ନୂଆଦିଲ୍ଲୀ,୨୧/୧୨: ୧୩୪ ପୋଲିସ୍ ଅଧିକାରୀଙ୍କ ବିରୋଧରେ ମାମଲା ରୁଜୁ । ପୀଡିତାଙ୍କୁ ନ୍ୟାୟ ପ୍ରଦାନରେ ବାଧା ସୃଷ୍ଟି କରୁଥିଲେ । ଅପରାଧୀଙ୍କୁ ଧରିବାରେ ସାଜୁଥିଲେ ପ୍ରତିବନ୍ଧକ । ଫଳରେ ମାମଲାଗୁଡ଼ିକ ବର୍ଷ ବର୍ଷ ଧରି ପଡ଼ି ରହୁଥଲା । ତେବେ ଏଭଳି ଘଟଣା ସାମ୍ନାକୁ ଆସିଛି ବିହାରର ମୁଜାଫରପୁରରୁ ।
ତେବେ ଅପରାଧୀଙ୍କୁ ଧରି ପୀଡ଼ିତଙ୍କୁ ନ୍ୟାୟ ଦେବା ପୋଲିସ୍ର ପ୍ରକାମ ହୋଇଥିବା ବେଳେ ମୁଜଫରପୁରର ୧୩୪ ପୋଲିସ୍ ଅଧିକାରୀ ଏଥିରେ ବାଧା ସୃଷ୍ଟି କରୁଥିଲେ । ଏପରିକି ନିଜ ଟ୍ରାନ୍ସଫର ହେବା ପରେ ପରବର୍ତ୍ତୀ ଅଫିସରଙ୍କୁ ପୁରୁଣା କେସ୍ର ଫାଇଲ୍ ପ୍ରଦାନ କରୁ ନ ଥିଲେ। ଫଳରେ ୯୪୩ଟି ଫାଇଲ୍ ସମାଧାନ ନ ହୋଇ ପ୍ରାୟ ୧୦ ବର୍ଷ ପଡ଼ି ରହିଛି। ବରିଷ୍ଠ ଅଧିକାରୀଙ୍କ ନିର୍ଦ୍ଦେଶ ସତ୍ତ୍ୱେ ସମ୍ପୃକ୍ତ ଅଧିକାରୀମାନେ ପୁରୁଣା କେସ୍ର ଫାଇଲ୍ ପ୍ରଦାନ କରୁ ନ ଥିଲେ। କିଛି ଦିନ ପୂର୍ବେ ସମାଧାନ ହୋଇ ନ ଥିବା ପୁରୁଣା ମାମଲାଗୁଡ଼ିକର ସମୀକ୍ଷା କରାଯାଉଥିବା ବେଳେ ଏହି ସମସ୍ତ ଅଧିକାରୀଙ୍କ ନାମ ସାମ୍ନାକୁ ଆସିଛି।
ଏବେ ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯାଇ ୮ଟି ଥାନାରେ ମାମଲା ରୁଜୁ ହୋଇଛି। କାଜିମୋହମ୍ମଦପୁର ପୋଲିସ ଷ୍ଟେସନରେ ୧୧, ସଦରରେ ୨୧, ବ୍ରହ୍ମପୁରାରେ୨୭, ଅହିୟାପୁରରେ ୬, ନଗରରେ୫୪ ଏବଂ ଅନ୍ୟାନ୍ୟ ପୋଲିସ ଷ୍ଟେସନ ସମେତ ମୋଟ ୧୩୪ ପୋଲିସ ଅଧିକାରୀଙ୍କ ବିରୋଧରେ ମାମଲା ରୁଜୁ ହୋଇଛି। କାଜିମୋହମ୍ମଦପୁର ପୋଲିସ ଷ୍ଟେସନ ଇନଚାର୍ଜ ରବି କୁମାର ଗୁପ୍ତାଙ୍କ ଦ୍ୱାରା ଦିଆଯାଇଥିବା ଏଫଆଇଆରରେ କୁହାଯାଇଥିଲା ଯେ, ଦୈନିକ ରିପୋର୍ଟକୁ ଅନୁଧ୍ୟାନ କରିବା ପରେ ଏହା ଜଣାପଡିଥିଲା ଯେ ପୂର୍ବରୁ କାଜିମୋହମ୍ମଦପୁର ପୋଲିସ ଷ୍ଟେସନରେ ପୋଷ୍ଟ କରାଯାଇଥିବା ଅଧିକାରୀମାନଙ୍କୁ ଅନ୍ୟ ପୋଲିସ ଷ୍ଟେସନ ଏବଂ ଜିଲ୍ଲାକୁ ସ୍ଥାନାନ୍ତର କରାଯାଇଛି।
