତାରେ ଧାରଣା ଦେଲେ । ତଥାପି ମଧ୍ୟ ତାଙ୍କ ଦାବି ପୂରଣ ନ ହେବାରୁ କାନ୍ଦିକାନ୍ଦି ଘରକୁ ଚାଲିଗଲେ ।
ଶୁକ୍ରବାରଠାରୁ କାର୍ତ୍ତିକ ମାସ ଆରମ୍ଭ ହେଉଥିବା ବେଳେ ଗୁରୁବାରଠାରୁ ଶ୍ରୀକ୍ଷେତ୍ରରେ ହବିଷ୍ୟାଳି ଭିଡ଼ ଜମାଇଛନ୍ତି । ତାଙ୍କ ପାଇଁ ସରକାରୀ ସ୍ତରରେ ହବିଷ୍ୟାଳି ଶିବିରରେ ରହଣି ବ୍ୟବସ୍ଥା ହୋଇଛି । ହେଲେ ଅନେକ ହବିଷ୍ୟାଳି ଅନ୍ଲାଇନ ଆବେଦନ କରି ମଧ୍ୟ ରହିବାର ସୁଯୋଗ ପାଇନାହାନ୍ତି । କେତେକ ହବିଷ୍ୟାଳିଙ୍କ ଅନ୍ଲାଇନ୍ ଆବେଦନ ଖାରଜ ହୋଇଯାଇଥିବାରୁ ନାଁ କଟି ଯାଇଥିବା ବେଳେ କେତେକ ହବିଷ୍ୟାଳିଙ୍କର ଅନ୍ଲାଇନ ଗ୍ରହଣ ହୋଇ ମଧ୍ୟ ତାଲିକାରେ ନାଁ ନାହିଁ । ଯେଉଁମାନେ ପ୍ରଥମ ଥର ପାଇଁ ହବିଷ୍ୟାଳି ଶିବିରରେ ରହିବାକୁ ଆବେଦନ କରିଛନ୍ତି ସେମାନଙ୍କ ଆବେଦନ ପ୍ରାଥମିକତାର ସହ ଗ୍ରହଣ ହୋଇଛି ବୋଲି ପ୍ରଶାସନ କହୁଛି । ହେଲେ ପ୍ରଥମ ଥର ପାଇଁ ଆବେଦନ କରିଥିବା ଶହଶହ ହବିଷ୍ୟାଳି ମଧ୍ୟ ଗୁରୁବାର ଶିବିରରୁ କାନ୍ଦିକାନ୍ଦି ଫେରୁଥିବା ଦେଖିବାକୁ ମିଳିଥିଲା ।
ବ୍ରହ୍ମପୁରରୁ ଆସିଥିବା ତିନି ଯା’ ବିଷ୍ଣୁ ପ୍ରଧାନ, ଶୁଆ ପ୍ରଧାନ ଓ ଲକ୍ଷ୍ମୀ ପ୍ରଧାନଙ୍କ ମଧ୍ୟରୁ ବିଷ୍ଣୁ ପ୍ରଧାନ ପ୍ରଥମ ଥର ପାଇଁ ଶିବିରରେ ରହିବାକୁ ଆବେଦନ କରିଥିଲେ । ହେଲେ କେବଳ ବିଷ୍ଣୁ ପ୍ରଧାନଙ୍କର ତାଲିକାରୁ ନାଁ କଟିଯାଇଛି । ପୂର୍ବରୁ ୨ ବର୍ଷ ଲେଖାଏଁ ଶିବିରରେ ରହିଥିବା ଶୁଆ ପ୍ରଧାନ ଓ ଲକ୍ଷ୍ମୀ ପ୍ରଧାନଙ୍କର ନାଁ କିନ୍ତୁ ତାଲିକାରେ ଅଛି । ଏଣୁ ପ୍ରଥମ ଆବେଦନକାରୀଙ୍କ ଅଗ୍ରାଧିକାର ଦିଆଯାଉଥିବା କଥା