ନୂଆଦିଲ୍ଲୀ: ଫିଲ୍ମ ଥିଏଟର୍ସ ଏବଂ ମଲ୍ଟିପ୍ଲେକ୍ସରେ ପପ୍କର୍ଣ୍ଣର ଲୋକପ୍ରିୟତା ଖୁବ ଅଧିକ । ଏହା ସହ ଘରେ ଘରେ ପପ୍କଣ୍ଣ ଖାଇବା ବି ସଉକ ପାଲଟିଲାଣି । ପପ୍କର୍ଣ୍ଣର ଚାହିଦା ବଢ଼ୁଥିବା ବେଳେ ଏହାକୁ ନେଇ ବଡ଼ ଖବର ମଧ୍ୟ ସାମ୍ନାକୁ ଆସିଛି । ଆଜି ଜିଏସଟି କାଉନସିଲ୍ ବୈଠକରେ ପପ୍କର୍ଣ୍ଣ ଉପରେ ଚର୍ଚ୍ଚା ହୋଇଛି । ପପକର୍ଣ୍ଣକୁ ୩ଟି ଟ୍ୟାକ୍ସ ସ୍ଲାବରେ ସାମିଲ କରାଯାଇଛି ବୋଲି କୁହାଯାଉଛି । କିନ୍ତୁ ଏସବୁ ମଧ୍ୟରେ ପପକର୍ଣ୍ଣ ଉପରେ ଟ୍ୟାକ୍ସ ବଢ଼ିବ କି ନାହଁ, ସେନେଇ ସରକାର ମଧ୍ୟ ସ୍ପଷ୍ଟୀକରଣ ଦେଇଛନ୍ତି । ସବୁଠାରୁ ବଡ଼ ପ୍ରଶ୍ନ, ପପକର୍ଣ୍ଣ ଭଳି ନମକିନ୍ ଖାଦ୍ୟକୁ କାହିଁକି ଜିଏସ୍ଟି ପରିସରଭୁକ୍ତ କାରାଯାଇଛି ? ପ୍ରକୃତରେ ପପକର୍ଣ୍ଣର ବଜାର ଭାରତରେ ଛୋଟ ନୁହେଁ । ଭାରତରେ ଏହାର ମାର୍କେଟ ୧୨୦୦ କୋଟି ଟଙ୍କାରୁ ଅଧିକ । ୨୦୩୦ ସୁଦ୍ଧା ଏହା ୨୬୦୦ କୋଟି ଟଙ୍କାକୁ ବଢ଼ିପାରେ ବୋଲି ଆଶା କରାଯାଉଛି । ଏକ ରିପୋର୍ଟ ଅନୁସାରେ, ୨୦୨୪ରୁ ୨୦୩୦ ମଧ୍ୟରେ ପପକର୍ଣ୍ଣର ବଜାର ୧୨ ପ୍ରତିଶତ ବୃଦ୍ଧି ହୋଇପାରେ । ଖାସ୍ କଥା ହେଉଛି, ପୁରା ଦୁନିଆରେ ଏହାର ବଜାର ୭୫ ହଜାର କୋଟିରୁ ଅଧିକ । ଏବେ ଆପଣ ବୁଝିପାରୁଥିବେ ସରକାରଙ୍କ ପାଇଁ ପପକର୍ଣ୍ଣ କେତେ କରୁରି ।
ଭାରତରେ ପପକର୍ଣ୍ଣ ବଜାର ବୃଦ୍ଧି ପାଇବାରେ ଲାଗିଛି । ଗତ କିଛି ବର୍ଷ ମଧ୍ୟରେ ୧୦ ପ୍ରତିଶତରୁ ଅଧିକ ବୃଦ୍ଧି ଦେଖିବାକୁ ମିଳିଥିବା ବେଳେ ଆଗାମୀ ୫-୬ ବର୍ଷ ପରେ ପପକର୍ଣ୍ଣ ଚାହିଦା ଆହୁରି ଅଧିକ ହୋଇପାରେ । ୨୦୨୩ ପର୍ଯ୍ୟନ୍ତ ପପକର୍ଣ୍ଣର ବଜାର ୧୧୫୮ କୋଟି ଟଙ୍କା ଥିବା ବେଳେ ଏବେ ୧୨୦୦ କୋଟି ଟପିଛି । ଭାରତରେ ପପକର୍ଣ୍ଣର ଚାହିଦା ବଢ଼ିବାର କାରଣ, ସାଧାରଣ ଲୋକେ ଫିଲ୍ମ ଥିଏଟର୍ସ ଏବଂ ମଲ୍ଟିପ୍ଲେକ୍ସ ଯିବାକୁ ବେଶୀ ପସନ୍ଦ କରୁଛନ୍ତି । ଆଉ ଏହି ସବୁ ସ୍ଥାନରେ ପପକର୍ଣ୍ଣ ଖାଇବାର କ୍ରେଜ୍ ଅଧିକ ଦେଖିବାକୁ ମିଳେ । ସେପଟେ ଘରେ ମଧ୍ୟ ଲୋକେ ପପକର୍ଣ୍ଣ ଖାଇବାକୁ ପସନ୍ଦ କଲେଣି । ଭାରତରେ ପିଭିଆର ମଲ୍ଟିପ୍ଲେକ୍ସ ପ୍ରତିଦିନ ଅତିକମ୍ରେ ୧୮ ହଜାର ପପକର୍ଣ୍ଣ ଟବ୍ ବିକ୍ରି କରୁଛି । ସେହିଭଳି ବାନାକୋ ଭାରତର ପ୍ରାୟ ୮୦ ପ୍ରତିଶତ ମଲ୍ଟିପ୍ଲେକ୍ସକୁ ପପ୍କର୍ଣ୍ଣ ସପ୍ଲାଇ କରୁଛି । ଅନ୍ୟପଟେ ମକାରୁ ତିଆରି ପପ୍କର୍ଣ୍ଣର ଗ୍ଲୋବାଲ୍ ମାର୍କେଟ ଖୁବ ଅଧିକ । ୨୦୨୪ରେ ଏହାର ଆକାର ୮.୮୦ ବିଲିୟନ୍ ଡଲାର ଅର୍ଥାତ ୭୫ ହଜାର କୋଟି ଟଙ୍କା । ୨୦୨୯ ସୁଦ୍ଧା ବିଶ୍ବରେ ପପ୍କର୍ଣ୍ଣ ମାର୍କେଟ ୧.୨୬ ଲକ୍ଷ କୋଟି ଟଙ୍କାକୁ ବୃଦ୍ଧି ହୋଇପାରେ ବୋଲି କୁହାଯାଉଛି । ଏହାର ସବୁଠୁ ବଡ଼ ମାର୍କେଟ ହେଉଛି ଉତ୍ତର ଆମେରିକା ।
ଶନିବାର କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ରାଜସ୍ଥାନରେ ବସିଥିବା ୫୫ତମ ଜିଏସଟି କାଉନସିଲ୍ ବୈଠକରେ ବିଭିନ୍ନ ସାମଗ୍ରୀ ଉପରେ ଜିଏସଟି ରେଟ୍ରେ ପରିବର୍ତ୍ତନ ହୋଇଛି। ସବୁଠାରୁ ଚର୍ଚ୍ଚାର ବିଷୟ ରହିଛି ପପକର୍ଣ୍ଣ । ଏହା ଉପରେ ଜିଏସଟି ବଢ଼ିବ ବୋଲି ଆଲୋଚନା ହେଉଥିବା ବେଳେ କେନ୍ଦ୍ର ସରକାର ଏନେଇ ସ୍ପଷ୍ଟୀକରଣ ଦେଇଛନ୍ତି । ଯେପର୍ଯ୍ୟନ୍ତ ପପକର୍ଣ୍ଣ ଲୁଣିଆ ଥିବ, ସେପର୍ଯ୍ୟନ୍ତ ଏଥିରେ ପୂର୍ବପରି ୫ ପ୍ରତିଶତ ଟ୍ୟାକ୍ସ ଲାଗିବ। ସ୍ୱାଦ ମିଠା କଲେ ଏଥିରେ ଟ୍ୟାକ୍ସ ପରିବର୍ତ୍ତନ ହେବ ବୋଲି ଜିଏସଟି କାଉନସିଲ କହିଛି। ଶନିବାର କାଉନସିଲ କହିଛି ଯେ ପୂର୍ବରୁ ପ୍ୟାକ୍ ହୋଇଥିବା ଏବଂ ଲେବଲ୍ ଲାଗିଥିବା ରେଡି ଟୁ ଇଟ୍ ସ୍ନାକ୍ସ ପାଇଁ ୧୨% ଟିକସ ଲାଗାଯାଉଛି। ପପକର୍ଣ୍ଣରେ ମିଠା ମିଶାଯିବ ପରେ ଏଥିରେ ୧୮% ଜିଏସ୍ଟି ଆଦାୟ କରାଯିବ । ତେଣୁ ବର୍ତ୍ତମାନ ପପକର୍ଣ୍ଣ ପାଇଁ ଟିକସ ହାରରେ କୌଣସି ପରିବର୍ତ୍ତନ କରାଯାଇ ନାହିଁ । ବର୍ତ୍ତମାନ ପ୍ୟାକ୍ ହୋଇ ନଥିବା କିମ୍ବା ଲେବଲ ଲାଗି ନଥିବା ନମକୀନ ବର୍ଗରେ ଥିବା ରେଡି ଟୁ ଇଟ ପପକର୍ଣ୍ଣ ପାଇଁ ୫ ପ୍ରତିଶତ ଶୁଳ୍କ ଲାଗୁଛି। ତେବେ ପୂର୍ବରୁ ପ୍ୟାକ୍ ହୋଇ ଆସୁଥିବା ଓ ଲେବଲ ଲାଗୁଥିବା ପପକର୍ଣ୍ଣ ଉପରେ ୧୨ ପ୍ରତିଶତ ଶୁଳ୍କ ଲାଗୁଛି ।
