ନୂଆଦିଲ୍ଲୀ,୨୧/୧୨: କ୍ୟାବ୍ ଭଡ଼ା ପାଇଁ ଛୁରୀ ଭୁସିଦେଲେ ନାବାଳକ । ୪ଶହ ଟଙ୍କା କ୍ୟାବ ଭଡ଼ା ଡ୍ରାଇଭର ଦେବାକୁ କହିଲାରୁ ନାବାଳକ ଜଣକ ଛୁରୀ ଭୁସିଥିବା ସୂଚନା । ତେବେ ଦିଲ୍ଲୀ ସୋନିଆ ବିହାର ଅଞ୍ଚଳରୁ ସାମ୍ନାକୁ ଆସିଛି ଏଭଳି ଅଭାବନୀୟ ଘଟଣା। ମାତ୍ର ୪୦୦ ଟଙ୍କା ପାଇଁ କ୍ୟାବ ଡ୍ରାଇଭରଙ୍କୁ ଭଡା ଦେବାକୁ ରାଜି ହେଲେନି ନାବାଳକ। ଏହାପରେ ଝଗଡା ଏତେ ବଢିଗଲା ଯେ ୨୬ ବର୍ଷୀୟ ଡ୍ରାଇଭରଙ୍କୁ ଛୁରୀ ଭୁସି ଦେଲା ନାବାଳକ । ତେବେ ଡିସେମ୍ବର ୧୮ ତାରିଖ ବିଳମ୍ବିତ ରାତିରେ ଏହି ଘଟଣା ଘଟିଛି। ମୃତ କ୍ୟାବ ଡ୍ରାଇଭରଙ୍କ ନାଁ ସନ୍ଦୀପ ହୋଇଥିବା ବେଳେ ସେ ରାପିଡୋ ଟାକ୍ସି ଚଳାଉଥିବା ଜଣାପଡ଼ିଛି ।
ସୂଚନା ଅନୁୟାୟୀ, ଗତ ୧୮ ତାରିଖ ବିଳମ୍ବିତ ରାତିରେ ସନ୍ଦୀପ ସୋନିଆ ବିହାର ପୁସ୍ତା ନିକଟରେ ରାସ୍ତା କଡରେ ରକ୍ତ ଜୁଡୁବୁଡୁ ଅବସ୍ଥାରେ ପଡିଥିଲେ । ତାଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ମୃତ୍ୟୁ ପୂର୍ବରୁ ସନ୍ଦୀପ ପୋଲିସକୁ କହିଥିଲେ ଯେ ନୋଏଡାରୁ ୩ ଜଣ ଯାତ୍ରୀ ଦୀପାଂଶୁ ରାହୁଲ ଓ ମୟଙ୍କଙ୍କୁ କାର୍ରେ ଭଡାରେ ଆଣିଥିଲେ । ସେମାନେ ସୋନିଆ ବିହାରରେ ଓହ୍ଲେଇବାର ଥିଲା । ଭଡା ବାବଦକୁ ୪ଶହ ଟଙ୍କା ହୋଇଥିଲା । ଆଉ ସେ ୩ ଜଣଙ୍କୁ ଭଡା ଟଙ୍କା ବାବଦକୁ ୪ଶହ ଟଙ୍କା ମାଗିଥିଲେ । ହେଲେ ସେମାନେ ଦେବାକୁ ରାଜି ହୋଇନଥିଲେ । ଟଙ୍କା ଦେବା ବଦଳରେ ମାଡ ମାରିବା ଆରମ୍ଭ କରିଥିଲେ । ଏତିକିବେଳେ ୩ ଯାତ୍ରୀଙ୍କ ସହ ଅନ୍ୟ ଜଣେ ସାଙ୍ଗ ନିଖିଲ ଓ ଜଣେ ନାବାଳକ ଆସି କ୍ୟାବ ଡ୍ରାଇଭର ସନ୍ଦୀପଙ୍କୁ ଛୁରୀରେ ଆକ୍ରମଣ କରିଥିଲେ । ଆଉ ରକ୍ତାକ୍ତ ଅବସ୍ଥାରେ ଛାଡି ଫେରାର ହୋଇଯାଇଥିଲେ । ତେବେ ଘଟଣାର ତଦନ୍ତ କରି ପୋଲିସ ଜଣେ ଅଭିଯୁକ୍ତକୁ ଗିରଫ କରିଥିବା ଜଣାପଡଛି । ସେହିପରି ଏବେବି ଅନ୍ୟ ଅଭିଯୁକ୍ତ ଫେରାର ଅଛନ୍ତି ।
