ନୂଆଦିଲ୍ଲୀ,୦୬/୦୨: ଲୋକସଭା ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସଂସଦରେ ଆକ୍ସନ ମୁଡ୍ରେ ଦେଖିବାକୁ ମିଳିଛି । ବିରୋଧୀଙ୍କୁ ସେ ଜୋରଦାର ଟାର୍ଗେଟ୍ କରିଛନ୍ତି । କଂଗ୍ରେସର ଭାରତ ଯୋଡ଼ୋ ନ୍ୟାୟ ଯାତ୍ରାକୁ ରାହୁଲ ଗାନ୍ଧୀଙ୍କ ‘ରିଲଞ୍ଚିଙ୍ଗ୍’ ସହ ଯୋଡ଼ି କଟାକ୍ଷ କରିଛନ୍ତି । ଏନ୍ଡିଏ ଏଥର ଲୋକସଭା ନିର୍ବାଚନରେ ୪୦୦ରୁ ଅଧିକ ଓ ବିଜେପି ଏକାକୀ ୩୭୦ ଆସନ ପାଇବ ବୋଲି ଗ୍ୟାରେଣ୍ଟି ଦେଇଛନ୍ତି ପ୍ରଧାନମନ୍ତ୍ରୀ ।
ସଂସଦରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ଉପରେ ଉଭୟ ଗୃହରେ ଧନ୍ୟବାଦ ପ୍ରସ୍ତାବ ଆଗତ ବେଳେ ଲୋକସଭାରେ ପ୍ରଧାନମନ୍ତ୍ରୀ ଧନ୍ୟବାଦ ଭାଷଣ ରଖିଛନ୍ତି । କଂଗ୍ରେସକୁ କଟାକ୍ଷ କରି ମୋଦି କହିଛନ୍ତି, ଦଳ ବାରମ୍ବାର ଗୋଟିଏ ‘ପ୍ରଡକ୍ଟ’ ଲଞ୍ଚ୍ କରି କ୍ଷତିର ସମ୍ମୁଖୀନ ହେଉଛି । ଗୋଟିଏ ପ୍ରଡକ୍ଟ ଯୋଗୁ ଶେଷରେ ଏହାର ଦୋକାନ ବନ୍ଦ ହେବା ସ୍ଥିତିକୁ ଚାଲିଆସିଛି । ବଂଶବାଦ ରାଜନୀତି କେବଳ କଂଗ୍ରେସର କ୍ଷତି କରିନାହିଁ, ବରଂ ସମଗ୍ର ଦେଶ ବି କ୍ଷତି ସହିଛି ।
କଂଗ୍ରେସ ଅନେକ ଦଶନ୍ଧି ଧରି ଶାସନ ଗାଦିରେ ବସିଥିଲା । ଏବେ ଏହା ବିରୋଧୀ ଗାଦିରେ ଅନେକ ଦଶନ୍ଧି ପର୍ଯ୍ୟନ୍ତ ବସିବା ପାଇଁ ସଂକଳ୍ପ ନେଇଛି । ଈଶ୍ୱରରୂପୀ ଜନତାଙ୍କ ଆଶୀର୍ବାଦ ଦ୍ୱାରା ସେମାନେ ଆଗାମୀ ନିର୍ବାଚନରେ ଦର୍ଶକ ସାଜିବାକୁ ଯାଉଛନ୍ତି । ଅନ୍ୟପକ୍ଷରେ ‘ଅବ୍କୀ ବାର୍ ୪୦୦ ପାର୍’ ବୋଲି କେବଳ ଜନତା କହୁନାହାନ୍ତି, ଖଡ୍ଗେ ଜୀ (କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେ) ମଧ୍ୟ କହୁଛନ୍ତି ।
ପ୍ରଧାନମନ୍ତ୍ରୀ ଆହୁରି କହିଛନ୍ତି, ଆମ ପାଇଁ ଦେଶ ପ୍ରଥମ । ଆମେ ସମସ୍ତେ ମିଶି ଦେଶକୁ ଆଗେଇ ନେବା ଉଚିତ । ମୁଁ ଏଥିପାଇଁ ବିରୋଧୀଙ୍କ ସହଯୋଗ କାମନା କରୁଛି । ବିଶ୍ୱ ମଧ୍ୟରେ ଯେଉଁ ସୁଯୋଗ ସୃଷ୍ଟି ହୋଇଛି, ତାହା ପାଇବା ପାଇଁ ସମସ୍ତଙ୍କ ସାଥ୍ ଦରକାର । ବିରୋଧୀ ଯଦି ସହଯୋଗ ନ କରି ଇଟା ଫିଙ୍ଗିବା କାମ କରନ୍ତି, ତେବେ ପ୍ରତ୍ୟେକ ଇଟାକୁ ପଥରରେ ବଦଳାଇ ବିକଶିତ ଭାରତର ମୂଳଦୁଆ ରଖିବି । ବିରୋଧୀ ‘ନାମ୍ଦାର’, ଆମେ ‘କାମ୍ଦାର’ ।
