ମୁମ୍ବାଇ: ଲୋକପ୍ରିୟ ଗାୟକ ଗୁରୁ ରାନ୍ଧୱାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ସେ ସୋସିଆଲ ମିଡିଆରେ ହସ୍ପିଟାଲ ବେଡରୁ ତାଙ୍କର ଏକ ଫଟୋ ପୋଷ୍ଟ କରି ଏହି ଖବର ସେୟାର କରିଛନ୍ତି । ଏହି ଫଟୋ ଦେଖିବା ପରେ ତାଙ୍କ ପ୍ରଶଂସକଙ୍କ ଚିନ୍ତା ବଢ଼ିଯାଇଛି । ରବିବାର (ଫେବୃଆରୀ ୨୩) ରାନ୍ଧୱା ହସ୍ପିଟାଲରୁ ତାଙ୍କର ଆଶ୍ଚର୍ଯ୍ୟଜନକ ଫଟୋ ସେୟାର କରି ନିଜ ସ୍ୱାସ୍ଥ୍ୟର ଅପଡେଟ୍ ଦେଇଛନ୍ତି । ଏହା ସହିତ ସେ ତାଙ୍କ ଡାକ୍ତରଖାନାରେ ଭର୍ତ୍ତି ହେବାର ପ୍ରକୃତ କାରଣ ମଧ୍ୟ କହିଛନ୍ତି । ସେ ପ୍ରକାଶ କରିଛନ୍ତି ଯେ 'ଶୌଙ୍କି ସର୍ଦ୍ଦାର' ଫିଲ୍ମର ଏକ ଆକ୍ସନ ସିନ୍ ସୁଟିଂ ସମୟରେ ସେ ଆହତ ହୋଇଥିଲେ ଏବଂ ଏହା ପରେ ତାଙ୍କୁ ଡାକ୍ତରଖାନାରେ ଭର୍ତ୍ତି ହେବାକୁ ପଡିଥିଲା ।
ଗୁରୁ ରାନ୍ଧୱା ନିକଟରେ ତାଙ୍କର ପଞ୍ଜାବୀ ଫିଲ୍ମ 'ଶୌଙ୍କି ସର୍ଦ୍ଦାର'ର ସୁଟିଂ କରୁଥିଲେ, ଯେଉଁଥିରେ ବବୁ ମାନ, ନିମ୍ରତ କୌର ଆଲୁୱାଲିଆ ଏବଂ ଗୁଗ୍ଗୁ ଗିଲ ମଧ୍ୟ ଅଭିନୟ କରିଛନ୍ତି । କିନ୍ତୁ ଏକ ଆକ୍ସନ୍ ସିକ୍ୱେନ୍ସ କରିବା ସମୟରେ ସେ ଆହତ ହୋଇଥିଲେ । ଇନଷ୍ଟାଗ୍ରାମରେ ଗୁରୁ ରାନ୍ଧୱା ହସ୍ପିଟାଲରୁ ତାଙ୍କର ଫଟୋ ସେୟାର କରିଛନ୍ତି । ଯେଉଁଥିରେ ସେ ପ୍ରଶଂସକମାନଙ୍କୁ ତାଙ୍କ ସ୍ବାସ୍ଥ୍ୟବସ୍ଥା ସଂପର୍କରେ ସୂଚନା ଦେଇଛନ୍ତି । ଗୁରୁ ଲେଖିଛନ୍ତି, 'ମୋର ପ୍ରଥମ ଷ୍ଟଣ୍ଟ, ମୋର ପ୍ରଥମ ଆଘାତ, କିନ୍ତୁ ମୋର ସାହସ ଅକ୍ଷୁର୍ଣ୍ଣ ରହିଛି। ଶୌଙ୍କି ସର୍ଦ୍ଦାର ଚଳଚ୍ଚିତ୍ରର ସେଟରୁ ଏକ ସ୍ମୃତି ମିଳିଗଲା । ଏହା ବହୁତ କଷ୍ଟକର... କିନ୍ତୁ ମୁଁ ମୋ ଦର୍ଶକଙ୍କ ପାଇଁ କଠିନ ପରିଶ୍ରମ କରିବି ।’
ଫଟୋରେ ଗାୟକଙ୍କୁ ହସ୍ପିଟାଲ ବେଡରେ ଶୋଇଥିବା ଦେଖିବାକୁ ମିଳିଛି । ସେ ଯନ୍ତ୍ରଣା ଅନୁଭବ କରିବା ସତ୍ତ୍ୱେ କ୍ୟାମେରା ଆଗରେ ହସିଛନ୍ତି । ତାଙ୍କ ବେକରେ ସର୍ଭାଇକାଲ୍ କଲାର ପିନ୍ଧିଛନ୍ତି । ତାଙ୍କ ବେକ ଏବଂ ମୁଣ୍ଡରେ ଗୁରୁତର ଆଘାତ ଲାଗିଛି । ଏହି ଖବର ଉପରେ ପ୍ରତିକ୍ରିୟା ଦେଇ ମୃଣାଳ ଠାକୁର କ’ଣ ହେଲା ବୋଲି ପଚାରିଛନ୍ତି । ଗାୟକ ମିକା ସିଂହ ମଧ୍ୟ ଦୁଃଖ ପ୍ରକାଶ କରି ଲେଖିଛନ୍ତି, ‘ଶୀଘ୍ର ସୁସ୍ଥ ହୋଇଯାଆ।’ ତାଙ୍କ ପ୍ରଶଂସକମାନେ ମଧ୍ୟ ଅଭିନେତା-ଗାୟକଙ୍କ ଶୀଘ୍ର ଆରୋଗ୍ୟ କାମନା କରିଛନ୍ତି ।
ଗୁରୁ ରାନ୍ଧୱାଙ୍କର ଜଣେ ପ୍ରଶଂସକ ଲେଖିଛନ୍ତି, ‘ଶୀଘ୍ର ସୁସ୍ଥ ହୋଇଯାଆ ଚାମ୍ପିଅନ୍ ।’ ଅନ୍ୟ ଜଣେ ଲେଖିଛନ୍ତି, ସବୁକିଛି ଠିକ୍ ହୋଇଯିବ ପାଜି। ତୃତୀୟ ୟୁଜର ଲେଖିଛନ୍ତି, ‘ମୁଁ ଏହି ପୋଷ୍ଟ ଦେଖିପାରୁନାହିଁ, ତୁମକୁ ଭଲପାଏ ପାଜି, ମୁଁ ବିଶ୍ୱାସ କରିପାରୁନାହିଁ ଯେ ତୁମେ ଏହି ଅବସ୍ଥାରେ ଅଛ।'
