ଭୁବନେଶ୍ୱର ୧୩/୦୬: ଘରେ ବାହାରେ ସବୁଠାରେ ମହିଳାଙ୍କୁ ଅଧିକ ସୁବିଧା ମିଳୁଥିବା ନେଇ ଚର୍ଚ୍ଚା ଜୋର୍ ଧରିଛି । ଚର୍ଚ୍ଚାକୁ ଦେଖି ଏମିତି ଲାଗୁଛି ଯେ ସତେ ଯେମିତି ପରିବାରଠାରୁ ଆରମ୍ଭ କରି ରାଜନୈତିକ ଦଳ ଯାଏ ସମସ୍ତେ ମହିଳାଙ୍କ ସୁଖ-ସୁବିଧାକୁ ନେଇ ଖୁବ୍ ଚିନ୍ତିତ । କିନ୍ତୁ ବାସ୍ତବତା ଆଦୌ ତାହା ନୁହେଁ । ବରଂ ସୁବିଧା ପରିବର୍ତ୍ତେ ଦାୟିତ୍ୱ ବଢାଇ ଦିଆଯାଉଛି, ଯାହାଦ୍ୱାରା ସେ କ୍ରମଶଃ ଚାପି ହୋଇଚାଲିଛି ଦାୟିତ୍ୱ ଭାର ତଳେ ।
ମହିଳାଙ୍କ ବ୍ୟବହାରିକ ଜୀବନର ଅନୁଭବ ରଖୁଥିବା ସାମାଜିକ ସଂଗଠନର ଗବେଷଣା ଅନୁସାରେ ମହିଳାଙ୍କୁ ଆବଶ୍ୟକ ସୁବିଧାଠାରୁ ବଞ୍ଚିତ ରଖାଯାଉଛି । ଯେପରିକି ସମାନ କାମ କରିବା ପରେ ମଧ୍ୟ ପୁରୁଷ ସହକର୍ମୀଙ୍କ ତୁଳନାରେ କମ୍ ବେତନ ମିଳିଥାଏ । କିନ୍ତୁ କାମର ବୋଝ ଦିନକୁ ଦିନ ବଢିଚାଲିଛି ।
ବଢ଼ିଚାଲିଛି କାମର ବୋଝ
ଅବଶ୍ୟ ଏହି ସ୍ଥିତି କେବଳ ଆମ ଦେଶରେ ନୁହେଁ, ବରଂ ସାରା ବିଶ୍ୱରେ ଦେଖିବାକୁ ମିଳୁଛି । ଅବଶ୍ୟ ଏଭଳି ଚିନ୍ତାଧାରା ବିକଶିତ ତଥା ଆଧୁନିକ ଚିନ୍ତାଧାରା ରଖୁଥିବା ଦେଶ ବ୍ରିଟେନ୍ ଓ ଆମେରିକା ତଥା ଅବିକଶିତ ଏବଂ ବିକାଶଶୀଳ ଦେଶରେ ମଧ୍ୟ ସମାନ ସ୍ଥିତି । ବ୍ରିଟେନ୍ର ଏକ ସଂସ୍ଥା ରିଜୋଲେଶନ୍ ଫାଉଣ୍ଡେସନ୍ର ଗବେଷଣା ଅନୁସାରେ ୨୦୦୧ ତୁଳନାରେ ଏବେ କର୍ମଜୀବୀ ମହିଳାମାନଙ୍କ ସଂଖ୍ୟା ବହୁତ ଅଧିକ ବଢିଛି । କିନ୍ତୁ ସେମାନଙ୍କୁ ପୁରୁଷଙ୍କ ତୁଳନାରେ କମ୍ ବେତନ ମିଳୁଛି । ଏହି ସଂସ୍ଥା ଅନୁସାରେ ମହିଳାମାନେ ପୂର୍ବ ଅପେକ୍ଷା ଏବେ ସପ୍ତାହକୁ ୩୫ ମନିଟ୍ ଅଧିକ କାମ କରୁଛନ୍ତି । ବିଶେଷକରି ଯୁବା ମହିଳାମାନଙ୍କ ସାପ୍ତାହିକ ଶ୍ରମ ଅଧିକ । କିନ୍ତୁ ପାରିଶ୍ରମିକ କମ୍ ।