ନାମ୍ଦାରଙ୍କ କଥା ସବୁବେଳେ କାମ୍ଦାରକୁ ଶୁଣିବାକୁ ପଡ଼ିଥାଏ । ସେ କହିଥିଲେ ମେଣ୍ଟ (ଇଣ୍ଡିଆ)ର ଆଲାଏନମେଣ୍ଟ (ସନ୍ତୁଳନ) ଠିକ୍ ନାହିଁ।
ବିରୋଧୀଙ୍କୁ ଟାର୍ଗେଟ୍ କରି ମୋଦି କହିଛନ୍ତି, ଦେଶରେ ଖୋଲାଖୋଲି ଭାବେ ଅନ୍ୟ ଦେଶ ପାଇଁ ଓକିଲାତି କରାଯାଉଛି । ସଂସଦରେ ପୂର୍ବରୁ କାଶ୍ମୀର ପ୍ରସଙ୍ଗ ଉଠୁଥିଲେ, ଚିନ୍ତା ପ୍ରକାଶ ପାଉଥିଲା । କିନ୍ତୁ ଆଜି ଜମ୍ମୁ-କାଶ୍ମୀରରେ ଅଭୂତପୂର୍ବ ବିକାଶ ନେଇ ଚର୍ଚ୍ଚା ହେଉଛି । ପର୍ଯ୍ୟଟନ ବଢ଼ୁଛି, ଜି-୨୦ ସମ୍ମିଳନୀ ବି ହେଉଛି । ଧାରା ୩୭୦ ହଟିବା ପରେ କାଶ୍ମୀର ବେଶ୍ ଖୁସିରେ ଅଛି । ନେହରୁଜୀଙ୍କ ଭୁଲ ପାଇଁ ପୂର୍ବରୁ କାଶ୍ମୀରବାସୀଙ୍କୁ ବହୁ ମୂଲ୍ୟ ଦେବାକୁ ପଡ଼ିଥିଲା ।
ଦେଶ ଆଜି ସୁରକ୍ଷା ଓ ଶାନ୍ତି ଅନୁଭବ କରୁଛି । ଆତଙ୍କବାଦ, ନକ୍ସଲବାଦ ସଙ୍କୁଚିତ ହୋଇଛି । ଭାରତର ‘ଜିରୋ ଟଲରାନ୍ସ’ ନୀତି ସମଗ୍ର ବିଶ୍ୱକୁ ଏହି ରାସ୍ତାରେ ଚାଲିବା ପାଇଁ ବାଧ୍ୟ କରିଛି । ଭାରତୀୟ ସେନା ସୀମାରୁ ସମୁଦ୍ର ପର୍ଯ୍ୟନ୍ତ ସଶକ୍ତ ଭାବେ ନିଜ କାମ କରୁଛି । ଯେଉଁ ଦେଶରେ ସମ୍ବିଧାନର ରାଜ୍ ଚାଲିଛି, ଯେଉଁଠି ଗଣତନ୍ତ୍ର ଅଛି, ସେଠାରେ ଦୁର୍ନୀତିର ସ୍ଥାନ ନାହିଁ । ତଦନ୍ତ କରିବା ଏଜେନ୍ସିଗୁଡ଼ିକର କାମ । ସେଥିପାଇଁ ସେମାନେ ସ୍ୱାଧୀନ । ନ୍ୟାୟ ଦେବା କାମ ବିଚାରପତିଙ୍କର । ସେମାନେ ନିଜ କାମ କରୁଛନ୍ତି । ଦୁର୍ନୀତି ବିରୋଧରେ ମୋ ଲଢ଼େଇ ଜାରି ରହିବ । ଯେଉଁମାନେ ଦେଶକୁ ଲୁଟିଛନ୍ତି, ସେମାନଙ୍କୁ ଫେରାଇବାକୁ ପଡ଼ିବ ।
ଏବେ ଗରିବଙ୍କୁ ଲୁଟିବା ଦଲାଲଙ୍କ ପାଇଁ ମୁସ୍କିଲ ହୋଇପଡ଼ିଛି । ପ୍ରତ୍ୟକ୍ଷ ସୁବିଧା ହସ୍ତାନ୍ତରଣ (ଡିବିଟି) ସ୍କିମ୍ ଲୋକଙ୍କୁ ଲୁଟିବାରୁ ସୁରକ୍ଷା ଦେଇଛି । ଏକଦା କଂଗ୍ରେସର ପ୍ରଧାନମନ୍ତ୍ରୀ କହିଥିଲେ, ୧ ଟଙ୍କା ଆମେ ପଠାଉଛୁ କିନ୍ତୁ ୧୫ ପଇସା ପହଞ୍ଚୁଛି । କିନ୍ତୁ ଆମେ ୩୦ ଲକ୍ଷ କୋଟି ପଠାଇଲୁ, ସବୁ ପହଞ୍ଚିଗଲା । ଅର୍ଥ ଠକେଇ ନିବାରଣ ଆଇନ (ପିଏମ୍ଏଲ୍ଏ) ଦ୍ୱାରା ଆମେ ୧ ଲକ୍ଷ କୋଟି ଟଙ୍କାର ସମ୍ପତ୍ତି ଜବତ କରିଛୁ । ଏବେ ଦୁର୍ନୀତି ବିରୋଧରେ କାର୍ଯ୍ୟାନୁଷ୍ଠାନ ହେଉଥିବାରୁ ହଙ୍ଗାମା ହେଉଛି । ବିକ୍ଷୋଭ କରାଯାଉଛି ।
