ଖଲ୍ଲିକୋଟ, ୨୩/୦୨ : ଖଲ୍ଲିକୋଟ ଥାନା ଅନ୍ତର୍ଗତ ମାଣିକପୁର ମାଟିଆ ସାହି କାନ୍ଦ ବୋବାଳିରେ ଫାଟି ପଡୁଛି ଗାଁ ଦାଣ୍ଡ। ଦାଦନ ଖଟିବାକୁ ଚେନ୍ନାଇ ଯାଇ ଜଣେ ଶ୍ରମିକଙ୍କ ମୃତ୍ୟୁ ଘଟିଛି। ଦାଦନ ଯନ୍ତ୍ରଣା ଠାରୁ ବଳିଯାଇଛି ଆର୍ଥିକ ଯନ୍ତ୍ରଣା। ମୃତଦେହ ଆଣିବାକୁ ଖର୍ଚ୍ଚ ହୋଇଛି ୬୦ ହଜାର ଟଙ୍କା ।
ମାଣିକପୁର ମାଟିଆ ସାହିର ଜି. ଶ୍ୟାମ ପ୍ରଧାନଙ୍କ ପରିବାର ଅତ୍ୟନ୍ତ ଗରୀବ ଶ୍ରେଣୀର। ପରିବାର ପ୍ରତି ପୋଷଣ ପାଇଁ ଧାର କରଜ କରି ଗତ ୧୦ ଦିନ ତଳେ ପୁଅ ଜି. ଟୁକୁନା ପ୍ରଧାନ (୨୦) ଙ୍କୁ ସାଙ୍ଗ ରେ ଧରି ଦାଦନ ଖଟିବାକୁ ଯାଇଥିଲେ ଚେନ୍ନାଇ ସହରକୁ। ସେଠାରେ ଏକ ଘରୋଇ କମ୍ପାନୀରେ ବାପା ପୁଅ ଶ୍ରମିକ ଭାବେ କାମ କରୁଥିଲେ। ମାତ୍ର ୬ ଦିନ କାମ କରିବା ପରେ ହଠାତ ପୁଅ ଟୁକୁନାର ଝାଡା ବନ୍ଦ ହୋଇ ଯାଇଥିଲା। ତୁରନ୍ତ ସେଠାରେ ଏକ ମେଡିକାଲ ରେ ଚିକିତ୍ସା କରିଥିଲେ। ପରେ ପରିସ୍ରା ମଧ୍ୟ ବନ୍ଦ ହୋଇଗଲା। ଚେନ୍ନାଇ ର ବଡ଼ ମେଡିକାଲକୁ ନେଇ ପୁଅର ଚିକିତ୍ସା କରେଇଲେ। କିନ୍ତୁ ସ୍ୱାସ୍ଥ୍ୟ ଅବସ୍ଥାରେ କୌଣସି ଉନ୍ନତି ହେଲାନି। ଅଧିକ ଚିକିତ୍ସା କରିବା ପାଇଁ ପାଖରେ ପଇସା ନଥିଲା। ସେଠାରେ ଗତ ଶୁକ୍ରବାର ଟୁକୁନାର ମୃତ୍ୟୁ ଘଟିଲା। ପୁଲିସ ପହଞ୍ଚି ଶବକୁ ଜବତ କଲା। ବ୍ୟବଛେଦ କରିବା ପାଇଁ ପୁଲିସ ଟଙ୍କା ମାଗିଥିଲା ବୋଲି ଟୁକୁନାର ବାପା କହିଛନ୍ତି। ମାତ୍ର ୬ ଦିନ କାମ କରିଛନ୍ତି ପାଖରେ ପଇସା ନାହିଁ। ଗାଁ କୁ ଫୋନ କଲେ। ସାହି ପଡୋଶୀ ଙ୍କ ଠାରୁ ଧାର କରଜ କରି ୬୦ ହଜାର ଟଙ୍କା ମାଆ ପଠେଇଲେ। ସେଠାରେ ପୁଲିସ ନେଲା ୧୫ ହଜାର ଟଙ୍କା, ଶବ ବ୍ୟବଛେଦ ପାଇଁ ନେଲେ ୧୫ ହଜାର ଟଙ୍କା ଓ ଗାଁ କୁ ଶବ ଆଣିବା ପାଇଁ ଆମ୍ବୁଲାନ୍ସ ନେଲା ୫୧ ହଜାର ଟଙ୍କା ବୋଲି କାନ୍ଦି କାନ୍ଦି କହିଛନ୍ତି ବାପା ଜି. ଶ୍ୟାମ ପ୍ରଧାନ। ଟୁକୁନା ଙ୍କ ମୃତଦେହ ଏକ ଘରୋଇ ଆମ୍ବୁଲାନ୍ସ ରେ ଆଜି ଆସି ଗାଁ ରେ ପହଞ୍ଚିଥିଲା। ପୁଅ ତ ଚାଲିଗଲା ଏବେ କରଜ କରିଥିବା ଟଙ୍କା କେମିତି ଶୁଝିବେ ସେ ଚିନ୍ତା ଘାରିଛି ଶ୍ୟାମଙ୍କୁ। ଖବର ପାଇ ଖଲ୍ଲିକୋଟ ବିଧାୟକ ପୂର୍ଣ୍ଣ ଚନ୍ଦ୍ର ସେଠି ନିଜ ସମର୍ଥକଙ୍କ ସହ ମାଣିକପୁରରେ ପହଞ୍ଚି ଶୋକ ସନ୍ତପ୍ତ ପରିବାର ଙ୍କୁ ସମବେଦନା ଜଣାଇବା ସହ କିଛି ଆର୍ଥିକ ସହାୟତା ପ୍ରଦାନ କରିଥିଲେ।
