ନୂଆଦିଲ୍ଲୀ: ପାକିସ୍ତାନର ବାଲୁଚିସ୍ତାନରେ ମଙ୍ଗଳବାର ବାଲୁଚ୍ ଲିବରେସନ୍ ଆର୍ମି (BLA) ଜାଫର ଏକ୍ସପ୍ରେସକୁ ଅପହରଣ କରିଥିଲା। ପାକିସ୍ତାନୀ ନ୍ୟୁଜ୍ ଚ୍ୟାନେଲ ଡନ୍ ଅନୁଯାୟୀ, ପାକିସ୍ତାନୀ ସୁରକ୍ଷା ବାହିନୀ ଟ୍ରେନରେ ଥିବା ସମସ୍ତ BLA ଆତଙ୍କୀଙ୍କୁ ହତ୍ୟା କରିଛନ୍ତି। କୁହାଯାଉଛି ଯେ ବନ୍ଧକ ମାନଙ୍କୁ ବାହାରକୁ ଆଣିବା ପାଇଁ ଏବେ ଉଦ୍ଧାରକାର୍ଯ୍ୟ ଜାରି ରହିଛି।

ସୂଚନାଥାଉକି, ଜାଫର ଏକ୍ସପ୍ରେସ ଟ୍ରେନଟି କ୍ୱେଟାରୁ ପେଶାୱାରକୁ ଯାଉଥିବା ବେଳେ ଆତଙ୍କବାଦୀ ମାନେ ବିସ୍ଫୋରକ ବ୍ୟବହାର କରି ଟ୍ରେନଟିକୁ ଲାଇନଚ୍ୟୁତ କରି ଏହାକୁ କବଜାକୁ ନେଇ ଯାଇଥିଲେ। ଟ୍ରେନର ୯ଟି ବଗିରେ ପ୍ରାୟ ୫୦୦ ଜଣ ଯାତ୍ରୀ ଥିଲେ। ସୁରକ୍ଷାବାହିନୀର ସୂତ୍ର ଅନୁଯାୟୀ, ସୁରକ୍ଷା ବାହିନୀ ମହିଳା ଏବଂ ଶିଶୁ ସମେତ ବହୁ ସଂଖ୍ୟକ ବନ୍ଧକଙ୍କୁ ଉଦ୍ଧାର କରିଛନ୍ତି। ଉଦ୍ଧାର ହୋଇଥିବା ସାଧାରଣ ନାଗରିକଙ୍କୁ ଆତଙ୍କବାଦୀ ମାନେ ବନ୍ଧକ ଭାବରେ ବ୍ୟବହାର କରୁଥିଲେ।

ଏହି ଘଟଣାରେ କେତେ ଯାତ୍ରୀଙ୍କ ମୃତ୍ୟୁ ହୋଇଛି ତାହା ନିର୍ଣ୍ଣୟ କରାଯାଉଛି। ଅଧିକାରୀମାନେ କହିଛନ୍ତି ଯେ ଘଟଣାସ୍ଥଳରେ ଉପସ୍ଥିତ ସମସ୍ତ ଆତଙ୍କବାଦୀ ନିହତ ହୋଇଛନ୍ତି। BLA ଆତ୍ମଘାତୀ ବିସ୍ଫୋରଣକାରୀ ମାନେ ତିନୋଟି ଭିନ୍ନ ସ୍ଥାନରେ ମହିଳା ଏବଂ ପିଲାମାନଙ୍କୁ ବନ୍ଧକ ରଖିଥିଲେ।