ଭୁବନେଶ୍ଵର, ୧୫/୦୬ : କୁଏତରୁ ଫେରିଲା ୨ ଓଡ଼ିଆ ଯୁବକଙ୍କ ମୃତଦେହ। ଭୁବନେଶ୍ଵର ବିମାନ ବନ୍ଦରରେ ୨ ମୃତଦେହ ପହଞ୍ଚିଛି। ଏହି ସମୟରେ ମୁଖ୍ୟମନ୍ତ୍ରୀ ମୋହନ ମାଝୀ ଓ ୨ ଉପମୁଖ୍ୟମନ୍ତ୍ରୀ କେଭି ସିଂ ଦେଓ ଓ ପ୍ରଭାତୀ ପରିଡ଼ା, ମନମୋହନ ସାମଲ ଆଦି ପହଞ୍ଚି ଶେଷ ଦର୍ଶନ କରିଛନ୍ତି। ଏହା ସହ ମୃତକଙ୍କ ପରିବାରକୁ ୪ ଲକ୍ଷର କ୍ଷତିପୂରଣ ରାଶି ଘୋଷଣା କରାଯାଇଛି। ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ଏହି ସହାୟତା ରାଶି ପ୍ରଦାନ କରାଯିବ। ଏନେଇ ୨ ଉପମୁଖ୍ୟମନ୍ତ୍ରୀ ସୂଚନା ଦେଇଛନ୍ତି।

କୁଏତର ଦକ୍ଷିଣ ମଟ୍ଟାଫ ଅଞ୍ଚଳରେ ଭୟାନକ ଅଗ୍ନିକାଣ୍ଡ ଘଟିଥିଲା। ଏଥିରେ ୫୦ ଜଣଙ୍କର ମୃତ୍ୟୁ ହୋଇଥିଲା। ସେମାନଙ୍କ ମଧ୍ୟରୁ ୪୫ ଜଣ ଭାରତୀୟ ରହିଥିଲେ। ଏହି ୪୫ ଜଣଙ୍କ ମଧ୍ୟରୁ ୨ ଜଣ ଓଡ଼ିଆ ଯୁବକ ରହିଥିଲେ। ସେମାନେ ହେଲେ ମହମ୍ମଦ ଜହୁର ଓ ସନ୍ତୋଷ ଗୌଡ଼। ବାୟୁସେନାର ସ୍ଵତନ୍ତ୍ର ବିମାନ ଯୋଗେ ସମସ୍ତ ମୃତଦେହ କୋଚି ଅଣାଯାଇଥିଲା। ଏହାପରେ ୨ ଓଡ଼ିଆଙ୍କ ମୃତଦେହ ଓଡ଼ିଶା ଅଣାଯାଇଛି।