ନୂଆଦିଲ୍ଲୀ,୧୨।୩: ଏବେ ବି ବଲୁଚ ଲିବରେସନ ଆର୍ମି କବଜାରେ ପାକିସ୍ତାନର ଜାଫର ଏକ୍ସପ୍ରେସ୍। ରାତିସାରା ଲଢେଇରେ ଏପର୍ଯ୍ୟନ୍ତ ଯାଇ ସାରିଲାଣି ୩୦ ରୁ ଅଧିକ ସୈନିକଙ୍କ ଜୀବନ। ପାକିସ୍ତାନ ସେନା ବନ୍ଧକଙ୍କୁ ମୁକ୍ତ କରିବା ପାଇଁ ଜାରି ରଖିଛି ରେସକ୍ୟୁ ଅପରେସନ୍। କିନ୍ତୁ ବିଏଲଏ ବିଦ୍ରୋହୀମାନେ ଯାତ୍ରୀଙ୍କୁ ମାନବ ଢାଲ ଭାବେ ବ୍ୟବହାର କରୁଛନ୍ତି । ବନ୍ଧକଙ୍କ ଭିତରେ ନିଜର ସୁସାଇଡ୍ ବମର୍ସଙ୍କୁ ବସାଇ ରଖିଛି। ଯାହାଫଳରେ ସେନାକୁ ଅପରେସନ୍ କରିବାରେ ସମସ୍ୟା ହେଉଛି। ଖୁବ୍ ସତର୍କତାର ସହ ରେସକ୍ୟୁ ଅପରେସନ୍ କରିବାକୁ ପଡୁଛି।
ପାକିସ୍ତାନର ଜାଫର ଏକ୍ସପ୍ରେସ୍ରେ ଯାତ୍ରୀଙ୍କୁ ମୁକ୍ତ କରିବା ନେଇ ଜାରି ରହିଛି ରେସକ୍ୟୁ ଅପରେସନ୍। ବିଏଲ୍ଏ ବିଦ୍ରୋହୀଙ୍କ ଯାତ୍ରୀଙ୍କୁ ଉଦ୍ଧାର ପାଇଁ ସବୁ ପ୍ରକାର ଚେଷ୍ଟା ଜାରି ରଖିଛି ପାକିସ୍ତାନ ଆର୍ମି । କିନ୍ତୁ ଏବେ ଯାଏଁ କୌଣସି ରାସ୍ତା ବାହାରି ପାରିନି । କାରଣ ବିଏଲଏ ବିଦ୍ରୋହୀ ଟ୍ରେନ୍ ଭିତରେ ତାର ଆତ୍ମଘାତୀ ସୁଇସାଇଡ୍ ବମରଙ୍କୁ ଭର୍ତ୍ତି କରି ରଖିଛି । ଯାତ୍ରୀଙ୍କ ମଧ୍ୟରେ ଆତ୍ମଘାତୀ ବିଏଲଏ ଆର୍ମି ଜଗି ରହିଛନ୍ତି । ନିଜେ ମରିବେ ପଛେ ସେମାନେ ଯାତ୍ରୀଙ୍କୁ ମାରିବାକୁ ପ୍ରସ୍ତୁତ ରହିଛନ୍ତି। ବର୍ତ୍ତମାନ ସୁଦ୍ଧା ପାକ୍ ସେନା ୧୫୫ଜଣ ଯାତ୍ରୀଙ୍କୁ ଉଦ୍ଧାର କରିଛି। ଏବେ ବି ୨୦୦ରୁ ଅଧିକ ଲୋକ ଅଛନ୍ତି ବନ୍ଧକ । ୨୭ରୁ ଅଧିକ ବିଦ୍ରୋହୀଙ୍କୁ ମାରିବାରେ ସଫଳ ହୋଇଛି । ଏହା ଭିତରେ ବିଏଲଏ ଆର୍ମି ତାଙ୍କ ଦାବି ପୂରା କରିବା ପାଇଁ ପାକ୍ ସେନାକୁ ୪୮ଘଣ୍ଟାର ସମୟ ଦେଇଛି। ଏହା ସହ ପ୍ରତି ଘଣ୍ଟାରେ ୧୦ଜଣ ଯାତ୍ରୀଙ୍କୁ ମାରିବାର ଧମକ ଦେଇଛି । ପାକିସ୍ତାନ ଜେଲରେ ବନ୍ଦୀ ଥିବା ବଲୁଚ ନାଗରିକଙ୍କୁ ନଛାଡିଲେ ଏଭଳି ଦଶା ଭୋଗିବାକୁ ପଡିବ ବୋଲି କହିଛନ୍ତି ବିଏଲଏ। ଯଦି ପାକିସ୍ତାନ ଆର୍ମି ଡ୍ରୋନ୍ ଆଟାକ କରେ କିମ୍ୱା ଗୁଳି ଚାଳନା ବନ୍ଦ ନକରେ ଯାତ୍ରୀଙ୍କୁ ହତ୍ୟା କରିଯିବ ।
ପାକିସ୍ତାନୀ ଗଣମାଧ୍ୟମର ସୁତ୍ର ଅନୁସାରେ ଏହାର ମାଷ୍ଟରମାଇଣ୍ଡ ଅଫଗାନିସ୍ତାନରେ ଅଛନ୍ତି। ସେମାନେ ସାଟେଲାଇଟ୍ ଫୋନ୍ ଜରିଆରେ ବିଏଲଏ ସହ ଆଲୋଚନା କରୁଛନ୍ତି। ବିଶେଷ ଭାବରେ ମହିଳା ଏବଂ ଶିଶୁଙ୍କୁ ସେମାନେ ଢାଲ କରିଛନ୍ତି। ସେପେଟ ପାକିସ୍ତାନ ରେଲଓ୍ବେ ଅଧିକାରୀ କହିଛନ୍ତି, କ୍ବେଟାରୁ ଦେଶର ଅନ୍ୟ ଭାଗକୁ ଯାଉଥିବା ବୋଲନ୍ ମେଲ ଓ ଜାଫର ଏକ୍ସପ୍ରେସ୍ ଆଗାମୀ ୩ ଦିନ ପାଇଁ ସସ୍ପେଣ୍ଡ କରାଯାଇଛି।
