ନୂଆଦିଲ୍ଲୀ, ୨୧/୧୨ : ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ଅରବିନ୍ଦ କେଜ୍ରିୱାଲ୍ଙ୍କୁ ଝଟ୍କା। ମଦ ଦୁର୍ନୀତି ମାମଲାରେ ଆପ୍ ପ୍ରମୁଖ ଅରବିନ୍ଦ କେଜ୍ରିୱାଲଙ୍କ ଉପରେ ମକୋଦ୍ଦମା ଚଳାଇବାକୁ ଇଡିକୁ ଦାୟିତ୍ଵ ଦେଲେ ଉପରାଜ୍ୟପାଳ ବିକେ ସକସେନା। ଡିସେମ୍ଵର ୫ରେ ମକୋଦ୍ଦମା ଚଳାଇବା ପାଇଁ ଏଲଜିଙ୍କ ଠାରୁ ଅନୁମତି ମାଗିଥିଲା ଇଡି।
ଇଡିର ଅଭିଯୋଗ ଅନୁଯାୟୀ, ସାଉଥ୍ ଗ୍ରୁପ୍ର ସଦସ୍ୟଙ୍କ ସହ ମିଶି ଅରବିନ୍ଦ କେଜ୍ରିୱାଲ ୧୦୦ କୋଟି ଟଙ୍କାର ଲାଞ୍ଚ ନେଇଥିଲେ। ଏହାପରେ ଟେଲର-ମେଡ୍ ନୀତି ଲାଗୁ କରି ଘରୋଇ ସଂସ୍ଥା ଗୁଡ଼ିକୁ ଉନୁଚିତ୍ ଉପାୟରେ ଲାଭ ଦେଇଥିଲେ। ଅବକାରୀ ନୀତି ୨୦୨୧-୨୨ ବରୋଧରେ ସାଉଥ୍ ଗ୍ରୁପ୍ କମ୍ପାନୀକୁ ବହୁ ରିଟେଲ୍ ଜୋନ୍ ରଖିବାକୁ ଅନୁମତି ଦେଇଥିଲେ। ଏହି ଲାଞ୍ଚ ଟଙ୍କାର ପାଖାପାଖି ୪୫ କୋଟି ଟଙ୍କା ଗୋଆ ନିର୍ବାଚନ ବେଳେ ଦଳର ପ୍ରଚାର ପାଇଁ କେଜ୍ରିୱାଲ ଖର୍ଚ୍ଚ କରିଥିଲେ। ତେବେ ଆସନ୍ତା ୨୦୨୫ ଜାନୁଆରୀ ୩୦ରେ ଇଡିର ଚାର୍ଜସିଟ୍ ବିରୋଧରେ ଅରବିନ୍ଦ କେଜ୍ରିୱାଲଙ୍କ ଆବେଦନ ଉପରେ ଦିଲ୍ଲୀ ହାଇକୋର୍ଟ ଶୁଣାଣି କରିବେ।
ସେପଟେ ଆପ୍ର କହିବା ଅନୁଯାୟୀ, ୨୫୦ରୁ ଉର୍ଦ୍ଧ୍ଵ ଚଢାଉ କରାଯାଇଛି, ହେଲେ ଟଙ୍କାଟିଏ ବି ମିଳିନାହିଁ। ତଥାକଥିତ ମଦ ଦୁର୍ନିତୀ ମାମଲାର ତଦନ୍ତ ୨ ବର୍ଷ ଯାଏଁ ଚାଲିଲା, ୫୦୦ରୁ ଉର୍ଦ୍ଧ୍ଵ ଲୋକଙ୍କୁ ହଇରାଣ କରାଗଲା, ୫୦ ହଜାର ଫର୍ଦ୍ଦ ବିଶିଷ୍ଟ ଦସ୍ତାବିଜ ଦାଖଲ ହେଲା, ୨୫୦ରୁ ଉର୍ଦ୍ଧ୍ଵ ରେଡ୍ ହେଲା, ହେଲେ ଟଙ୍କାଟିଏ ବି ମିଳିଲା ନାହିଁ। ବିଜେପିର ଅସଲ ଉଦ୍ଦେଶ୍ୟ ହେଉଛି କେଜ୍ରିୱାଲଙ୍କୁ ହଇରାଣ କରିବା।