ଅକ୍ସଫେମ୍ ଦ୍ୱାରା ୨୦୨୦ରେ କରାଯାଇଥିବା ରିର୍ପୋଟ ଅନୁସାରେ ଭାରତର ସହର ଓ ଗ୍ରାମାଞ୍ଚଳରେ ପୁରୁଷମାନେ ଘରୋଇ କାମ ପାଇଁ ନିୟମିତ ପ୍ରତିଶତ ୩୦ ମିନିଟ୍ ସମୟ ଦେଉଥିବା ବେଳେ ମହିଳାମାନେ ପ୍ରାୟ ୫ ଘଣ୍ଟା । ପିଲା ଓ ବୟସ୍କଙ୍କ ଦେଖାରଖା ଏବଂ ଘରୋଇ କାମ ପରେ ମହିଳାମାନଙ୍କ ପାଖରେ ସମୟ ନଥାଏ । ତେଣୁ ସେମାନେ ନିଜର ବ୍ୟକ୍ତିତ୍ୱ ଓ କାର୍ଯ୍ୟଶୈଳୀରେ ଉନ୍ନତୀ ଆଣିବାକୁ ସମୟ ବାହାର କରିପାରି ନଥାନ୍ତି । ଫଳରେ ସେମାନେ ନିଜକୁ ଆର୍ଥିକ ଭାବେ ସମୃଦ୍ଧ କରିବା ପରିବର୍ତ୍ତେ ପୁରୁଷଙ୍କ ଉପରେ ନିର୍ଭରଶୀଳ ରହିଥାନ୍ତି।
ନିଜକୁ ସାବ୍ୟସ୍ତ କରିବାକୁ ଚାହାନ୍ତି
ଘର ହେଉ ଅବା ଅଫିସ୍ ନିଜକୁ ସକ୍ଷମ ଓ ସକ୍ରିୟ ସାବ୍ୟସ୍ତ କରିବାକୁ ମହିଳାମାନେ ଅଧିକ କାମ କରିଥାନ୍ତି । ସେମାନେ ଭାବିଥାନ୍ତି ଯେ ଏପରି କରିବା ଦ୍ୱାରା ନିଜର ପ୍ରତିଷ୍ଠା ବଢାଇବା ସହ ଅତିରିକ୍ତ ଆମଦାନୀ ହୋଇପାରିବ, ଯାହାଦ୍ୱାରା ପତି, ପିଲାମାନେ ଏବଂ ଘରର ଅନ୍ୟ ସଦସ୍ୟଙ୍କ ଉପରେ ଭଲ ପ୍ରଭାବ ପଡିଥାଏ । କିନ୍ତୁ ଏହାଦ୍ୱାରା ମହିଳାଙ୍କର ବିଶେଷ କିଛି ଲାଭ ହୋଇ ନଥାଏ ।
ବଢୁଛି ଆର୍ଥିକ ଅସମାନତା
ୱାଲ୍ଡ ଇକୋନେମିକ୍ ଫୋରମ୍ର ରିପୋର୍ଟ ଅନୁସାରେ ଭାରତର ମହିଳା ଓ ପୁରୁଷଙ୍କ ଆର୍ଥିକ ଅସମାନତା ସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି । ଏହି ମାମଲାରେ ଭାରତର ସ୍ଥାନ ୧୧୨ରେ ରହିଛି । ରିର୍ପୋଟ ଅନୁସାରେ ଲିଙ୍ଗଗତ ଅସମାନତା ଦୃଷ୍ଟିରୁ ସର୍ବାଗ୍ରେ ରହିଛି ଆଇସ୍ଲ୍ୟାଣ୍ଡ ।
ମାତୃତ୍ୱକାଳୀନ ଛୁଟି