ସଂପୂର୍ଣ୍ଣ ମିଛ ବୋଲି ବିଷ୍ଣୁ ପ୍ରଧାନ କାନ୍ଦିକାନ୍ଦି କହିଛନ୍ତି । ଶିବିରରେ ରହିବେ ବୋଲି ସେ ୨ ଦିନ ହେଲାଣି ପୁରୀ ଆସି ବସଷ୍ଟାଣ୍ଡରେ ରହୁଥିଲେ । ଆଗ ପହଞ୍ଚିଲେ ଆଗେ ରହିବାକୁ ସୁଯୋଗ ମିଳିବ ଭାବି ରାତି ନ ପାହୁଣୁ ସେ ହବିଷ୍ୟାଳି ଶିବିରକୁ ଆସିଥିଲେ । ହେଲେ ସକାଳୁ ରାତି ହୋଇଗଲା ପଛେ ତାଙ୍କୁ ଶିବିରରେ ପୂରାଇ ଦିଆଗଲାନି । ତାଙ୍କ ୨ ଯା’ଙ୍କର ହୋଇଥିବା ବେଳେ ସେ ଏକୁଟିଆ ଏଥିରୁ ବାଦ୍ ପଡ଼ିଛନ୍ତି । ଏଣୁ ଏକୁଟିଆ ଘରକୁ ଫେରି ନ ପାରି ଆଜି ରାତି ମଧ୍ୟ ବସ୍ଷ୍ଟାଣ୍ଡରେ ବିତେଇ ଶୁକ୍ରବାର ଘରକୁ ଫେରିଯିବେ ବୋଲି କହିଛନ୍ତି । ସେହିଭଳି ନୟାଗଡ଼ରୁ ଆସିଥିବା ଅହଲ୍ୟା ସାସମଲ(୬୮)ଙ୍କ ପୁଅ ଗାଡ଼ି କରି ଶିବିରକୁ ପଠାଇଥିଲା । ଗାଡ଼ି ଶିବିର ସମ୍ମୁଖରେ ଛାଡ଼ି ଚାଲିଗଲା । ହେଲେ ଏବେ ତାଙ୍କ ନାଁ ତାଲିକାରେ ନାହିଁ । ପାଖରେ ଫୋନ ମଧ୍ୟ ନାହିଁ । ଏଣୁ କୁଆଡ଼େ ଯିବେ କଣ କରିବେ କାହାକୁ ନିଜ ଅସୁବିଧା କହିବେ ଭାବି ଅହଲ୍ୟା ମଧ୍ୟ ଶିବିର ସମ୍ମୁଖରେ କାନ୍ଦିକାନ୍ଦି ସନ୍ଧ୍ୟା ପର୍ଯ୍ୟନ୍ତ ଅପେକ୍ଷା କରିଥିଲେ ।
କୃଷ୍ଣପ୍ରସାଦ ମାଲୁଦ ଗାଁରୁ ଆସିଥିବା ସତ୍ୟମା ବିଶ୍ୱାଳ(୭୫) କହିଛନ୍ତି, ବୟସ ଅଧିକ ଥିବାରୁ ଘରେ ତାଙ୍କୁ ଶିବିରରେ ରହିବାକୁ ଛାଡୁନଥିଲେ । ସେ ଜିଦ୍ କରି ଏକୁଟିଆ ଆସିଥିଲେ । ହେଲେ ଏବେ ଏଠି ତାଙ୍କ ନାଁ ନାହିଁ । ବାହାରେ ଭଡ଼ା ନେଇ ରହିବା ଭଳି ଟଙ୍କା ମଧ୍ୟ ପାଖରେ ନାହିଁ । ଏଣୁ ମାସକ ଯାକ ବଡ଼ଦାଣ୍ଡରେ ଶୋଇ ହବିଷ କରି ଘରକୁ ଫେରିବେ ବୋଲି ସେ କହିଛନ୍ତି । ସେହିଭଳି