ନୂଆଦିଲ୍ଲୀ: ସୋମବାରଠାରୁ ଆରମ୍ଭ ହେଉଥିବା ବିଧାନସଭା ଅଧିବେଶନ ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ବିଜେପି କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀ କରିଛନ୍ତି । ସେ ଆମ୍ ଆଦମୀ ପାର୍ଟି ବିରୋଧରେ ଗମ୍ଭୀର ଅଭିଯୋଗ ଆଣିଛନ୍ତି । ମୁଖ୍ୟମନ୍ତ୍ରୀ ରେଖା ଗୁପ୍ତା ଦିଲ୍ଲୀର ରାଜକୋଷ ଖାଲି କରିଥିବା ନେଇ ଆପ୍ ବିରୋଧରେ ଅଭିଯୋଗ କରିଛନ୍ତି । ସେପଟେ ମହିଳାମାନଙ୍କୁ ମାସିକ ୨୫୦୦ ଟଙ୍କା କେବେଳ ଦିଆଯିବ ବୋଲି ପ୍ରଶ୍ନରେ ରେଖା ଗୁପ୍ତା କହିଛନ୍ତି, ପୂର୍ବ ସରକାର ରାଜକୋଷ ଖାଲି ଛାଡି ଦେଇଛନ୍ତି । କିନ୍ତୁ ଆମେ ଏକ ସମ୍ପୂର୍ଣ୍ଣ ଯୋଜନା ସହିତ ଜନସାଧାରଣଙ୍କ ପାଖକୁ ଯିବୁ ଏବଂ ସଂକଳ୍ପ ପତ୍ରରେ ବିଜେପି ଯାହା ପ୍ରତିଶ୍ରୁତି ଦେଇଛି ଆମେ ତାହା ପୂରଣ କରିବୁ।
ରେଖା ଗୁପ୍ତା କହିଛନ୍ତି ଯେ, ଦିଲ୍ଲୀର ଲୋକମାନେ ୧୧ ବର୍ଷ ଧରି AAP କ’ଣ କରିଛି ତାହା ଦେଖିଛନ୍ତି ଏବଂ ଏବେ ସେମାନେ ବିଜେପି ସରକାରକୁ ମଧ୍ୟ ଦେଖିବେ । ଏହି ସମୟରେ ରାଜ୍ୟ ସଭାପତି ବୀରେନ୍ଦ୍ର ସଚଦେବ କହିଛନ୍ତି ଯେ, ଆମ ସରକାରଙ୍କର କେବଳ ଗୋଟିଏ ଆଜେଣ୍ଡା । ଆମକୁ ଦିଲ୍ଲୀକୁ ବିକଶିତ କରିବାକୁ ପଡିବ । ଦିଲ୍ଲୀରେ ଯାହା ବି କାମ ବାକି ଅଛି, ତାହାକୁ ସମାପ୍ତ କରିବାକୁ ପଡିବ। ଆମର ସମସ୍ତ ନେତା ତତ୍ପର ଅଛନ୍ତି।
ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା କହିଛନ୍ତି ଯେ, ‘ଆମର କାମ ଦିଲ୍ଲୀକୁ ଲୁଟ କରିଥିବା ନେତାମାନଙ୍କ ମୁହଁ ବନ୍ଦ କରିବା । ଦିଲ୍ଲୀବାସୀଙ୍କୁ ଉପହାର ମିଳିବା ଆରମ୍ଭ ହେବ । ଆଜିର ବୈଠକରେ, ବିଧାନସଭାରେ ବିକାଶ କାର୍ଯ୍ୟକୁ କିପରି ତ୍ୱରାନ୍ୱିତ କରିବାକୁ ପଡିବ ସେନେଇ ଆମେ ଆମର ବିଧାୟକମାନଙ୍କୁ କହିଛୁ ।’ ସେ କହିଛନ୍ତି ଯେ, ଆସନ୍ତାକାଲିଠାରୁ ଦିଲ୍ଲୀ ବିଧାନସଭା ଅଧିବେଶନ ଆରମ୍ଭ ହେବାକୁ ଯାଉଛି । ଆମେ ଗୃହରେ CAG ରିପୋର୍ଟ ଉପସ୍ଥାପନ କରିବୁ। ଯେଉଁମାନେ ଦିଲ୍ଲୀବାସୀଙ୍କ ଟଙ୍କା ଲୁଟ କରିଛନ୍ତି ସେମାନଙ୍କୁ ଛଡ଼ାଯିବ ନାହିଁ। ଆମ ସରକାର ଦିଲ୍ଲୀର ବିକାଶ ପାଇଁ ଦ୍ରୁତ ଗତିରେ କାମ କରୁଛି ।