କର୍ମଜୀବୀ ମହିଳାମାନଙ୍କୁ ୨୬ ସପ୍ତାହର ମାତୃତ୍ୱକାଳୀନ ଛୁଟି ଦେଉଛନ୍ତି କେନ୍ଦ୍ର ସରକାର । ଏହି ଛୁଟି ବୈତନିକ । ଏବେ ବିଭିନ୍ନ ଷ୍ଟାର୍ଟଅପ୍ କମ୍ପାନୀ ଓ ଛୋଟ ଛୋଟ କମ୍ପାନୀ ମଧ୍ୟ ଏହି ଛୁଟି ଦେଲେଣି । ନୂଆ ଆଇନ ପରେ ୫୩ ପ୍ରତିଶତ କମ୍ପାନୀ ମାତୃତ୍ୱ ଲାଭ ଛୁଟି ଦେବାରୁ ବଞ୍ଚିବା ରହିବା ପାଇଁ ମହିଳାଙ୍କ ଅପେକ୍ଷା ପୁରୁଷଙ୍କୁ ଚାକିରିରେ ରଖିବାକୁ ବେଶି ପସନ୍ଦ କରୁଛନ୍ତି । କମ୍ ବଜେଟ୍ରେ ଚାଲୁଥିବା ଷ୍ଟାର୍ଟଅପ୍ଗୁଡିକ ପାଇଁ ୨୬ ସପ୍ତାହ ସବୈତନିକ ଛୁଟି ଏକ ପ୍ରକାରର ଆର୍ଥିକ ବୋଝ ହୋଇପଡିଲାଣି । କେବଳ ସେତିକି ନୁହେଁ ଗର୍ଭପାତ ସମୟରେ ମଧ୍ୟ ମହିଳାମାନଙ୍କୁ ମାନସିକ ଓ ଶାରିରୀକ ପୀଡା ହୋଇଥାଏ । କିନ୍ତୁ ମହିଳାମାନେ ଲୋକଲଜ୍ଜା କାରଣରୁ ଏହି ସୁବିଧା ନେଇ ନଥାନ୍ତି ।
ଘରୋଇ ହିଂସା
ଅକ୍ସଫେମ୍ ଦ୍ୱାରା କରାଯାଇଥିବା ଏକ ସର୍ଭେରେ କୁହାଯାଇଛି ସ୍ୱାମୀଙ୍କ ଦ୍ୱାରା ମାଡ଼ ଖାଇବା ଓ ଘରୋଇ ହିଂସା ଭାରତରେ ଖୁବ୍ ସାଧାରଣ କଥା । ଉତ୍ତର ଭାରତର କିଛି ରାଜ୍ୟରେ କରାଯାଇଥିବା ଏକ ସର୍ଭେରେ ୧୧୦୭ଟି ଘରକୁ ସାମିଲ୍ କରାଯାଇଥିଲା । ସେଥିରୁ ଜଣାପଡିଥିଲା ଯେ ପୁରୁଷଙ୍କ କଥା ନ ମାନିବା ଦ୍ୱାରା ୨୪.୩ ପ୍ରତିଶତ ମହିଳାଙ୍କୁ ମାଡ଼ ଖାଇବାକୁ ପଡିଥାଏ । ସେହିପରି ୪୨.୬ ପ୍ରତିଶତଙ୍କୁ ଗାଳିଗୁଲଜ ଶୁଣିବାକୁ ପଡିଥାଏ । ସ୍ୱାମୀଙ୍କ ବିନା ପରାମର୍ଶରେ ଟଙ୍କା ଖର୍ଚ୍ଚ କରିବା ଦ୍ୱାରା ୪୨ ପ୍ରତିଶତ ମହିଳାଙ୍କୁ କ୍ରୋଧର ଶିକାର ହେବାକୁ ପଡିଥାଏ । ପିଲାଙ୍କର ଠିକ୍ ଭାବେ ଦେଖାଶୁଣା ନ କରିବା ଦ୍ୱାରା ୩୩ ପ୍ରତିଶତ ମହିଳା ମାଡ଼ ଖାଇଥାନ୍ତି । ଏପରିକି ୬୦.୬ ପ୍ରତିଶତ ମହିଳାଙ୍କୁ ବିଭିନ୍ନ କାରଣ ପାଇଁ ଗାଳି ଶୁଣିବାକୁ ପଡିଥାଏ ।