ବ୍ରହ୍ମଗିରିରୁ ଆସିଥିବା ଶଶିମଣି ମହାପାତ୍ର(୮୦)ଙ୍କର ଅନ୍ଲାଇନରେ ଆବେଦନ ଗ୍ରହଣ ହୋଇଥିବା ଦେଖାଉଥିଲେ ମଧ୍ୟ ତାଲିକାରେ ନାଁ ନ ଥିଲା । ଏହାର କାରଣ ସଂପର୍କରେ ଶିବିରରେ ଥିବା ଅଧିକାରୀ ମଧ୍ୟ ସ୍ପଷ୍ଟୀକରଣ ଦେଇପାରିଲେନି ଫଳରେ ଶଶିମଣି ମଧ୍ୟ ହତାଶ ହୋଇ ଫେରିଥିଲେ । ଶଶିମଣିଙ୍କ ଭଳି ବ୍ରହ୍ମଗିରିର ସୁଷମା ସାହୁଙ୍କର ଅବସ୍ଥା ମଧ୍ୟ ସମାନ ।
ସୂଚନାଥାଉକି, ବିଗତ ବର୍ଷମାନଙ୍କରରେ ୫ଟି ସ୍ଥାନରେ ଶିବିର ହେଉଥିଲା । ହେଲେ ଏବର୍ଷ ବାଗେଡ଼ିଆ ଧର୍ମଶାଳାକୁ ବାଦ୍ ଦିଆଯାଇଛି । କେବଳ ବୃନ୍ଦାବତୀ ନିବାସ, ମୋଚି ସାହି କଲ୍ୟାଣ ମଣ୍ଡପ, ବଗଲା ଧର୍ମଶାଳା ଓ ଅକ୍ଷୟପାତ୍ର ଫାଉଣ୍ଡେସନରେ ହବିଷ୍ୟାଳିଙ୍କୁ ରଖାଯାଇଛି । ଯାହାଦ୍ୱାରା ବିଗତ ବର୍ଷ ତୁଳନାରେ ଏବର୍ଷ ସରକାରୀ ସେବା ପାଉଥିବା ହବିଷ୍ୟାଳିଙ୍କ ସଂଖ୍ୟା ସାମାନ୍ୟ କମ୍ ରହିଛି । ଅନ୍ୟପକ୍ଷରେ ଚଳିତ ବର୍ଷ ଆବେଦନ ଫର୍ମରେ ଏକ ନୂତନ ମାନଦଣ୍ଡ ଯୋଡ଼ା ଯାଇଥିଲା । ପୂର୍ବରୁ ଶିବିରରେ ରହିଛନ୍ତି କି ନାହିଁ ବୋଲି ଫର୍ମରେ ପ୍ରଶ୍ନ କରାଯାଇଥିଲା । ଯେଉଁମାନେ ହଁ ବୋଲି ଉତ୍ତର ଦେଇଥିଲେ, ସେମାନଙ୍କ ତୁଳନାରେ ନୂତନ ଆବେଦନକାରୀଙ୍କୁ ଅଧିକାରୀଙ୍କୁ ଅଧିକ ଗୁରୁତ୍ୱ ଦିଆଯାଇଛି ବୋଲି ଶିବିର ଦାୟିତ୍ୱରେ ଥିବା ଡେପୁଟି କଲେକ୍ଟର ରାକେଶ ପଣ୍ଡା ପ୍ରକାଶ କରିଛନ୍ତି । ଏହା ଛଡ଼ା ସଧବାମାନଙ୍କ ତୁଳନାରେ ବିଧବାମାନଙ୍କ ଆବେଦନକୁ ଅଗ୍ରାଧିକାର ଦିଆଯାଇଛି । ଏହି ଭିତ୍ତିରେ ପାଖାପାଖି ୧୧୦୦ ଫର୍ମକୁ ଖାରଜ କରାଯାଇଥିବା ସେ ପ୍ରକାଶ କରିଛନ୍ତି ।