ମୋଦି କହିଛନ୍ତି, ଦୁଇଟି ଯୁଦ୍ଧ ଯୋଗୁ ୧୦୦ ବର୍ଷରେ ଆସିଥିବା ସବୁଠୁ ବଡ଼ ସଂକଟ ସତ୍ତେ୍ୱ ଦରଦାମ ସ୍ଥିତି ନିୟନ୍ତ୍ରଣାଧୀନ ରହିଛି । କିନ୍ତୁ ଇତିହାସ କହୁଛି, ଯେବେ ବି କଂଗ୍ରେସ ସରକାର ଆସିଛି ମହଙ୍ଗା ସାଥିରେ ଆଣିଛି । ଆଜି ଶକ୍ତି କ୍ଷେତ୍ରରେ ଆମେ ନିର୍ଭରଶୀଳ ହୋଇଛୁ । ଭାରତ ବିଶ୍ୱର ତୃତୀୟ ବୃହତ୍ ଏଭିଏସନ୍ ସେଣ୍ଟର ହୋଇଛି । ବିଶ୍ୱର ଅଗ୍ରଣୀ ଡିଜିଟାଲ ଅର୍ଥନୀତି ପାଲଟିଛି ଭାରତ । ପ୍ରଥମ ଥର ପାଇଁ ମତ୍ସ୍ୟଜୀବୀଙ୍କ ନିମନ୍ତେ ପୃଥକ୍ ମନ୍ତ୍ରଣାଳୟ ଆସିଛି । ଆଜି ମହିଳାଙ୍କ ନାମରେ ଗ୍ୟାସ୍, ବିଜୁଳି ବିଲ୍ ଯାଉଛି । ଝିଅମାନଙ୍କୁ ବୋଝ କୁହାଯାଉ ନାହିଁ । କନ୍ୟାରତ୍ନ ଆଜି ଯୁଦ୍ଧ ବିମାନ ଉଡ଼ାଉଛନ୍ତି । ଭଗବାନ ରାମ କେବଳ ନିଜ ଘରକୁ ଫେରିନାହାନ୍ତି, ବରଂ ଏଭଳି ଏକ ମନ୍ଦିର ନିର୍ମାଣ ହୋଇଛି ଯାହା ଭାରତର ସଂସ୍କୃତିକୁ ଶକ୍ତି ଦେଇଚାଲିବ ।
୫୫ କୋଟି ଲୋକଙ୍କୁ ଆୟୁଷ୍ମାନ କାର୍ଡ ମିଳିଛି । ୧୦ ବର୍ଷରେ ୨୫ କୋଟି ଲୋକ ଦାରିଦ୍ର୍ୟରୁ ମୁକୁଳିଛନ୍ତି । ୧୧ କୋଟି ପରିବାରକୁ ନଳ ଦ୍ୱାରା ବିଶୁଦ୍ଧ ପାନୀୟ ଜଳ ମିଳୁଛି । ୮୦ କୋଟି ଲୋକଙ୍କୁ ମାଗଣା ଖାଦ୍ୟଶସ୍ୟ ଦିଆଯାଉଛି । ଆମ ସରକାରଙ୍କ ତୃତୀୟ ପାଳିରେ ଦେଶର ମଜଭୁତ ଭିତ୍ତି ରଖାଯିବ । ଦେଶବାସୀ ଓ ସେମାନଙ୍କ ଭବିଷ୍ୟତ ପାଇଁ ଏହି ପାଳି ଆଶା ଓ ବିଶ୍ୱାସରେ ଭରା ହେବ । ତୃତୀୟ ପାଳିରେ ଭାରତ ବିଶ୍ୱର ତୃତୀୟ ବୃହତ୍ ଅର୍ଥନୀତି ହେବ ।
ଲୋକସଭାର ଗୃହକାର୍ଯ୍ୟ ମଙ୍ଗଳବାର ପୂର୍ବାହ୍ନ ୧୧ଟା ପର୍ଯ୍ୟନ୍ତ ମୁଲତବୀ ରହିଛି । ସଂସଦର ବଜେଟ୍ ଅଧିବେଶନ ଜାନୁଆରୀ ୩୧ରେ ଆରମ୍ଭ ହୋଇଥିଲା । ଏହା ଫେବ୍ରୁଆରୀ ୯ ପର୍ଯ୍ୟନ୍ତ ଚାଲିବ । ଫେବ୍ରୁଆରୀ ୧ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଅନ୍ତରୀଣ ବଜେଟ୍ ୨୦୨୪-୨୫ ଆଗତ କରିଥିଲେ । ନୂଆ ସଂସଦ ଭବନରେ ରାଷ୍ଟ୍ରପତି ମୁର୍ମୁ ପ୍ରଥମ ଥର ପାଇଁ ସମ୍ବୋଧନ କରିଥିଲେ ।
