ନୂଆଦିଲ୍ଲୀ: ଶୁକ୍ରବାର ସୁପ୍ରିମକୋର୍ଟ ସାମ୍ବାଦିକ ଅଭିଷେକ ଉପାଧ୍ୟାୟଙ୍କୁ ଅନ୍ତରୀଣ ଆଶ୍ବସ୍ତି ଦେଇଛନ୍ତି । ସେ ଉତ୍ତରପ୍ରଦେଶରେ ନିଯୁକ୍ତିରେ ଜାତିଗତ ଗତିଶୀଳତା ଉପରେ ଏକ୍ସରେ ଏକ ପୋଷ୍ଟ ଲେଖିଥିଲେ । ଏହାକୁ ନେଇ ତାଙ୍କ ବିରୋଧରେ ରାଜ୍ୟ ସରକାର ଅପରାଧିକ ମାମଲା ରୁଜୁ କରିଥିଲେ । ଏହି ମାମଲାକୁ ରଦ୍ଦ କରିବା ଲାଗି ସାମ୍ବାଦିକ ଅଭିଷେକ ଉପାଧ୍ୟାୟ ସୁପ୍ରିମକୋର୍ଟରେ ଆବେଦନ କରିଥିଲେ । ଏହି ଆବେଦନ ଉପରେ ଶୁଣାଣି କରି ଜଷ୍ଟିସ ହୃଷିକେଶ ରାୟ ଏବଂ ଜଷ୍ଟିସ ଏସବିଏନ୍ ଭଟ୍ଟିଙ୍କ ଖଣ୍ଡପୀଠ ସାମ୍ବାଦିକଙ୍କୁ ଅନ୍ତରୀଣ ଆଶ୍ବସ୍ତି ଦେବା ସହ ଏହି ମାମଲାରେ ଉତ୍ତରପ୍ରଦେଶର ଯୋଗୀ ଆଦିତ୍ୟନାଥ ସରକାରଙ୍କୁ ଜବାବ ମାଗିଛନ୍ତି ।
ଶୁଣାଣି ସମୟରେ ସୁପ୍ରିମକୋର୍ଟ ଭାରତୀୟ ସମ୍ବିଧାନର ଅନୁଚ୍ଛେଦ ୧୯ (୧) (ଏ) ଅନ୍ତର୍ଗତ ସାମ୍ବାଦିକଙ୍କ ବାକ୍ ସ୍ବାଧୀନତା ସଂପର୍କରେ ଟିପ୍ପଣୀ କରିଛନ୍ତି । ଗୋଟିଏ ପୋଷ୍ଟ ସରକାରଙ୍କ ବିରୋଧରେ ସମାଲୋଚନା ବୋଲି ବିଚାର କରି ଜଣେ ସାମ୍ବାଦିକଙ୍କ ବିରୋଧରେ ଅପରାଧିକ ମାମଲା ରୁଜୁ କରାଯିବା ଉଚିତ ନୁହେଁ ବୋଲି ସୁପ୍ରିମକୋର୍ଟ କହିଛନ୍ତି । ଖଣ୍ଡପୀଠ ଆହୁରି କହିଛନ୍ତି, ଗଣତାନ୍ତ୍ରିକ ରାଷ୍ଟ୍ରରେ ଜଣେ ବ୍ୟକ୍ତିଙ୍କ ବିଚାର ବ୍ୟକ୍ତ କରିବାର ସ୍ବାଧୀନତାକୁ ସମ୍ମାନ ଦେବା ଦରକାର ।
ସାମ୍ବାଦିକଙ୍କ ଏହି ଅଧୀକାର ସମ୍ବିଧାନର ଅନୁଚ୍ଛେଦ ୧୯ (୧) (ଏ)ରେ ସଂରକ୍ଷିତ ହୋଇ ରହିଛି । କେବଳ ସାମ୍ବାଦିକଙ୍କ ଲେଖାକୁ ସରକାରଙ୍କ ବିରୋଧରେ ସମାଲୋଚନା ଭାବେ ବିଚାର କରାଯାଇ ତାଙ୍କ ବିରୋଧରେ ଅପରାଧିକ ମାମଲା ହୋଇପାରିବ ନାହିଁ । ଏହା ସହ ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ, କେବଳ ଏହି ମାମଲା ନୁହେଁ ଭବିଷ୍ୟତରେ ଅଭିଷେକ ଉପାଧ୍ୟାୟଙ୍କ ବିରୋଧରେ ଏଭଳି ଅନ୍ୟ ମାମଲା ଉପରେ ମଧ୍ୟ କୋର୍ଟଙ୍କ ଏହି ସୁରକ୍ଷା ଲାଗୁ ରହିବ । ସୁପ୍ରିମକୋର୍ଟଙ୍କ ରାୟ ଆସିବା ପରେ ସାମ୍ବାଦିକ ଅଭିଷେକ ଉପାଧ୍ୟାୟ ଏକ୍ସରେ ଲେଖିଛନ୍ତି, ‘ଏହା ସୁପ୍ରିମ ନ୍ୟାୟ’ ।
