ନୂଆଦିଲ୍ଲୀ: ବାଂଲାଦେଶରେ ହିନ୍ଦୁ ବିରୋଧୀ ହିଂସା ବୃଦ୍ଧି ପାଉଛି । ୨୦୨୪ରେ ଏବେ ସୁଦ୍ଧା ସେଠାରେ ୨୨୦୦ରୁ ଅଧିକ ହିନ୍ଦୁଙ୍କ ଉପରେ ଆକ୍ରମଣ ମାମଲା ସାମ୍ନାକୁ ଆସିଛି ବୋଲି ଗତକାଲି ଭାରତ ସରକାର ସୂଚନା ଦେଇଥିଲେ । ଆଜି (ଶନିବାର) ବାଂଲଦେଶ ଅନ୍ତରୀଣ ସରାକାରର ମୁଖ୍ୟ ମହମ୍ମଦ ୟୁନୁସ ଭାରତର ଏହି ତଥ୍ୟ ଉପରେ ନିଜର ଅସନ୍ତୋଷ ପ୍ରକାଶ କରିଛନ୍ତି । ସେ କହିଛନ୍ତି ସଂଖ୍ୟାଲଘୁଙ୍କ ଉପରେ ହୋଇଥିବା ଆକ୍ରମଣ ନେଇ ଭାରତ ଦେଇଥିବା ତଥ୍ୟ ବିଭ୍ରାନ୍ତିକର ।
ଭାରତର ବୈଦେଶିକ ମନ୍ତ୍ରାଳୟର ସୂଚନା ଅନୁସାରେ, ବାଂଲାଦେଶରେ ୨୦୨୨ରେ ୪୪ଟି ହିନ୍ଦୁ ବିରୋଧୀ ହିଂସା ଘଟିଥିବା ବେଳେ ୨୦୨୩ରେ ୩୦୨ ଏବଂ ୨୦୨୪ରେ ଏହି ସଂଖ୍ୟା ୨୨୦୦ । ତେବେ ୟୁନୁସ କହିଛନ୍ତି, ଭାରତ ଦେଇଥିବା ଏହି ତଥ୍ୟ ବିଭ୍ରାନ୍ତିକର ଏବଂ ଅତିରଞ୍ଜିତ । ଭାରତର ତଥ୍ୟକୁ ମିଥ୍ୟା କହୁଥିବା ୟୁନୁସ୍ଙ୍କ ବାଂଲାଦେଶରେ ପୁଣି ଥରେ ହିନ୍ଦୁ ମନ୍ଦିର ଉପରେ ଆକ୍ରମଣ ହୋଇଛି । ମୈମନସିଂହ ଏବଂ ଦିନାଜପୁରରେ ଥିବା ମନ୍ଦିରରେ ଉପଦ୍ରବକାରୀ ଭଙ୍ଗାରୁଜା କରିଛନ୍ତି । ଏହି ଦୁଇଟି ସ୍ଥାନରେ ୮ରୁ ଅଧିକ ହିନ୍ଦୁ ଦେବାଦେବୀଙ୍କ ପ୍ରତିମୂର୍ତ୍ତି ଭାଙ୍ଗି ଦିଆଯାଇଛି ।
ଅଧିକ ପଢ଼ୁନ୍ତୁ: ବାଂଲାଦେଶରେ ହିନ୍ଦୁଙ୍କ ଉପରେ ୨୨୦୦ରୁ ଉର୍ଦ୍ଧ୍ଵ ଆକ୍ରମଣ, ୨ ଦିନରେ ୩ଟି ମନ୍ଦିରରେ ଭଙ୍ଗାରୁଜା
ବଂଲାଦେଶ ସରକାରଙ୍କ ପକ୍ଷରୁ କୁହାଯାଇଛି, ବାଂଲାଦେଶର ଅନ୍ତରୀଣ ସରକାର ଏହି ଘଟଣାର ତଦନ୍ତ କରୁଛନ୍ତି ଏବଂ ଅପରାଧିଙ୍କୁ ଦଣ୍ଡ ମିଳିବ । ପୋଲିସ ମୁଖ୍ୟାଳୟ ଅନୁସାରେ, ୪ ଅଗଷ୍ଟରୁ ୧୦ ଡିସେମ୍ବର ମଧ୍ୟରେ ପ୍ରାୟ ୯୭ଟି ମାମଲା ରୁଜୁ ହୋଇଛି । ଅଗଷ୍ଟରେ ସଂଖ୍ୟାଲଘୁଙ୍କ ଉପରେ ଆକ୍ରମଣ ଅଭିଯୋଗରେ ୭୫ ଜଣଙ୍କୁ ଗିରଫ କରାଯାଇଛି । ୟୁନୁସ ସରକାର କହିଛନ୍ତି,‘ଏଥିରୁ କିଛି ଘଟଣା ୫ ଅଗଷ୍ଟରୁ ୮ ଅଗଷ୍ଟ ମଧ୍ୟରେ ଘଟିଛି, ସେତେବେଳେ କୌଣସି ସରକାର ଗଠନ ହୋଇନଥିଲା । ଅଧିକାଂଶ ଆକ୍ରମଣ ରାଜନୀତି ପ୍ରଣୋଦିତ ଥିଲା । ଆମେ ସମସ୍ତଙ୍କୁ ଅନୁରୋଧ କରୁଛୁ ଘୃଣା ସୃଷ୍ଟିକାରୀ ମିଥ୍ୟା ତଥ୍ୟ ନଦିଅନ୍ତୁ।’
