ନୂଆଦିଲ୍ଲୀ,୨୧।୧୨: ସଂସଦରେ ଦୁଇ ଦିନ ପୂର୍ବରୁ ଇଣ୍ଡିଆ ବ୍ଲକ ଓ ବିଜେପି ସାଂସଦଙ୍କ ମଧ୍ୟରେ ଧକ୍କା ମରାମରି ଘଟଣାକୁ ନେଇ ସରଗରମ ହୋଇଥିଲା ରାଜନୀତି। ଏହି ଘଟଣା ଦୁଇ ବିଜେପି ସାଂସଦ ଆହତ ହୋଇଥିଲେ। ଏବେ ଏହି ସାଂସଦଙ୍କ ଉପରେ ସମାଜବାଦୀ ପାର୍ଟି ସାଂସଦ ଜୟା ବଚ୍ଚନ କରିଛନ୍ତି କଟାକ୍ଷ। ସେ କହିଛନ୍ତି, ବିଜେପିର ଯେଉଁ ସାଂସଦ ହସ୍ପିଟାଲରେ ଭର୍ତ୍ତି ହୋଇଛନ୍ତି ସେ କେବଳ ଡ୍ରାମା କରୁଛନ୍ତି।
ସଂସଦ ପରିସରରେ ଗଣମାଧ୍ୟମ ସହ କଥା ହୋଇ ଜୟା କହିଛନ୍ତି, ଏମାନେ ଭଲ ଡ୍ରାମା କରୁଛନ୍ତି। ତାଙ୍କୁ ଏଥିପାଇଁ ପୁରଷ୍କାର ଦେବା କଥା। ପ୍ରତାପ ଷଡଙ୍ଗୀ ଓ ମୁକେଶ ରାଜପୁତଙ୍କ ଭଳି ଭଲ ଆକ୍ଟିଂ ସେ ଆଉ କେଉଁଠି ଦେଖି ନାହାନ୍ତି ବୋଲି କହିଛନ୍ତି ଜୟା। ଏହାଛଡା ସେ ନାଗାଲାଣ୍ଡର ମହିଳା ସାଂସଦଙ୍କୁ ମଧ୍ୟ ଟାର୍ଗେଟ କରିଛନ୍ତି। ସେ କହିଛନ୍ତି ଭଲ ଅଭିନୟ ପାଇଁ ତାଙ୍କୁ ସମ୍ମାନିତ କରିବା ଦରକାର।
ଜୟା କହିଛନ୍ତି, ରାଜପୁତ ଆଇସିୟୁରେ ଭର୍ତ୍ତି ଅଛନ୍ତି। ପ୍ରତାଷ ଷଡଙ୍ଗୀଙ୍କ ମୁଣ୍ଡରେ କେବଳ ହାଲକା ବ୍ୟାଣ୍ଡେଜ୍ ପଡିଥିଲା। ତା ପରେ ବଡ ପଟି ପଡିଲା। ଆଉ ଏବେ ପୁରା ମୁଣ୍ଡରେ ପଟି ବାନ୍ଧି ଦିଆଗଲା। ଏବେ ଦୁହେଁ ନିଜ ଲିଡର ସହ ଆଇସିୟରୁ କଥା ହେଉଛନ୍ତି। ଏହା ବେଷ୍ଟ ପରଫରମାନ୍ସ ନୁହେଁ ତ ଆଉ କ’ଣ ? ମୁଁ ଏଭଳି ଅଭିନୟ ଦେଖିନି। ସେପେଟ ଜୟାଙ୍କ ମନ୍ତବ୍ୟକୁ ନେଇ ବିଜେପି ପ୍ରତିକ୍ରିୟା ଦେଇଛି। ବିଜେପି କହିଛି ଏହା ସମାଜବାଦୀ ପାର୍ଟି ଓ ଇଣ୍ଡିଆ ବ୍ଲକ୍ର ମାନସିକତାକୁ ଦର୍ଶାଉଛି।
