ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧକୁ ନେଇ ଏକ ବଡ଼ କଥା କହିଛନ୍ତି। ଟ୍ରମ୍ପ କହିଛନ୍ତି ଯେ, ସେ ଆଶା କରୁଛନ୍ତି ଯେ ରୁଷ ୟୁକ୍ରେନ ସହିତ ୩୦ ଦିନିଆ ଅସ୍ତ୍ରବିରତି ପାଇଁ ରାଜି ହେବ। ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନ୍ସକି ମଧ୍ୟ ଏହାକୁ ଏକ ସକାରାତ୍ମକ ପଦକ୍ଷେପ ବୋଲି କହିଛନ୍ତି। ଜେଲେନସ୍କି କହିଛନ୍ତି ଯେ, ମସ୍କୋକୁ ଏହାକୁ ଗ୍ରହଣ କରିବା ପାଇଁ ରାଜି କରାଇବା ଆମେରିକା ଉପରେ ନିର୍ଭର କରୁଛି।
ମଙ୍ଗଳବାର ଦିନ ସାଉଦି ଆରବର ଜେଦ୍ଦାହରେ ବରିଷ୍ଠ ଆମେରିକୀୟ ଏବଂ ୟୁକ୍ରେନୀୟ ଅଧିକାରୀ ମାନେ ଆଲୋଚନା କରିଛନ୍ତି। ଆଲୋଚନାରେ ରୁଷ ଏବଂ ୟୁକ୍ରେନ ମଧ୍ୟରେ ତିନି ବର୍ଷରୁ ଅଧିକ ସମୟ ଧରି ଚାଲିଥିବା ଯୁଦ୍ଧର ଅନ୍ତ ଘଟାଇବା ଉପରେ ଗୁରୁତ୍ୱ ଦିଆଯାଇଥିଲା, ଯେଉଁଥିରେ ୩୦ ଦିନିଆ ଯୁଦ୍ଧବିରତି ଚୁକ୍ତିନାମାକୁ ଗ୍ରହଣ କରାଯିବାକୁ ସଙ୍କେତ ଦିଆଯାଇଛି। ଜେଦ୍ଦାରେ ଘୋଷଣା ପରେ ଟ୍ରମ୍ପ ଏଠାରେ କହିଛନ୍ତି ଯେ, "କିଛି ସମୟ ପୂର୍ବରୁ ୟୁକ୍ରେନ ଯୁଦ୍ଧବିରତି ପାଇଁ ରାଜି ହୋଇଥିଲା। ଏବେ ଆମେ ରୁଷ ସହିତ ଯୋଗାଯୋଗ କରିବାକୁ ଯାଉଛୁ ଏବଂ ଆଶା କରୁଛୁ ଯେ ରାଷ୍ଟ୍ରପତି ଭ୍ଲାଦିମିର ପୁଟିନ ମଧ୍ୟ ଏଥିରେ ସହମତ ହେବେ।
"ଯଦି ଆମେ ରୁଷକୁ ରାଜି କରାଇପାରିବା, ତେବେ ତାହା ବହୁତ ଭଲ ହେବ," ଟ୍ରମ୍ପ ତାଙ୍କ ଟ୍ରୁଥ୍ ସୋସିଆଲ ଆକାଉଣ୍ଟରେ ପୋଷ୍ଟ କରାଯାଇଥିବା ଏକ ଭିଡିଓରେ କହିଛନ୍ତି। ଯଦି ଆମେ ଏହା କରିପାରିବା ନାହିଁ, ତେବେ ଆମେ ଏହି କ୍ଷେତ୍ରରେ ପ୍ରୟାସ ଜାରି ରଖିବୁ କାରଣ ଯୁଦ୍ଧରେ ଲୋକମାନେ ମରୁଛନ୍ତି।
