କୃଷ୍ଣପ୍ରସାଦ,୨୬/୦୮: ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ୍ ଅନ୍ତର୍ଗତ ସିଆଣ୍ଡି ଗ୍ରାମପଞ୍ଚାୟତ ଗୋପାଳପୁର ଗ୍ରାମର ଏକ ଆଇଟିଆଇ କଲେଜ ଛାତ୍ରୀ ସୋନାଲିକା ଜେନାଙ୍କ ମୃତ୍ୟୁକୁ ନେଇ କଲେଜରେ ଗ୍ରାମବାସୀ ଭଙ୍ଗାରୁଜା କରିବା ସହ କର୍ମଚାରୀଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ଗୁରୁବାର ଛାତ୍ରୀଙ୍କ ଶବଦାହ ସରିଥିବା ବେଳେ ଶୁକ୍ରବାର ପୁଲିସ ଶ୍ମଶାନକୁ ଯାଇ ହାଡ଼ପାଉଁଶ ଜବତ କରି ପରୀକ୍ଷା ପାଇଁ ପଠାଇଛି ।
ଗ୍ରାମବାସୀଙ୍କ ଅଭିଯୋଗ ଅନୁସାରେ ସୋନାଲିକା ଗୁରୁବାର କଲେଜରୁ ଫେରି ନିଜ ଶୋଇବା ଘରେ ଆତ୍ମହତ୍ୟା କରିଥିଲେ । ମୃତ୍ୟୁ ପରେ ତାଙ୍କ ମୋବାଇଲ ଫୋନ୍କୁ ଏକ ଅଜଣା ନମ୍ବରରୁ ବାରମ୍ବାର କଲ୍ ଆସିଥିଲା । ପରିବାର ଲୋକେ ଉକ୍ତ କଲଟି କାହାର ବୋଲି ଯାଞ୍ଚ କରିବାରୁ ତାହା ଉକ୍ତ କଲେଜର ଜଣେ ଛାତ୍ରଙ୍କର ବୋଲି ଜଣାପଡ଼ିଥିଲା । ତେଣୁ ସେହି ଛାତ୍ରଙ୍କ ପାଇଁ ତାଙ୍କ ଝିଅ ଆତ୍ମହତ୍ୟା କରିଛି ବୋଲି ସେମାନଙ୍କ ସନ୍ଦେହ ଦୃଢ଼ୀଭୂତ ହୋଇଥିଲା । ଶବଦାହ ପରେ ଗ୍ରାମବାସୀ କଲେଜକୁ ଯାଇ ହୋହଲ୍ଲା କରିଥିଲେ । କଲ କରିଥିବା ଛାତ୍ର ତାଲିମ କେନ୍ଦ୍ରରେ ନଥିବାରୁ ସେମାନେ ଅଧିକ ଉଗ୍ର ହୋଇଉଠିଥିଲେ । ତାଲିମ କେନ୍ଦ୍ର ସମ୍ମୁଖରେ ଟାୟାର ଜାଳି ବିକ୍ଷୋଭ ପ୍ରଦର୍ଶନ କରିଥିଲେ । କଲେଜର କବାଟ ଝରକା ଭଙ୍ଗାରୁଜା କରିଥିବା ସହ କର୍ମଚାରୀ ଓ ଛାତ୍ରାବାସର କିଛି ଛାତ୍ରଙ୍କୁ ମଧ୍ୟ ମାଡ଼ ମାରିଥିଲେ । ପରିସ୍ଥିତି ଅଣାୟତ୍ତ ହେଉଥିବା ଦେଖି କଲେଜ ଅଧ୍ୟକ୍ଷ ପୁଲିସକୁ ଖବର ଦେଇଥିଲେ । ପୁଲିସ ଗୁରୁବାର ରାତି ୧୦ଟାରେ ତାଲିମ କେନ୍ଦ୍ରରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ଛାତ୍ରାବାସର ସୁରକ୍ଷା ନିମନ୍ତେ ଫୋର୍ସ ମୁତୟନ କରିଥିଲା ।
ଶୁକ୍ରବାର ସକାଳେ ପୁରୀରୁ ଏକ ସାଇଣ୍ଟିଫିକ ଟିମ୍ ସହ ଅତିରିକ୍ତ ଆରକ୍ଷୀ ଅଧିକ୍ଷକ ବିଷ୍ଣୁପ୍ରସାଦ ପତି, ଏସଡିପିଓ ରବି ନାରାୟଣ ଭଞ୍ଜ ଗୋପାଳପୁର ଗ୍ରାମରେ ପହଞ୍ଚି ତଦନ୍ତ ଆରମ୍ଭ କରିଥିଲେ । ଅଧିକାରୀମାନେ ଛାତ୍ରାବାସରେ ଥିବା ଛାତ୍ରଛାତ୍ରୀ, କର୍ମଚାରୀ ଓ ଛାତ୍ରୀଙ୍କ ପରିବାର ଲୋକଙ୍କୁ ପଚରାଉଚରା କରିଥିଲେ । ଟିମ୍ ଶେଷରେ ଶ୍ମଶାନରୁ ହାଡ଼ ପାଉଁଶ ଜବତ କରି ପରୀକ୍ଷା ପାଇଁ ପଠାଇଛି । ପରିବାର ଲୋକଙ୍କଠାରୁ ଛାତ୍ରୀଙ୍କ ମୋବାଇଲ ଫୋନ୍ ଓ ଆଇ କାର୍ଡ ମଧ୍ୟ ପୁଲିସ ଜବତ କରି ନେଇଛି । ଏନେଇ କୃଷ୍ଣପ୍ରସାଦ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି । ଖବର ଲେଖା ହେବା ପର୍ଯ୍ୟନ୍ତ ଏହି ଘଟଣାରେ କାହାରିକୁ ଗିରଫ କରାଯାଇନାହିଁ ।
